ଫେଡରରଙ୍କ ରେକର୍ଡ ସହ ସମକକ୍ଷ ହେଲେ ଜୋକୋଭିଚ

ପ୍ୟାରିସ: ଚଳିତ ଫ୍ରେଂଚ ଓପନ ଅବସରରେ ସର୍ବିୟାର ଷ୍ଟାର ଟେନିସ ଖେଳାଳି ନୋଭାକ ଜୋକୋଭିଚ ଆଉ ଏକ କୀର୍ତିମାନ ସ୍ଥାପନ କରିଛନ୍ତି । ଗ୍ରାଣ୍ଡସ୍ଲାମ ଟେନିସରେ ସେ ୩୬୯ତମ ବିଜୟ ହାସଲ କରି ରୋଜର ଫେଡେରରଙ୍କ ରେକର୍ଡ ସହ ସମକକ୍ଷ ହୋଇଛନ୍ତି । ତୃତୀୟ ରାଉଣ୍ଡର ଏକ ସଂଘର୍ଷପୂର୍ଣ୍ଣ ମ୍ୟାଚରେ ଜୋକୋଭିଚ ଇଟାଲୀର ଲୋରେଂଜୋ ମୁସେଟୀଙ୍କୁ ୭-୫, ୬-୭(୬), ୨-୬, ୬-୩ ଓ ୬-୦ ସେଟରେ ପରାସ୍ତ କରିଥିଲେ । ପ୍ରଥମ ସେଟରେ ଜୋକୋଭିଚ ଜିତିବା ପରେ ମୁସେଟୀ କ୍ରମାଗତ ୨ଟି ସେଟ ଜିତି ୨-୧ରେ ଅଗ୍ରଣୀ ହୋଇଥିଲେ । ଏହା ପରେ ସର୍ବିୟା ଷ୍ଟାର କ୍ରମାଗତ ୨ଟି ସେଟ ଜିତି ମ୍ୟାଚରେ ବିଜୟୀ ହୋଇଥିଲେ । ଜୋକୋଚିଭ ଓପନ ଏରାରେ ୨୪ ଗ୍ରାଣ୍ଡ ସ୍ଲାମ ଜିତିବାରେ ପ୍ରଥମ ଖେଳାଳି ହୋଇଛନ୍ତି । ଏହା ପୂର୍ବରୁ ସର୍ବାଧିକ ଗ୍ରାଣ୍ଡସ୍ଲାମ (ଉଭୟ ପୁରୁଷ ଓ ମହିଳା)ରେ ସେ ସେରେନା ୱିଲିୟମ୍ସଙ୍କ ରେକର୍ଡ ଭଙ୍ଗ କରିଛନ୍ତି । ସେରେନା ୨୩ ଗ୍ରାଣ୍ଡ ସ୍ଲାମ ଜିତିଛନ୍ତି । ୧୯୬୮ ପରଠାରୁ ଓପନ ଏରାର ଆରମ୍ଭ ହୋଇଥିଲା ।