ଭୁବନେଶ୍ୱର: ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ପ୍ରୀତିରଞ୍ଜନ ଘଡାଇଙ୍କ ସୂଚନା ଅନୁଯାୟୀ, ୨୦୧୯ ମସିହାରୁ ଓଡ଼ିଶାରେ ବେକାରୀ ସ୍ନାତକଙ୍କ ସଂଖ୍ୟା ପାଖାପାଖି ୩ ଲକ୍ଷକୁ ବୃଦ୍ଧି ପାଇଛି।
ମଙ୍ଗଳବାର ବିଧାନସଭାରେ ଏକ ପ୍ରଶ୍ନର ଲିଖିତ ଉତ୍ତର ଦେଇ ମନ୍ତ୍ରୀ କହିଛନ୍ତି, ରାଜ୍ୟରେ ମୋଟ ୨ ଲକ୍ଷ ୯୮ ହଜାର ୯୩୩ ଜଣ ପଞ୍ଜୀକୃତ ବେକାର ସ୍ନାତକ ଅଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ, ୨୦୧୯ ମସିହାରୁ ବିଭିନ୍ନ ଏମ୍ପ୍ଲୟମେଣ୍ଟ ଏକ୍ସଚେଞ୍ଜରେ ନାମ ପଞ୍ଜିକରଣ କରିଥିବା ବେକାର ଯୁବକଯୁବତୀଙ୍କ ସଂଖ୍ଯା ୧୧ ଲକ୍ଷ ୬ ହଜାର ୫୩୬ ଥିଲା।
ତେବେ ନିଯୁକ୍ତି ପାଇଥିବା ଯୁବକଙ୍କ ସଂଖ୍ୟା ସାମାନ୍ୟ ରହିଛି। ୨୦୧୯ରେ ମାତ୍ର ୧୦୫୩ ଜଣ ପଞ୍ଜିକୃତ ଯୁବକ ସରକାରୀ କାର୍ଯ୍ୟାଳୟରେ ନିଯୁକ୍ତି ପାଇଥିବା ବେଳେ ୨୦୨୦ରେ ୮୩ ଜଣଙ୍କୁ ନିଯୁକ୍ତି ଦିଆଯାଇଛି। ୨୦୨୧ରେ ୧୭୨ ଜଣ, ୨୦୨୨ରେ ୫୯ ଜଣ ଓ ୨୦୨୩ରେ ଏଯାବତ୍ ୪୯୯ ଜଣ ଯୁବକ ଯୁବତୀ ନିଯୁକ୍ତି ପାଇଛନ୍ତି।
ମନ୍ତ୍ରୀଙ୍କ ଏହି ଉତ୍ତର ଓଡ଼ିଶାରେ ଗ୍ରାଜୁଏଟ ମାନଙ୍କ ମଧ୍ୟରେ ବଢୁଥିବା ବେକାରୀ ସମସ୍ୟାକୁ ନେଇ ଚିନ୍ତା ବଢ଼ାଇ ଦେଇଛି। ଗ୍ରାଜୁଏଟଙ୍କ ପାଇଁ ଅଧିକ ନିଯୁକ୍ତି ସୁଯୋଗ ସୃଷ୍ଟି କରିବା ପାଇଁ ରାଜ୍ୟ ସରକାର ଜରୁରୀ ପଦକ୍ଷେପ ନେବା ଆବଶ୍ୟକ ବୋଲି ବିଶେଷଜ୍ଞମାନେ ମତ ଦେଇଛନ୍ତି।
ସେମାନେ ଏହା ମଧ୍ୟ କହୁଛନ୍ତି ଯେ ସରକାର ଦକ୍ଷତା ବିକାଶ ଏବଂ ଉଦ୍ୟୋଗୀ ପ୍ରଶିକ୍ଷଣ ଉପରେ ଗୁରୁତ୍ୱ ଦେବା ଉଚିତ, ଯାହାଦ୍ୱାରା ସ୍ନାତକମାନଙ୍କୁ ଅଧିକ ରୋଜଗାରକ୍ଷମ କରିବାରେ ସହାୟତା ମିଳିପାରିବ।
Comments are closed.