କଟକ: ନିକଟରେ ଅନଲାଇନରେ ଦଶମ ଶ୍ରେଣୀ ଷାଣ୍ମାସିକ ପରୀକ୍ଷା ପ୍ରଶ୍ନପତ୍ର ଲିକ୍ ହେବା ଘଟଣାକୁ ଅନୁଧ୍ୟାନ କରି ସମ୍ପୃକ୍ତ ବ୍ୟକ୍ତିବିଶେଷଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବୋର୍ଡ ପକ୍ଷରୁ ଶନିବାର କଟକ ସାଇବର ଥାନାରେ ଅଭିଯୋଗ କରାଯାଇଛି।
ସେହିପରି ଚଳିତ ଦଶମ ଓ ମଧ୍ୟମା ଷାଣ୍ମାସିକ ପରୀକ୍ଷାକୁ ସତର୍କତାର ସହ ପରିଚାଳନା କରିବା ପାଇଁ ବିଏସ୍ଇ ପକ୍ଷରୁ ଜିଲ୍ଲା ଶିକ୍ଷା ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି। ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ଅକ୍ଟୋବର 4 ତାରିଖରୁ ପରୀକ୍ଷା ଆରମ୍ଭ ହେଉଛି।
ଉତ୍ତର ଖାତାର ପରୀକ୍ଷା ଓ ମୂଲ୍ୟାୟନ ସତର୍କତାର ସହ କରିବାକୁ ବିଦ୍ୟାଳୟଗୁଡ଼ିକୁ କୁହାଯାଇଛି ଏବଂ ପ୍ରକାଶ ପାଇବା ଯାଏଁ ମାର୍କ ସମ୍ପର୍କରେ ଅତ୍ୟନ୍ତ ଗୋପନୀୟତା ଅବଲମ୍ବନ କରିବାକୁ କୁହାଯାଇଛି।
ଅନ୍ୟପଟେ ଯେଉଁ ୟ୍ଯୁଟ୍ୟୁବରେ ପ୍ରଶ୍ନପତ୍ର ପ୍ରଘଟ ହୋଇଥିଲା ସଂପୃକ୍ତ ପ୍ଲାଟଫର୍ମରୁ ସେହି ଭିଡିଓ ଡିଲିଟ୍ ହୋଇଯାଇଥିବା ଜଣାପଡିଛି।