ଭୁବନେଶ୍ୱର: ୨୧ ତାରିଖରେ ଖରା ଛୁଟି ଖୋଲିବ। କିନ୍ତୁ ଏହାରି ଭିତରେ ପାଣିପାଗ ରିପୋର୍ଟ କହୁଛି ରାଜ୍ୟରେ ଆହୁରି ତିନି ଦିନ ଗ୍ରୀଷ୍ମ ପ୍ରବାହ ଜାରି ରହିବ। ଅଧିକାଂଶ ଦିନ ରାଜ୍ୟର ବିଭିନ୍ନ ସ୍ଥାନରେ ତପମାତ୍ରା ୪୫ ଡିଗ୍ରୀ ରହୁଥିବା ବେଳେ ଅସହ୍ୟ ଗୁଳୁଗୁଳି ସ୍ଥିତିକୁ ଆହୁରି ଜଟିଳ କରିଦେଇଛି। ଏପରି ସ୍ଥିତିରେ ସ୍କୁଲ ଖୋଲିବା ନିଷ୍ପତ୍ତି ଜିଲ୍ଲାପାଳ ନେବେ ବୋଲି ରାଜ୍ୟ ସରକାର କହିଛନ୍ତି।
ରବିବାର ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସୁଦାମ ମାରାଣ୍ଡି କହିଛନ୍ତି ଯେ ସରକାର ଏହା ପୂର୍ବରୁ ଛୁଟିକୁ ଦୁଇ ଦିନ ବଢାଇ ଦେଇଥିଲେ। ଏବଂ ସ୍କୁଲଗୁଡ଼ିକୁ ଜୁନ୍ ୨୧ ରୁ ଖୋଲିବାକୁ ନିର୍ଦ୍ଦେଶ ଦେଇଛନ୍ତି। ତଥାପି, ରାଜ୍ୟର କେତେକ ସ୍ଥାନରେ ଅତ୍ୟଧିକ ତାପମାତ୍ରା ଏବଂ ଅନୁଭୂତ ହେଉଛି। ଆଇଏମଡି ପୂର୍ବାନୁମାନ କରିଛି ଯେ ଉତ୍ତାପ ଆଉ ତିନି ଦିନ ପର୍ୟ୍ୟନ୍ତ ରହିବ।
ମନ୍ତ୍ରୀ କହିଛନ୍ତି, ଜିଲ୍ଲାପାଳମାନେ ନିଜ ନିଜ ଜିଲ୍ଲାର ଗ୍ରୀଷ୍ନ ପ୍ରବାହ ସ୍ଥିତିର ସମୀକ୍ଷା କରିବେ ଏବଂ ନିର୍ଦ୍ଧାରିତ ଦିନରେ ବିଦ୍ୟାଳୟ ଖୋଲିବା ପାଇଁ ଚୂଡ଼ାନ୍ତ ନିଷ୍ପତ୍ତି ନେବେ। ଗ୍ରୀଷ୍ମ ପ୍ରବାହ ପରିସ୍ଥିତିକୁ ଦୃଷ୍ଟିରେ ରଖି ଗ୍ରୀଷ୍ମ ଛୁଟି ବଢାଇବାକୁ ସେମାନଙ୍କର ଅଧିକାର ଅଛି।
ସୂଚନାଯୋଗ୍ୟ, ରବିବାର ଓଡିଶାର ୨୨ଟି ସ୍ଥାନରେ ସର୍ବାଧିକ ୪୦ ଡିଗ୍ରୀ ସେଲସିୟସ ରେକର୍ଡ ହୋଇଥିବାବେଳେ ସାତୋଟି ସ୍ଥାନରେ ୪୫ ଡିଗ୍ରୀ ଉପରେ ରହିଛି ତାପମାତ୍ରା।
ଆଗାମୀ ତିନି ଦିନ ପାଇଁ ଦିନର ତାପମାତ୍ରା ସ୍ୱାଭାବିକଠାରୁ ୪-୭ ଡିଗ୍ରୀ ସେଲସିୟସ ହେବାର ସମ୍ଭାବନା ରହିଛି ବୋଲି ଆଇଏମଡି ପୂର୍ବାନୁମାନ କରିଛି। ମନ୍ତ୍ରୀ କହିଛନ୍ତି ଯେ ଛାତ୍ରଛାତ୍ରୀଙ୍କ ସୁରକ୍ଷା ତଥା କଲ୍ୟାଣ ପାଇଁ ସରକାର ପ୍ରତିବଦ୍ଧ ଏବଂ ସେମାନଙ୍କ ସ୍ୱାର୍ଥରେ ନିଷ୍ପତ୍ତି ନେବେ।