ଇଂରାଜୀରେ ବଦଳିବ ସହରର ନାଁ: Cuttack ହେବ ‘Kataka’, Angul ହେବ ‘Anugola’; ଜନସାଧାରଣଙ୍କଠାରୁ ମତାମତ ଲୋଡ଼ିଲେ ରାଜ୍ୟ ସରକାର

ଭୁବନେଶ୍ୱର: ରାଜ୍ୟର ବିଭିନ୍ନ ସହର ଏବଂ ଜିଲ୍ଲାର ଇଂରାଜୀ ବନାନ ବା ସ୍ପେଲିଂ ପରିବର୍ତ୍ତନ କରିବାକୁ ଯାଉଛନ୍ତି ଓଡ଼ିଶା ସରକାର । ଏଣିକି ସହରଗୁଡ଼ିକର ଇଂରାଜୀ ନାମକରଣ ସେମାନଙ୍କର ପ୍ରକୃତ ଓଡ଼ିଆ ଉଚ୍ଚାରଣ ଅନୁଯାୟୀ ହେବ । ଏହି ପ୍ରସ୍ତାବିତ ପରିବର୍ତ୍ତନ ପାଇଁ ରାଜ୍ୟ ସରକାର ବୁଧବାର ଜନପ୍ରତିନିଧି ଏବଂ ସାଧାରଣ ଜନତାଙ୍କଠାରୁ ମତାମତ ଏବଂ ପରାମର୍ଶ ଆହ୍ୱାନ କରିଛନ୍ତି ।

ବିଶିଷ୍ଟ ସାହିତ୍ୟିକା ପ୍ରତିଭା ରାୟଙ୍କ ଅଧ୍ୟକ୍ଷତାରେ ଗଠିତ ଏକ ସ୍ୱତନ୍ତ୍ର କମିଟିର ସୁପାରିଶ କ୍ରମେ ସରକାର ଏହି ପଦକ୍ଷେପ ନେଇଛନ୍ତି । କମିଟିର ପ୍ରସ୍ତାବ ଆଧାରରେ ନାମ ପରିବର୍ତ୍ତନ ଉପରେ ଚୂଡ଼ାନ୍ତ ମୋହର ମାରିବା ପୂର୍ବରୁ ଆସନ୍ତା ଏକ ମାସ ମଧ୍ୟରେ ନିଜର ମତାମତ ଜଣାଇବାକୁ ରାଜ୍ୟବାସୀଙ୍କୁ ସରକାର ଅନୁରୋଧ କରିଛନ୍ତି ।

କେଉଁ ସହରର କ’ଣ ବଦଳିବ ନାଁ?
ପ୍ରସ୍ତାବିତ ପରିବର୍ତ୍ତନ ଅନୁଯାୟୀ, ଇଂରାଜୀରେ କଟକ (Cuttack) ବଦଳରେ ‘Kataka’ ଏବଂ ଅନୁଗୋଳ (Angul) ବଦଳରେ ‘Anugola’ ଲେଖାଯିବ ।
ସେହିପରି:
ବାଲେଶ୍ୱର (Balasore) ବଦଳରେ ‘Baleshwar’

ବରଗଡ଼ (Bargarh) ବଦଳରେ ‘Baragada’

ବଲାଙ୍ଗୀର (Bolangir) ବଦଳରେ ‘Balangir’

ଦେବଗଡ଼ (Deogarh) ବଦଳରେ ‘Debagada’

ବ୍ରହ୍ମପୁର (Berhampur) ବଦଳରେ ‘Brahmapur’

କେନ୍ଦ୍ରାପଡ଼ା (Kendrapara) ବଦଳରେ ‘Kendrapada’

କେନ୍ଦୁଝର (Keonjhar) ବଦଳରେ ‘Kendujhar’

ଖୋର୍ଦ୍ଧା (Khurda) ବଦଳରେ ‘Khordha’

କନ୍ଧମାଳ (Khondmal) ବଦଳରେ ‘Kandhamal’

ଜୟପୁର (Jeypore) ବଦଳରେ ‘Jayapur’

ରେଢ଼ାଖୋଲ (Rairakhol) ବଦଳରେ ‘Redhakhol’

ଆଳି (Aul) ବଦଳରେ ‘Aali’ ଲେଖିବାକୁ ପ୍ରସ୍ତାବ ଦିଆଯାଇଛି ।

ରାଜ୍ୟର ଭାଷାଗତ ମୌଳିକତା, ଐତିହାସିକ ତଥା ସାଂସ୍କୃତିକ ପରିଚୟକୁ ସରକାରୀ ନଥିପତ୍ରରେ ସଠିକ୍ ଭାବରେ ପ୍ରତିଫଳିତ ଓ ସଂରକ୍ଷିତ କରିବା ଏହି ପଦକ୍ଷେପର ମୁଖ୍ୟ ଉଦ୍ଦେଶ୍ୟ ବୋଲି ସରକାରୀ ଅଧିକାରୀମାନେ ପ୍ରକାଶ କରିଛନ୍ତି ।

ସୂଚନାଯୋଗ୍ୟ ଯେ, ଚଳିତ ବର୍ଷ ଫେବୃଆରୀ ମାସରେ ରାଜ୍ୟ ସରକାର ୨୪ଟି ସ୍ଥାନର ଇଂରାଜୀ ନାମର ବନାନ ସଂଶୋଧନ କରିବା ନେଇ ଏକ ସର୍କୁଲାର ଜାରି କରିଥିଲେ । ତେବେ, ନିର୍ଦ୍ଧାରିତ ସମୟସୀମା ମଧ୍ୟରେ ଲୋକଙ୍କଠାରୁ ମିଳିଥିବା ମତାମତକୁ ଭିତ୍ତି କରି ଏହି ନାମ ପରିବର୍ତ୍ତନ ଉପରେ ଚୂଡ଼ାନ୍ତ ନିଷ୍ପତ୍ତି ଗ୍ରହଣ କରାଯିବ ।