ରାଜ୍ୟ ସରକାରଙ୍କ ଐତିହାସିକ ପଦକ୍ଷେପ: ମେଧାବୀଙ୍କୁ ଗ୍ଲୋବାଲ୍ ଏକ୍ସପୋଜର୍ ଦେବାକୁ ଆରମ୍ଭ ହେଲା ‘ଓଭରସିଜ୍ ସ୍କଲାରସିପ୍’ ଯୋଜନା

ଭୁବନେଶ୍ୱର: ରାଜ୍ୟର ଅନୁସୂଚିତ ଜାତି (ଏସସି) ଓ ଅନୁସୂଚିତ ଜନଜାତି (ଏସଟି) ବର୍ଗର ମେଧାବୀ ଛାତ୍ରଛାତ୍ରୀଙ୍କ ଉଜ୍ଜ୍ୱଳ ଭବିଷ୍ୟତ ଗଠନ ଦିଗରେ ଓଡ଼ିଶା ସରକାର ଏକ ବଡ଼ ତଥା ଐତିହାସିକ ପଦକ୍ଷେପ ଗ୍ରହଣ କରିଛନ୍ତି । ଏଣିକି ଅର୍ଥ ଅଭାବରୁ ଏହି ବର୍ଗର କୌଣସି ପିଲାଙ୍କ ବିଦେଶରେ ଉଚ୍ଚଶିକ୍ଷା ଲାଭ କରିବାର ସ୍ୱପ୍ନ ଅଧୁରା ରହିବ ନାହିଁ। ଏଥିପାଇଁ ରାଜ୍ୟ ସରକାରଙ୍କ ପକ୍ଷରୁ ଏକ ନୂତନ ‘ଓଭରସିଜ୍ ସ୍କଲାରସିପ୍’ ବା ବିଦେଶୀ ଛାତ୍ରବୃତ୍ତି ଯୋଜନାର ଶୁଭାରମ୍ଭ କରାଯାଇଛି।

ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହି ନୂତନ ଏବଂ କଲ୍ୟାଣକାରୀ ଯୋଜନାର ଘୋଷଣା କରିଛନ୍ତି । ଏହି ଯୋଜନା ଅଧୀନରେ, ମେଧାବୀ ଏସସି ଓ ଏସଟି ଛାତ୍ରଛାତ୍ରୀମାନେ ବିଶ୍ୱର ନାମୀଦାମୀ ତଥା ପ୍ରମୁଖ ବିଶ୍ୱବିଦ୍ୟାଳୟଗୁଡ଼ିକରେ ସ୍ନାତକୋତ୍ତର (ପିଜି) ଏବଂ ପିଏଚଡି ଭଳି ଉଚ୍ଚଶିକ୍ଷା ଲାଭ କରିବା ପାଇଁ ସମ୍ପୂର୍ଣ୍ଣ ଆର୍ଥିକ ସହାୟତା ପାଇପାରିବେ। ସବୁଠାରୁ ବଡ଼ କଥା ହେଉଛି, ବିଦେଶରେ ପାଠ ପଢ଼ିବା ପାଇଁ ଆବଶ୍ୟକ ଟ୍ୟୁସନ୍ ଫି’, ସେଠାରେ ରହିବା ଓ ଖାଇବା ଖର୍ଚ୍ଚ, ଭିସା ପ୍ରସ୍ତୁତି ଏବଂ ବିମାନ ଯାତ୍ରା ଟିକେଟ୍ ଖର୍ଚ୍ଚ ଭଳି ସମସ୍ତ ବ୍ୟୟଭାର ରାଜ୍ୟ ସରକାର ନିଜେ ବହନ କରିବେ ।

ଏହି ଯୋଜନାକୁ ରାଜ୍ୟ ଅନୁସୂଚିତ ଜାତି, ଜନଜାତି, ସଂଖ୍ୟାଲଘୁ ଓ ପଛୁଆ ବର୍ଗ କଲ୍ୟାଣ ବିଭାଗ ନୋଡାଲ୍ ଏଜେନ୍ସି ଭାବେ ପରିଚାଳନା କରିବ। ବିଭାଗ ପକ୍ଷରୁ ଏକ ସ୍ୱତନ୍ତ୍ର ଏବଂ ସ୍ୱଚ୍ଛ ଚୟନ ପ୍ରକ୍ରିୟା ମାଧ୍ୟମରେ ପ୍ରତିବର୍ଷ କିଛି ନିର୍ଦ୍ଦିଷ୍ଟ ସଂଖ୍ୟକ ମେଧାବୀ ଛାତ୍ରଛାତ୍ରୀଙ୍କୁ ଏହି ଛାତ୍ରବୃତ୍ତି ପାଇଁ ମନୋନୀତ କରାଯିବ। ନିଜର ଶିକ୍ଷା କ୍ଷେତ୍ରରେ ଉତ୍କର୍ଷତା ଏବଂ ଲଗାତାର ସଫଳତା ପ୍ରଦର୍ଶନ କରିଥିବା ପିଲାମାନଙ୍କୁ ଚୟନ ପ୍ରକ୍ରିୟାରେ ଅଧିକ ପ୍ରାଥମିକତା ଦିଆଯିବ ବୋଲି ସୂଚନା ମିଳିଛି ।

ସମାଜର ମୁଖ୍ୟ ସ୍ରୋତରୁ ପଛରେ ପଡ଼ିଥିବା ଦଳିତ ଓ ଆଦିବାସୀ ସମ୍ପ୍ରଦାୟର ଯୁବପିଢ଼ିଙ୍କୁ ବିଶ୍ୱସ୍ତରୀୟ ଶିକ୍ଷା ଏବଂ ନୂତନ ଜ୍ଞାନକୌଶଳ ସହ ଯୋଡ଼ିବା ଏହି ଯୋଜନାର ମୁଖ୍ୟ ଉଦ୍ଦେଶ୍ୟ। ଏହି ପଦକ୍ଷେପ କେବଳ ଆର୍ଥିକ ଅନଗ୍ରସରତା ଦୂର କରିବ ନାହିଁ, ବରଂ ଶିକ୍ଷା କ୍ଷେତ୍ରରେ ଥିବା ସାମାଜିକ ବୈଷମ୍ୟକୁ ମଧ୍ୟ ହ୍ରାସ କରିବ। ରାଜ୍ୟର ଗରିବ ଆଦିବାସୀ ଓ ଦଳିତ ପରିବାରରୁ ଆସୁଥିବା ପିଲାମାନେ ବିଦେଶରୁ ପାଠ ପଢ଼ି ଆସିବା ପରେ ରାଜ୍ୟ ପାଇଁ ଭବିଷ୍ୟତର ନେତୃତ୍ୱ ସୃଷ୍ଟି କରିବାରେ ସହାୟକ ହେବେ ବୋଲି ମୁଖ୍ୟମନ୍ତ୍ରୀ ଦୃଢ଼ୋକ୍ତି ପ୍ରକାଶ କରିଛନ୍ତି ।