ଭୁବନେଶ୍ୱର: ଗଜପତି ଜିଲ୍ଲାର ବହୁ ଚର୍ଚ୍ଚିତ ଏସିଏଫ୍ ସୌମ୍ୟରଞ୍ଜନ ମହାପାତ୍ରଙ୍କ ରହସ୍ୟମୟ ମୃତ୍ୟୁ ମାମଲାର ସାନି ତଦନ୍ତ ଦାବି କରିଛନ୍ତି ଓଡ଼ିଶା ବିଧାୟକ ପଦ୍ମଲୋଚନ ପଣ୍ଡା।
ବିଧାନସଭାରେ ଶୂନ୍ୟ କାଳରେ ଏହି ପ୍ରସଙ୍ଗ ଉଠାଇ ସିମୁଳିଆର ବିଜେପି ବିଧାୟକ କହିଛନ୍ତି ଯେ ସୌମ୍ୟରଞ୍ଜନଙ୍କ ପରିବାରକୁ ନ୍ୟାୟ ଦେବା ପାଇଁ ଅଧିକାରୀମାନେ ପୁଣି ଥରେ ମାମଲାର ପୁଙ୍ଖାନୁପୁଙ୍ଖ ତଦନ୍ତ କରିବା ଉଚିତ।
ମାମଲାରେ ତତ୍କାଳୀନ ଜଙ୍ଗଲ ମନ୍ତ୍ରୀ ଏବଂ ବିଭାଗୀୟ ବନ ଅଧିକାରୀ (ଡିଏଫଓ)ଙ୍କ ଭୂମିକା ଉପରେ ପ୍ରଶ୍ନ ଉଠାଇ ସେ ସାନି ତଦନ୍ତ ପାଇଁ ପଦକ୍ଷେପ ନେବାକୁ ଦାବି କରିଥିଲେ।
ଉଲ୍ଲେଖଯୋଗ୍ୟ, ସୌମ୍ୟରଞ୍ଜନଙ୍କୁ ଜୁଲାଇ ୧୨, ୨୦୨୧ରେ ପାରଳାଖେମୁଣ୍ଡିସ୍ଥିତ ତାଙ୍କ ବାସଭବନରେ ଅର୍ଦ୍ଧଦଗ୍ଧ ଅବସ୍ଥାରେ ଉଦ୍ଧାର କରାଯାଇଥିଲା। ଯାହାର ଦିନକ ପରେ କଟକର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା। ଯାହାକୁ ନେଇ ତାଙ୍କ ପରିବାର ପୂର୍ବତନ ଗଜପତି ଡିଏଫଓ ସଂଗ୍ରାମ ବେହେରା, ସୌମ୍ୟରଞ୍ଜନଙ୍କ ପତ୍ନୀ ବିଦ୍ୟା ଭାରତୀ ଏବଂ ରୋଷେୟା ମନ୍ମଥ କୁମ୍ଭାଙ୍କ ବିରୁଦ୍ଧରେ ହତ୍ଯା ଅଭିଯୋଗ କରିଥିଲେ। ଏହି ମାମଲାରେ ରାଜ୍ୟ ସରକାର ଅଗଷ୍ଟ ୧୪, ୨୦୨୧ରେ କ୍ରାଇମବ୍ରାଞ୍ଚକୁ ତଦନ୍ତ ଦାୟିତ୍ୱ ହସ୍ତାନ୍ତର କରିଥିଲେ।
ଅପରପକ୍ଷରେ ଅକ୍ଟୋବର ୮, ୨୦୨୧ରେ କ୍ରାଇମବ୍ରାଞ୍ଚ ସଂଗ୍ରାମ ବେହେରା ଏବଂ ରୋଷେୟା ମନ୍ମଥଙ୍କୁ କ୍ଲିନ୍ ଚିଟ୍ ଦେଇଥିଲା। କିନ୍ତୁ ବିଦ୍ୟା ଭାରତୀଙ୍କୁ ଆଇପିସିର ଧାରା ୩୦୪-ଏ ଏବଂ ୨୮୫ ଧାରା ଅନୁଯାୟୀ ବାନ୍ଧିଥିଲା। ପରବର୍ତ୍ତୀ ସମୟରେ ଏହାକୁ ଦୁର୍ଘଟଣା ଜନିତ ମୃତ୍ୟୁ ବୋଲି କହିବା ସହ ବିଦ୍ୟା ଭାରତୀ ଏବଂ ସଂଗ୍ରାମ ବେହେରାଙ୍କ ମଧ୍ୟରେ ସେଭଳି କୌଣସି ସମ୍ପର୍କ ନଥିବା ସ୍ପଷ୍ଟ କରିଥିଲା କ୍ରାଇମବ୍ରାଞ୍ଚ।
Comments are closed.