ଭୁବନେଶ୍ୱର: ଓଡ଼ିଶାରେ ଆଇନ୍ ଶୃଙ୍ଖଳା ଭୁଶୁଡ଼ି ପଡ଼ିଛି । ହାଇକୋର୍ଟ ହସ୍ତକ୍ଷେପ ନକଲେ ପୋଲିସ ଏତଲା ରଖୁନି । ରାଜ୍ୟରେ ପୋଲିସ ବିଭାଗ ବଲଗାମ ହୋଇ ପଡ଼ିଥିବା ବେଳେ ମୁଖ୍ୟମନ୍ତ୍ରୀ ବେସାହାରା ହୋଇ ପଡ଼ିଛନ୍ତି ବୋଲି ପ୍ରେସମିଟରେ କହିଛନ୍ତି ବିଜେପି ରାଜ୍ୟ ମୁଖପାତ୍ର ସୋନାଲି ସାହୁ । ସେ ଆହୁରି କହିଛନ୍ତି, ପ୍ରତ୍ୟେକ ଦିନ ହତ୍ୟା, ଲୁଟ୍ତରାଜ୍, ଦୁଷ୍କର୍ମ ଆଦି ଘଟୁଛି । ଗୃହରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରା ପୋଲିସର ଅସଲମୁଖା ଖୋଲିବାର ଦିନ କେଇଟା ଭିତରେ ଦିନ ଦ୍ୱିପ୍ରହରରେ ଦାୟିତ୍ୱରେ ଥିବା ପୋଲିସ ରାଜ୍ୟର ଜଣେ କ୍ୟାବିନେଟ୍ ମନ୍ତ୍ରୀଙ୍କୁ ହତ୍ୟା କରିବା ନିଶ୍ଚିତ ଚିନ୍ତାଜନକ ବିଷୟ ।
ବିଜେଡି ଇଙ୍ଗିତରେ ଓଡିଶା ପୋଲିସ କାର୍ଯ୍ୟ କରୁଥିବାରୁ ରାଜ୍ୟର ପୋଲିସ ଉପରେ ମହିଳା, କୃଷକ, ଦଳିତ, ବଂଚିତ ଆଦିବାସୀ ଆଉ ବିଶ୍ୱାସ କରୁନାହାନ୍ତି । କାହା ଇଙ୍ଗିତରେ ଓଡ଼ିଶା ପୋଲିସ କାର୍ଯ୍ୟ କରୁଛି ତାହା ଓଡ଼ିଶାବାସୀଙ୍କୁ ସ୍ପଷ୍ଟ ଜଣା ବୋଲି କହିଛନ୍ତି ସୋନାଲି । ପୋଲିସ ସାଧାରଣ ଲୋକଙ୍କ ମାମଲା ରଖୁନାହିଁ । ଏବେ ରାଜ୍ୟରେ ଏକ ନୂଆ ଓ ବିରଳ କଥା ଦେଖିବାକୁ ମିଳୁଛି । ଯେପର୍ଯ୍ୟନ୍ତ କୋର୍ଟ ନିର୍ଦ୍ଦେଶ ଦେଉନାହାନ୍ତି ସେପର୍ଯ୍ୟନ୍ତ ପୋଲିସ ଏଫଆଇଆର ରଖୁନାହିଁ ନାହିଁ ବୋଲି ରାଜ୍ୟ ମୁଖପାତ୍ର ସୋନାଲି ସାହୁ କହିଛନ୍ତି ।
ରାଜ୍ୟ କାର୍ଯ୍ୟାଳୟରେ ସାମ୍ବାଦିକ ସମ୍ମିଳନୀ କରି ଶ୍ରୀମତୀ ସାହୁ କହିଛନ୍ତି ଯେ, ମାହାଙ୍ଗା ମର୍ଡର କେସ୍ରେ ସଂପୃକ୍ତର ସନ୍ଦେହ କରାଯାଉଥିବା ସେତେବେଳର ମନ୍ତ୍ରୀଙ୍କ ନାଁରେ ଏଫଆଇଆରକୁ ପୋଲିସ ରଖୁ ନଥିଲା । କୁଳମଣି ବରାଳଙ୍କର ପରିବାରର ଅଭିଯୋଗ କ୍ରମେ ଅଗଷ୍ଟ ୨୫, ୨୦୨୧ରେ ସାଲେପୁର କୋର୍ଟ ପୋଲିସକୁ ପୁନଃତଦନ୍ତ କରିବାକୁ ନିର୍ଦ୍ଦେଶ ଦେଇଥିଲେ । ଖାଲି ସେତିକି ନୁହେଁ କୋର୍ଟ ପ୍ରତାପ ଜେନାଙ୍କ କଲ୍ ଡିଟେଲ୍ସ ମାଗିଥିଲେ ମଧ୍ୟ ପୋଲିସ ଦେଇନଥିଲା ।
ସେହିପରି ଆନନ୍ଦ ଟୋପୋଙ୍କ ମୃତ୍ୟୁ ନେଇ ଗତ ଡିସେମ୍ବର ୬ତାରିଖରେ ଓଡ଼ିଶାର ମାନ୍ୟବର ହାଇକୋର୍ଟ ମାମଲା ରୁଜୁ ନକରିବା ନେଇ ପୋଲିସ ଉପରେ କଡା ଟିପ୍ପଣୀ ଦେଇଛନ୍ତି । ଖାଲି ସେତିକି ନୁହେଁ ଜଣେ ଝିଅ ଶାସକ ଦଳର ବିଧାୟକଙ୍କ ଦ୍ୱାରା ଯୌନ ନିର୍ଯ୍ୟାତନା ଶିକାର ହୋଇ ମାମଲା ରୁଜୁ କରିଥିଲେ ମଧ୍ୟ ପୋଲିସ ରଖିନଥିଲା । ଶେଷରେ ମାନ୍ୟବର ହାଇକୋର୍ଟ ଗତ ୩ତାରିଖରେ ଶାସକ ଦଳର ବିଧାୟକଙ୍କ ବିରୋଧରେ ମାମଲା ରୁଜୁ କରିବାକୁ ନିର୍ଦ୍ଦେଶ ଦେଇଛନ୍ତି ।
କିଛିଦିନ ତଳେ ଶାସକ ଦଳର ପ୍ରଭାବଶାଳୀ ନେତା ବଦ୍ରି ନାରାୟଣ ପାତ୍ରଙ୍କ (ଘସିପୁରା ବିଧାୟକ) ପୁଅ ନିର୍ଦ୍ଦେଶ କ୍ରମେ ରାଜନୈତିକ ଉଦ୍ଦେଶ୍ୟ ରଖି ଏକ ଦଳିତ ପିଲାକୁ ଗୁଳି କରାଗଲା । ଗୁଳି କରିଥିବା ପିଲା ପୋଲିସ ଆଗରେ ବଦ୍ରି ନାରାୟଣ ପାତ୍ରଙ୍କ ପୁଅର ନିର୍ଦ୍ଦେଶ କ୍ରମେ ଗୁଳି କରିଥିବା କଥା ସ୍ୱୀକାର କଲେ ମଧ୍ୟ ପୋଲିସ ଗିରଫ କରିବାତ ଦୂରର କଥା ତାଙ୍କୁ ତଦନ୍ତ ପରିସରଭୁକ୍ତ କରିଲା ନାହିଁ ।
କେନ୍ଦୁଝର ଜିଲ୍ଲାର ୩ନଂ ଜୋନ୍ର ଜିଲ୍ଲା ପରିଷଦ ସଭ୍ୟା ଶ୍ରୀମତୀ ଅସୀମା ମିଶ୍ରଙ୍କୁ ଆନନ୍ଦପୁର ପଂଚାୟତ ସମିତି ବୈଠକରେ ବିଭିନ୍ନ ଉନ୍ନୟନ ମୂଳକ କାର୍ଯ୍ୟର ସମୀକ୍ଷା ଚାଲିଥିବା ସମୟରେ ଆନନ୍ଦପୁର ବିଧାୟକ ଭାଗୀରଥି ସେଠୀ ଜିଲ୍ଲା ପରିଷଦ ସଭ୍ୟା ଅସୀମା ମିଶ୍ରଙ୍କୁ ଅତ୍ୟନ୍ତ ଖରାପ ଶବ୍ଦରେ ଗାଳିଗୁଲଜ କରିବା ସହିତ ତାଙ୍କୁ ମାରିଦେବାକୁ ଧମକ ଦେଲେ । ଶ୍ରୀମତୀ ମିଶ୍ର ଏନେଇ ମାମଲା ରୁଜୁ କରିବାକୁ ଆନନ୍ଦପୁର ଥାନାକୁ ଯାଇଥିଲେ । କିନ୍ତୁ ଶାସକ ଦଳର ବିଧାୟକଙ୍କ ବିରୋଧରେ ଏଫଆଇଆର ରଖି ନଥିଲା ପୋଲିସ । ତାପରେ ଶ୍ରୀମତୀ ମିଶ୍ର ଏସ୍ପି, ଡିଜି, ମହିଳା ଆୟୋଗ, ମାନବାଧିକାର ଆୟୋଗଙ୍କ ଦ୍ୱାରସ୍ଥ ହୋଇ ନିରାଶ ହେବା ପରେ ଶେଷରେ ଉଚ୍ଚ ନ୍ୟାୟଳୟର ଦ୍ୱାରସ୍ଥ ହୋଇଥିଲେ ।
ଗତ ଅଗଷ୍ଟ ୩୦ରେ ମାମଲା ରୁଜୁ କରାଯାଇଥିଲା କିନ୍ତୁ ନଭେମ୍ବର ୧୦ତାରିଖରେ ଉଚ୍ଚ ନ୍ୟାୟଳୟଙ୍କ ନିର୍ଦ୍ଦେଶ କ୍ରମେ ପୋଲିସ ଏଫଆଇଆର ରଖିଥିଲେ । ହାଇକୋର୍ଟଙ୍କ ନିର୍ଦ୍ଦେଶ ପରେ ପୋଲିସକୁ କେବଳ ଏଫଆଇଆର ରଖିବାକୁ ୫ ରୁ ୬ମାସ ଲାଗି ଯାଉଛି ତେବେ ତଦନ୍ତ ପାଇଁ କେତେ ବର୍ଷ ଲାଗିବ । ଏଥିରୁ ସ୍ପଷ୍ଟ ଜଣାପଡୁଛି ରାଜ୍ୟରେ ଆଇନଶୃଙ୍ଖଳାର ଗତି କୁଆଡେ ?
ଆଗରୁ ସାଧାରଣ ଜନତାଙ୍କୁ ପୋଲିସ ସହଯୋଗ କରୁନଥିଲା । ଏବେ ଜାଣିଶୁଣି ବିରୋଧୀ ଦଳର ଜନପ୍ରତିନିଧିଙ୍କୁ ଅସହଯୋଗ କରିବା ନିନ୍ଦନୀୟ । ଏ ସମସ୍ତ ଘଟଣାରୁ ଲାଗୁଛି ଗୃହ ବିଭାଗ ବେଲଗାମ ହୋଇଛି । ତାହାର କାରଣ ହେଉଛି ଏବେ ରାଜ୍ୟର ମୁଖ୍ୟମନ୍ତ୍ରୀ ବେସାହାରା ହୋଇ ପଡିଛନ୍ତି । ଏପରି ସ୍ଥିତିରେ ଓଡ଼ିଶା ଶାସନ ଚାଲିବ କେମିତି ବୋଲି ରାଜ୍ୟ ସରକାରଙ୍କୁ ଶ୍ରୀମୀତୀ ସାହୁ ପ୍ରଶ୍ନ କରିଛନ୍ତି । ଏହି ସାମ୍ବାଦିକ ସମ୍ମିଳନୀରେ କେନ୍ଦୁଝର ଜିଲ୍ଲା ପରିଷଦ ସଭ୍ୟା ଅସୀମା ମିଶ୍ର ପ୍ରମୁଖ ଉପସ୍ଥିତ ଥିଲେ ।