ନୂଆଦିଲ୍ଲୀ: ଚଳିତ ବର୍ଷ ମୌସୁମୀ ଋତୁରେ ସ୍ୱାଭାବିକଠାରୁ ଅଧିକ ବର୍ଷା ହେବ। ଭାରତୀୟ ପାଣିପାଗ ବିଭାଗ (ଆଇଏମ୍ଡି)ର ମହାନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ର ମୌସୁମୀ ପୂର୍ବାନୁମାନ ବାବଦରେ ଏପରି କିଛି କହିଛନ୍ତି। ଆଇଏମ୍ଡି ମାନଦଣ୍ଡ ଅନୁଯାୟୀ, ୮୭ ସେମି ବର୍ଷାକୁ ସ୍ୱାଭାବିକ ଗଣାଯାଏ, ଏବଂ ଏହାର ୧୦୫% ବା ତଦୁର୍ଦ୍ଧ୍ୱ ବର୍ଷାକୁ ଅଧିକ ବର୍ଷା ଭାବେ ବିବେଚନା କରାଯାଏ।
ଆଇଏମଡି ନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ର କହିଛନ୍ତି, ଜୁନ୍ରୁ ସେପ୍ଟେମ୍ବର ପର୍ଯ୍ୟନ୍ତ ଚାଲୁଥିବା ଦକ୍ଷିଣ-ପଶ୍ଚିମ ମୌସୁମୀ ଦେଶର ଅଧିକାଂଶ ଅଞ୍ଚଳରେ ସ୍ୱାଭାବିକଠାରୁ ଅଧିକ ବର୍ଷା ଆଣିବ। ତେବେ ଉତ୍ତର-ପୂର୍ବ ଭାରତ, ତାମିଲନାଡୁ ଓ ଲଦାଖରେ ସ୍ୱାଭାବିକଠାରୁ କମ୍ ବର୍ଷା ହେବାର ସମ୍ଭାବନା ରହିଛି।
ଏଲ୍ ନିନୋର ପ୍ରଭାବ ସମ୍ପର୍କରେ ପଚରାଯାଇଥିବା ଏକ ପ୍ରଶ୍ନର ଉତ୍ତରରେ ଆଇଏମ୍ଡି ମୁଖ୍ୟ ସ୍ପଷ୍ଟ କରିଛନ୍ତି ଯେ ବର୍ତ୍ତମାନ ଭାରତରେ ଏପରି କୌଣସି ପରିସ୍ଥିତି ନାହିଁ। ସେ କହିଛନ୍ତି, “ଏଯାଏ ପ୍ରାକୃତିକ ବାୟୁମଣ୍ଡଳୀୟ ଅବସ୍ଥା ବଜାୟ ରହିଛି। ଏଲ୍ ନିନୋର କୌଣସି ଲକ୍ଷଣ ଦେଖାଯାଇ ନାହିଁ। ସେପ୍ଟେମ୍ବରରେ ମୌସୁମୀ ଶେଷ ହେବା ପର୍ଯ୍ୟନ୍ତ ଏହା ଦେଶକୁ ପ୍ରଭାବିତ କରିବ ନାହିଁ।”
ସେ ଆହୁରି କହିଛନ୍ତି, “ଡିସେମ୍ବରରୁ ଫେବୃଆରୀ ମଧ୍ୟରେ ଉତ୍ତର ଗୋଲାର୍ଦ୍ଧ ଓ ୟୁରେସିଆରେ ଶୀତକାଳୀନ ଏବଂ ବସନ୍ତ ତୁଷାରପାତର ପରିମାଣ ଭାରତୀୟ ମୌସୁମୀ ସହ ବିପରୀତ ସମ୍ପର୍କ ରଖେ। କମ୍ ତୁଷାରପାତ ସାଧାରଣତଃ ଭଲ ମୌସୁମୀ ବର୍ଷା ଆଣେ। ଏହି ବର୍ଷ ବସନ୍ତରେ ତୁଷାରପାତ ସ୍ୱାଭାବିକଠାରୁ କମ୍ ହୋଇଥିଲା, ଯାହା ଭାରତ ପାଇଁ ଅନୁକୂଳ ମୌସୁମୀ ବୋଲି ବିଚାର କରାଯାଏ।”
Comments are closed.