ନୂଆଦିଲ୍ଲୀ: ସ୍ଥାନୀୟ ଲାଜପତ ଅଡିଟରିୟମରେ ଓଡିଶୀ ଦର୍ଶନ ନୃତ୍ୟ ଏକାଡେମୀ ଦ୍ୱାରା ଦ୍ୱିତୀୟ ନୃତ୍ୟ ବିଳାସ ଉତ୍ସବ ଆୟୋଜିତ ହୋଇଯାଇଛି । ଓଡିଶୀ ନୃତ୍ୟ କଳା ଜଗତର ପ୍ରତିଷ୍ଠିତ ଗୁରୁ ସୁଦର୍ଶନ ସାହୁ ଏହି ଏକାଡେମୀ ୨୦୧୯ରେ ସ୍ଥାପିତ କରିଥିଲେ । ଦିଲ୍ଲୀ ଏନସିଆରରେ ସେ ଓଡିଶୀ ନୃତ୍ୟର ପ୍ରଚାର ଓ ପ୍ରସାରରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି । ତାଙ୍କର ଅନେକ ଶିଷ୍ୟ ଦେଶ ବିଦେଶରେ ନାମ କମାଇଛନ୍ତି । ନୃତ୍ୟ ବିଳାସ କାର୍ଯ୍ୟକ୍ରମରେ ଆଇଏମଡିର ଡାଇରେକ୍ଟର ଜେନେରାଲ ମୃତ୍ୟୁଞ୍ଜୟ ମହାପାତ୍ର, ଦେବେନ୍ଦ୍ର ମାଝି, ଏସକେ ଜେନା, କସ୍ତୁରୀ ପଟ୍ଟନାୟକ, ଶାରୋନ ଲୋନ, କନକ ସୁଧାକର ଓ ଡିଡି ଭାରତୀର ନିର୍ଦ୍ଦେଶକ ନୀରଜ ଗୁପ୍ତା ପ୍ରମୁଖ ସମ୍ମାନୀତ ଅତିଥି ଭାବେ ଯୋଗ ଦେଇଥିଲେ ।
ଏହି ଅବସରରେ ସୁଦର୍ଶନ ସାହୁଙ୍କ ଶିଷ୍ୟମାନଙ୍କ ଦ୍ୱାରା ଆୟୋଜିତ ନୃତ୍ୟ ପରିବେଷଣ ବେଶ ଉଚ୍ଚକୋଟୀର ହୋଇଥିଲା । ଲିପ୍ସା ଶତପଥୀ, ପ୍ରିୟଙ୍କା ଦାସ, ସିମ୍ରନ ଜମାନ, ପ୍ରିନ୍ସେସ ପାଣିଗ୍ରାହୀ ଓ ପ୍ରଜ୍ଞା ଘୋଷ ମଂଚ ପରିଚାଳନା କରିଥିଲେ ।
Comments are closed.