ନୂଆଦିଲ୍ଲୀ: ଭାରତର ସାମରିକ କାର୍ଯ୍ୟାନୁଷ୍ଠାନ ‘ଅପରେସନ୍ ସିନ୍ଦୁର’ ପାକିସ୍ତାନର କେବଳ ଆତଙ୍କବାଦୀ କ୍ୟାମ୍ପ ନୁହେଁ ବରଂ ସୈନ୍ୟବାହିନୀଙ୍କୁ ବଡ଼ କ୍ଷତି ପହଁଚାଇଛି । ମେ ୭ରେ ଆରମ୍ଭ ହୋଇଥିବା ଏହି ଅଭିଯାନ ପାକିସ୍ତାନ ବାୟୁସେନାର ପାଖାପାଖି ୨୦ ପ୍ରତିଶତ ସମ୍ପତ୍ତି ଧ୍ୱଂସ କରିଛି ଏବଂ ୫୦ରୁ ଅଧିକ ପାକ୍ ଯବାନ ପ୍ରାଣ ହରାଇଛନ୍ତି। ଏହି ଅଭିଯାନ ପାକିସ୍ତାନର ସୈନ୍ୟବାହିନୀକୁ ଏକ ଗଭୀର କ୍ଷତି ପହଞ୍ଚାଇଛି । ଯାହା ଅପରେସନ ସିନ୍ଦୂରର ଆକ୍ରମଣାତ୍ମକ କ୍ଷମତା କେତେ ପ୍ରଭାବୀ ଥିଲା ଜଣାପଡ଼ିଛି ।
ଭାରତୀୟ ସୈନ୍ୟବାହିନୀ ପାକିସ୍ତାନର ରାଓ୍ଵାଲପିଣ୍ଡିର ନୂର ଖାନ, ସିନ୍ଧର ସୁକ୍କୁର ଓ ବୋଲାରୀ, ପଞ୍ଜାବର ରହିମ ଯାର ଖାନ, ଏବଂ ସରଗୋଧାର ମୁଶାଫ ଭଳି ଗୁରୁତ୍ୱପୂର୍ଣ୍ଣ ଆକାଶ ସେନା ଘାଟିଗୁଡ଼ିକୁ ଟାର୍ଗେଟ କରିଥିଲା। ହାଇ-ରେଜୋଲ୍ୟୁସନ୍ ସାଟେଲାଇଟ୍ ଚିତ୍ରରୁ ଜଣାପଡ଼ିଛି ଯେ, ଏହି ଆକ୍ରମଣରେ ରନୱେ, ବିମାନ ହ୍ୟାଙ୍ଗର, ଏବଂ ଅନ୍ୟାନ୍ୟ ସେନାର ସମ୍ପତ୍ତି ବ୍ୟାପକ ଭାବେ କ୍ଷତିଗ୍ରସ୍ତ ହୋଇଛି। ଉଦାହରଣ ସ୍ୱରୂପ, ରହିମ ଯାର ଖାନ ଘାଟିରେ ଏକ ୧୯ ଫୁଟ ଓସାରର ଗାତ ସୃଷ୍ଟି ହୋଇଛି, ଯାହା ଘାଟିକୁ ଅଚଳ କରିଦେଇଛି। ସେହିପରି, ବୋଲାରୀ ଘାଟିରେ ସ୍କ୍ୱାଡ୍ରନ ଲିଡର ଉସମାନ ଯୁସୁଫଙ୍କ ସମେତ ଅନେକ ସୈନିକ ନିହତ ହୋଇଛନ୍ତି, ଏବଂ ପାକିସ୍ତାନର ଅତ୍ୟାଧୁନିକ JF-17 ଯୁଦ୍ଧ ବିମାନ ମଧ୍ୟ ଧ୍ୱଂସ ହୋଇଛି।
ଏହି ଅଭିଯାନ କେବଳ ସୈନ୍ୟ ଘାଟି ଉପରେ ସୀମିତ ନଥିଲା। ଭାରତ ପାକିସ୍ତାନ ଓ ପାକିସ୍ତାନ ଅଧିକୃତ କଶ୍ମୀରରେ ଥିବା ଆତଙ୍କବାଦୀ ଶିବିରଗୁଡ଼ିକୁ ମଧ୍ୟ ନଷ୍ଟ କରିଛି। ବାହାୱାଲପୁରରେ ଜୈଶ-ଏ-ମହମ୍ମଦର ମୁଖ୍ୟାଳୟ ଏବଂ ମୁରିଦ୍କେରେ ଲସ୍କର-ଏ-ତୋଇବାର ତାଲିମ କେନ୍ଦ୍ର ଉପରେ ଆକ୍ରମଣ କରାଯାଇଛି। ଏହି ଶିବିରଗୁଡ଼ିକ ଭାରତ ବିରୋଧୀ ଆତଙ୍କବାଦୀ କାର୍ଯ୍ୟକଳାପରେ ଜଡ଼ିତ ଥିଲା, ଯେଉଁଥିରେ ୧୯୯୯ ମସିହାରେ IC-814 ବିମାନ ଅପହରଣ ଏବଂ ୨୦୧୯ ମସିହାରେ ପୁଲୱାମା ଆତଙ୍କବାଦୀ ହମଲା ସାମିଲ ରହିଛି। ଭାରତୀୟ ସେନାର ଯୁଗ୍ମ ନିର୍ଦ୍ଦେଶକ ଲେଫ୍ଟନାଣ୍ଟ ଜେନେରାଲ ରାଜୀବ ଘାଇ କହିଛନ୍ତି ଯେ, ଏହି ଆକ୍ରମଣରେ ୧୦୦ରୁ ଅଧିକ ଆତଙ୍କବାଦୀ ନିହତ ହୋଇଛନ୍ତି, ଯେଉଁମାନେ ଏହି ବଡ଼ ଆତଙ୍କବାଦୀ ଘଟଣାରେ ସମ୍ପୃକ୍ତ ଥିଲେ।
ପାକିସ୍ତାନ ଦାବି କରିଛି ଯେ, ଭାରତର ଆକ୍ରମଣରେ ୪୦ ଜଣ ନାଗରିକ, ଯେଉଁଥିରେ ମହିଳା ଓ ଶିଶୁ ମଧ୍ୟ ସାମିଲ, ପ୍ରାଣ ହରାଇଛନ୍ତି। କିନ୍ତୁ ଭାରତ ଏହାକୁ ଖଣ୍ଡନ କରି କହିଛି ଯେ, ଏହାର ଆକ୍ରମଣ କେବଳ ଆତଙ୍କବାଦୀ ଓ ସୈନ୍ୟ ସମ୍ପତ୍ତିକୁ ଟାର୍ଗେଟ କରିଥିଲା, ଏବଂ ନାଗରିକ କ୍ଷୟକ୍ଷତି ଏଡ଼ାଇବା ପାଇଁ ସମସ୍ତ ସତର୍କତା ଗ୍ରହଣ କରାଯାଇଥିଲା। ଭାରତୀୟ ଅଧିକାରୀମାନେ କହିଛନ୍ତି ଯେ, ଏହି ଅଭିଯାନ ଏପ୍ରିଲ ୨୨ରେ ପାହଲଗାମରେ ହୋଇଥିବା ଆତଙ୍କବାଦୀ ହମଲାର ଜବାବ, ଯେଉଁଥିରେ ୨୬ ଜଣ ନିରୀହ ପର୍ଯ୍ୟଟକ ହତ୍ୟାର ଶିକାର ହୋଇଥିଲେ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପଞ୍ଜାବର ଆଦମପୁର ବାୟୁସେନା ଘାଟିରୁ ଦେଶକୁ ସମ୍ବୋଧିତ କରି କହିଛନ୍ତି, “ଅପରେସନ୍ ସିନ୍ଦୁର ଭାରତର ଆତଙ୍କବାଦ ବିରୋଧୀ ନୀତିର ନୂଆ ଅଧ୍ୟାୟ। ଆମେ ଆତଙ୍କବାଦୀଙ୍କୁ କୌଣସି ସୁରକ୍ଷିତ ଆଶ୍ରୟ ଦେବୁ ନାହିଁ। ଯେଉଁମାନେ ଭାରତର ଶାନ୍ତି ଭଙ୍ଗ କରିବାକୁ ଚେଷ୍ଟା କରିବେ, ସେମାନଙ୍କୁ ଘରେ ପଶି ଜବାବ ଦିଆଯିବ।” ସେ ଆହୁରି ମଧ୍ୟ କହିଛନ୍ତି ଯେ, ଏହି ଅଭିଯାନ ଭାରତର ସୁରକ୍ଷା ଓ ସମ୍ମାନର ପ୍ରତୀକ, ଏବଂ ଏହା ଆଗାମୀ ଦିନରେ ମଧ୍ୟ ଜାରି ରହିବ।
ମେ ୧୦ରେ ଉଭୟ ଦେଶ ମଧ୍ୟରେ ଏକ ଅସ୍ତ୍ରବିରତି ସମ୍ମତି ହୋଇଥିଲା, କିନ୍ତୁ ପାକିସ୍ତାନ ଏହାକୁ ଉଲ୍ଲଙ୍ଘନ କରି ପୁଣି ଥରେ ସୀମାରେ ଗୁଳିଚାଳନା ଆରମ୍ଭ କରିଛି। ଭାରତ ଆତଙ୍କବାଦ ଓ ଆକ୍ରମଣାତ୍ମକ କାର୍ଯ୍ୟକୁ କୌଣସି ମାତ୍ରାରେ ବରଦାସ୍ତ କରିବ ନାହିଁ ବୋଲି ସ୍ପଷ୍ଟ କରିଛି ।
Comments are closed.