‘ଅପରେସନ ସିନ୍ଦୁର’: ସାମ୍ନାକୁ ଆସିଲା ପହଲଗାମରେ ପ୍ରାଣ ହରାଇଥିବା ପରିବାର ସଦସ୍ୟଙ୍କ ପ୍ରତିକ୍ରିୟା

ନୂଆଦିଲ୍ଲୀ/ଭୁବନେଶ୍ବର: ପହଲଗାମରେ ଆତଙ୍କବାଦୀ ଆକ୍ରମଣର ୧୪ ଦିନ ପରେ ପ୍ରତିଶୋଧ ନେଇଛି ଭାରତ । ପାକିସ୍ତାନ ଆତଙ୍କବାଦୀଙ୍କ ବିରୋଧରେ ‘ଅପରେସନ ସିନ୍ଦୂର’ ସଫଳ ହୋଇଛି । ପାକିସ୍ତାନରେ ଆତଙ୍କବାଦ ବିରୋଧରେ ଏହି ଜବାବୀ କାର୍ଯ୍ୟାନୁଷ୍ଠାନ ପରେ ସାରା ବିଶ୍ବକୁ ଅବଗତ କରିଛି ଭାରତ । ଏହି ଏୟାର ଷ୍ଟ୍ରାଇକ ପରେ ପହଲଗାମରେ ଆତଙ୍କବାଦୀ ଆକ୍ରମଣରେ ପ୍ରାଣ ହରାଇଥିବା ନିରିହ ଭାରତୀୟଙ୍କ ପରିବାର ବର୍ଗଙ୍କର ପ୍ରତିକ୍ରିୟା ସାମ୍ନାକୁ ଆସିଛି ।

ପହଲାଗାମ ଆତଙ୍କ ହମଲାରେ ମୃତ୍ୟୁ ବରଣ କରିଥିବା ପ୍ରଶାନ୍ତ ଶତପଥୀଙ୍କ ସ୍ତ୍ରୀ ପ୍ରିୟଦର୍ଶିନୀ କହିଛନ୍ତି ଯେ, ‘ମୋସିନ୍ଦୂରର ବଦଲା ନେଇଛନ୍ତି ମୋଦି ସରକାର । ସରକାର ଯାହା କହିଥିଲେ, ତାହା କରିଛନ୍ତି । ଏଥିପାଇଁ ମୁଁ କେନ୍ଦ୍ର ସରକାରଙ୍କୁ ବହୁତ ଧନ୍ୟବାଦ ଜଣାଉଛି।’ ସେ ଆହୁରି କହିଛନ୍ତି ଯେ, ଆତଙ୍କୀଙ୍କୁ ଏମିତି ଆକ୍ରମଣ କରନ୍ତୁ ଯେ, ଆଉଥରେ ଆକ୍ରମଣ କରିବାକୁ ପାଞ୍ଚ ଥର ଭାବିବେ ।

ଅନ୍ୟପଟେ, ପହଲଗାମ ଆତଙ୍କବାଦୀ ଆକ୍ରମଣରେ ପ୍ରାଣ ହରାଇଥିବା ଶୁଭମ ଦ୍ୱିବେଦୀଙ୍କ ପତ୍ନୀଙ୍କ ପକ୍ଷରୁ ଏକ ବୟାନ ଆସିଛି । ସେ କହିଛନ୍ତି, “ମୋ ସ୍ୱାମୀଙ୍କ ମୃତ୍ୟୁର ପ୍ରତିଶୋଧ ନେବା ପାଇଁ ମୁଁ ପ୍ରଧାନମନ୍ତ୍ରୀ ମୋଦୀଙ୍କୁ ଧନ୍ୟବାଦ ଜଣାଉଛି । ମୋର ସମଗ୍ର ପରିବାର ତାଙ୍କ ଉପରେ ବିଶ୍ୱାସ ରଖିଥିଲା ​​ଏବଂ ସେ (ପାକିସ୍ତାନକୁ) ଯେଉଁଭଳି ପ୍ରତିକ୍ରିୟା ଦେଇଥିଲେ, ତାହା ଆମର ବିଶ୍ୱାସକୁ ଅକ୍ଷୁର୍ଣ୍ଣ ରଖିଛି । ଏହା ମୋ ସ୍ୱାମୀଙ୍କ ପ୍ରତି ପ୍ରକୃତ ଶ୍ରଦ୍ଧାଞ୍ଜଳି । ଆଜି ମୋ ସ୍ୱାମୀ ଯେଉଁଠାରେ ଥାଆନ୍ତୁ, ସେ ଶାନ୍ତି ପାଇବେ।” ସେ କହିଥିଲେ, “ଭାରତ ସିନ୍ଦୂରର ଧ୍ୱଂସର ପ୍ରତିଶୋଧ ନେଇଛି । ଅପରେସନ୍ ସିନ୍ଦୂରର ନାମ ଦେଖିବା ପରେ ମୁଁ ବହୁତ କାନ୍ଦିଥିଲି।”

ସେହିପରି, ଶୁଭମ ଦ୍ୱିବେଦୀଙ୍କ ବାପା ସଞ୍ଜୟ ଦ୍ୱିବେଦୀଙ୍କ ଏକ ବୟାନ ସାମ୍ନାକୁ ଆସିଛି । ସେ କହିଲେ ଯେ, ମୁଁ ରାତିରୁ ନିରନ୍ତର ଖବର ଦେଖୁଛି । ମୁଁ ଭାରତୀୟ ସେନାକୁ ସାଲ୍ୟୁଟ୍ କରୁଛି ଏବଂ ପ୍ରଧାନମନ୍ତ୍ରୀ ମୋଦିଙ୍କୁ ଧନ୍ୟବାଦ ଦେଉଛି, ଯିଏ ଦେଶର ଲୋକଙ୍କ ଯନ୍ତ୍ରଣା ଶୁଣିଥିଲେ । ପାକିସ୍ତାନରେ ବଢ଼ୁଥିବା ଆତଙ୍କବାଦକୁ ଯେଭଳି ଭାବରେ ଶେଷ କରିଛି, ସେଥିପାଇଁ ମୁଁ ଆମର ସେନାକୁ ଧନ୍ୟବାଦ ଦେଉଛି ।

ପହଲଗାମ ଆତଙ୍କବାଦୀ ଆକ୍ରମଣରେ ପ୍ରାଣ ହରାଇଥିବା ସନ୍ତୋଷ ଜଗଦଲେଙ୍କ ପତ୍ନୀ କହିଛନ୍ତି, ‘ଆତଙ୍କବାଦୀମାନେ ଯେପରି ଆମ ମାନଙ୍କ ସିନ୍ଦୁର ପୋଛି ଦେଲେ, ଏହା ତାହାର ଏକ ଉପଯୁକ୍ତ ଜବାବ।’ ଏହି ଅପରେସନର ନାମ ଶୁଣିବା ମାତ୍ରେ ମୋ ଆଖିରେ ଲୁହ ଆସିଗଲା । ସେ ଆହୁରି କହିଛନ୍ତି, ମୁଁ ସରକାରଙ୍କୁ ହୃଦୟର ଗଭୀରତାରୁ ଧନ୍ୟବାଦ ଜଣାଉଛି ।

ମୃତ ସନ୍ତୋଷ ଜଗଦଲେଙ୍କ ଝିଅ ଅସାବରୀ ଜଗଦଲେ କହିଛନ୍ତି, ‘ଆମେ ପରିବାର ସଦସ୍ୟଙ୍କଠାରୁ ଫୋନ୍ ପାଇଲୁ ଏବଂ ତା’ପରେ ଆମେ ଜାଣିବାକୁ ପାଇଲୁ ଯେ ପହଲଗାମରେ ହୋଇଥିବା ଆକ୍ରମଣର ଜବାବ ଏକ ବିମାନ ଆକ୍ରମଣ ଦ୍ୱାରା ଦିଆଯାଇଛି।’ ପ୍ରଥମେ, ମିଶନର ନାମ ଶୁଣିବା ପରେ ମୁଁ ବହୁତ କାନ୍ଦିଥିଲି । ମୋର ମନେ ଅଛି ଯେ ଯେଉଁଦିନ ଅମିତ ଶାହ ଶ୍ରଦ୍ଧାଞ୍ଜଳି ଦେବାକୁ ଶ୍ରୀନଗର ଆସିଥିଲେ, ସମସ୍ତ ଭଉଣୀମାନେ କହୁଥିଲେ ଯେ ଆମେ ଭାରତର ଭଉଣୀ, ଆମେ ତୁମର ଭଉଣୀ ଏବଂ ଆମ ସ୍ୱାମୀମାନଙ୍କୁ ଆମଠାରୁ ଛଡ଼ାଇ ନିଆଯାଇଛି । ତେଣୁ ମୁଁ ଭାବୁଛି ସେଥିପାଇଁ ଏହି ଅପରେସନର ନାମ ସିନ୍ଦୂର ରଖାଯାଇଥିବ । ସେ ଆହୁରି କହିଛନ୍ତି, ‘ମୁଁ ଭାବୁଛି ଏହା ସେମାନଙ୍କ (ଆତଙ୍କବାଦୀ ଆକ୍ରମଣରେ ପ୍ରାଣ ହରାଇଥିବା ଲୋକଙ୍କ) ପ୍ରତି ଏକ ପ୍ରକୃତ ଶ୍ରଦ୍ଧାଞ୍ଜଳି, ଯାହା ଭାରତ ବାୟୁସେନା ଆକ୍ରମଣ କରି ଦେଇଛି ।’ ୧୪ ଦିନ ମଧ୍ୟରେ ନ୍ୟାୟ ପ୍ରଦାନ କରିବା ପାଇଁ ମୁଁ ମୋଦିଜୀଙ୍କୁ ଧନ୍ୟବାଦ ଦେବାକୁ ଚାହୁଁଛି ।