ପାକିସ୍ତାନ ନିର୍ବାଚନ: ପ୍ରାରମ୍ଭିକ ଟ୍ରେଣ୍ଡରେ ଇମ୍ରାନ ଖାନଙ୍କ ଦଳ ନଓ୍ବାଜ ସରିଫଙ୍କ ଦଳକୁ ଦେଉଛି କଡା ଟକ୍କର

ଇସଲାମାବାଦ: ବ୍ୟାପକ ହିଂସା ଭିତରେ ପାକିସ୍ତାନରେ ସାଧାରଣ ନିର୍ବାଚନ ପାଇଁ ଗୁରୁବାର ମତଦାନ ହୋଇଛି। ଶାସକ ଦଳ ପିଏମଏଲ-ଏନ ଏବଂ ବିରୋଧୀ ଦଳ ପିଟିଆଇ ମଧ୍ୟରେ କଡା ଟକ୍କର ମଧ୍ୟରେ ଗୁରୁବାର ପାକିସ୍ତାନରେ ସାଧାରଣ ନିର୍ବାଚନ ଅନୁଷ୍ଠିତ ହୋଇଛି।

ପାକିସ୍ତାନର ପ୍ରମୁଖ ଗଣମାଧ୍ୟମ ଡନର ପ୍ରାରମ୍ଭିକ ଟ୍ରେଣ୍ଡ ଅନୁଯାୟୀ, ଶେହବାଜ ସରିଫଙ୍କ ନେତୃତ୍ୱାଧୀନ ପିଏମଏଲ-ଏନ ୮ଟି ଆସନରେ ଆଗୁଆ ଥିବା ବେଳେ ଇମ୍ରାନ ଖାନଙ୍କ ନେତୃତ୍ୱାଧୀନ ପିଟିଆଇ ୬ଟି ଆସନରେ ଆଗୁଆ ରହିଛି। ଅନ୍ୟ ଏକ ପ୍ରମୁଖ ଦଳ ହେଉଛି ବିଲାୱଲ ଭୁଟ୍ଟୋ ଜର୍ଦାରୀଙ୍କ ନେତୃତ୍ୱାଧୀନ ପିପିପି, ଯାହା ୫ଟି ଆସନରେ ଆଗୁଆ ରହିଛି।

ବଡ କଥା ହେଉଛି ବିଭିନ୍ନ ମାମଲାରେ ଦଣ୍ଡିତ ହୋଇ ପିଟିଆଇ ମୁଖ୍ୟ ଇମ୍ରାନ ଖାନ୍ ଜେଲରେ ଅଛନ୍ତି। ସେ ନିଜେ ପ୍ରତ୍ୟକ୍ଷ ଭାବେ ଆସି ନିର୍ବାଚନ ପ୍ରଚାର କରିନାହାନ୍ତି। ତାଙ୍କ ଦଳ ନିର୍ବାଚନ କମିଶନଙ୍କ ଦ୍ବାରା ଦଣ୍ଡିତ ହୋଇଥିବାରୁ ନିର୍ବାଚନ ଲଢିପାରିନାହିଁ । କିନ୍ତୁ ଇମ୍ରାନଙ୍କ ଦଳର ନେତା ସ୍ବାଧୀନ ଭାବେ ବିଭିନ୍ନ ଆସନରେ ପ୍ରାର୍ଥୀ ହୋଇଛନ୍ତି।

ତେବେ ମତଦାନ କେନ୍ଦ୍ର ବନ୍ଦ ହେବାର ୧୦ ଘଣ୍ଟା ପରେ ମଧ୍ୟ ଯଥାଶୀଘ୍ର ଫଳାଫଳ ଦାଖଲ କରିବାକୁ ନିର୍ବାଚନ ଅଧିକାରୀ ପୋଲିଂ କର୍ମୀଙ୍କୁ ଅନୁରୋଧ କରିବାରୁ ଭୋଟ ଗଣତିରେ ବ୍ୟାପକ ବିଳମ୍ବ ହୋଇଛି। ଧୀର ପ୍ରକ୍ରିୟା ପାଇଁ ଇସିପି (ଇଲେକ୍ସନ କମିଶନ ଅଫ୍ ପାକିସ୍ତାନ) ବୈଷୟିକ ତ୍ରୁଟି ଏବଂ ମାନବୀୟ ତ୍ରୁଟିକୁ ଦାୟୀ କରିଛି।

ନ୍ୟାସନାଲ ଆସେମ୍ବଲିର ୨୬୬ ସାଧାରଣ ଆସନ ମଧ୍ୟରୁ ୨୬୫ ଟି ଏବଂ ବିଧାନସଭାର ୫୯୩ ଟି ସାଧାରଣ ଆସନ ମଧ୍ୟରୁ ୫୯୦ ଟି ପାଇଁ ନିର୍ବାଚନ ଅନୁଷ୍ଠିତ ହୋଇଛି । ପରିବର୍ତ୍ତନର ଅଧିକ ଆଶା ରଖି ରେକର୍ଡ ସଂଖ୍ୟକ ଯୁବ ଭୋଟର ଏହି ନିର୍ବାଚନରେ ଭାଗ ନେଇଛନ୍ତି।

ଇସିପି ମୁଖ୍ୟ ସିକନ୍ଦର ସୁଲତାନ ରାଜାଙ୍କ କହିବା ନୁସାରେ ମତଦାନ ଠିକ୍ ସମୟରେ ଆରମ୍ଭ ହୋଇ ଅପରାହ୍ନ ୫ଟା ପର୍ଯ୍ୟନ୍ତ ସୁରୁଖୁରୁରେ ଚାଲିଥିବା ବେଳେ କିଛି ମତଦାନ କେନ୍ଦ୍ର କମ୍ ମତଦାନ କିମ୍ବା ରିଟର୍ଣ୍ଣିଂ ଅଫିସରଙ୍କ ଅନୁରୋଧ ଯୋଗୁଁ ମତଦାନ ସମୟ ବୃଦ୍ଧି କରାଯାଇଛି। ଦେଶର ବିଭିନ୍ନ ସ୍ଥାନରୁ ଅନିୟମିତତା ଓ ହିଂସା କାଣ୍ଡ ର ଖବର ଆସିଥିଲେ ମଧ୍ୟ କୌଣସି ଭୋଟର ଙ୍କୁ ଭୋଟ୍ ଦେବାରେ କୌଣସି ଅସୁବିଧାର ସମ୍ମୁଖୀନ ହେବାକୁ ପଡିନଥିବା ସେ ଦାବି କରିଛନ୍ତି ।

ନ୍ୟାସନାଲ ଆସେମ୍ବଲିରେ ୩୩୬ ଟି ଆସନ ରହିଛି। ଯେଉଁଥିରୁ ୨୬୬ ଟି ପ୍ରତ୍ୟକ୍ଷ ଭୋଟରେ ନିର୍ବାଚିତ ହୋଇଥାଏ ଏବଂ ୭୦ ଟି ମହିଳା ଏବଂ ଅଣ-ମୁସଲମାନଙ୍କ ପାଇଁ ସଂରକ୍ଷିତ ରହିଛି। ଯାହା ବିଧାନସଭାରେ ପ୍ରତ୍ୟେକ ଦଳର ଅଂଶର ଅନୁପାତ ଅନୁସାରେ ନିର୍ବାଚିତ ହୁଅନ୍ତି। ସରକାର ଗଠନ ପାଇଁ ୧୩୩ ଟି ଆସନର ସାଧାରଣ ସଂଖ୍ୟାଗରିଷ୍ଠତା ଆବଶ୍ୟକ, କିନ୍ତୁ ଅନେକ ବିଶ୍ଳେଷକଙ୍କ ଆକଳନ ଅନୁଯାୟୀ ତ୍ରିଶଙ୍ଖଳିତ ସଂସଦ କିମ୍ବା ମେଣ୍ଟ ସରକାର ଗଠନ ହେବ।