ନୂଆଦିଲ୍ଲୀ: ପହଲଗାମ ଆତଙ୍କବାଦୀ ଆକ୍ରମଣର ପ୍ରତିଶୋଧରେ ଭାରତର ‘ଅପରେସନ୍ ସିନ୍ଦୂର’ ଦ୍ୱାରା ବିଚଳିତ ପାକିସ୍ତାନ ଗୁରୁବାର ରାତିରେ ଉତ୍ତର ଏବଂ ପଶ୍ଚିମ ଭାରତର ଅନେକ ସାମରିକ ଘାଟି ଉପରେ ଡ୍ରୋନ୍ ଏବଂ କ୍ଷେପଣାସ୍ତ୍ର ଆକ୍ରମଣ କରିବାକୁ ବିଫଳ ପ୍ରୟାସ କରିଛି । ଭାରତୀୟ ବାୟୁ ପ୍ରତିରକ୍ଷା ପ୍ରଣାଳୀ, ବିଶେଷକରି S-400 ବାୟୁ ପ୍ରତିରକ୍ଷା ପ୍ରଣାଳୀ, ସତର୍କତା ପ୍ରଦର୍ଶନ କରି ଏହି ସମସ୍ତ ଆକ୍ରମଣକୁ ପଣ୍ଡ କରିଥିଲା । ଏହି କାର୍ଯ୍ୟାନୁଷ୍ଠାନ ପରେ, ଆଜି ଶୁକ୍ରବାର, କେନ୍ଦ୍ର ସରକାର ଏହି ଘଟଣା ଉପରେ ଏକ ଆନୁଷ୍ଠାନିକ ପ୍ରେସ ବ୍ରିଫିଂ କରିଛନ୍ତି ।
ଆଜି ସନ୍ଧ୍ୟା ୫ଟା ୩୦ରେ ବୈଦେଶିକ ବ୍ୟାପାର ମନ୍ତ୍ରଣାଳୟ ପକ୍ଷରୁ ଏକ ପ୍ରେସ୍ ବ୍ରିଫିଂ କରାଯାଇଛି । ଏହି ସମୟରେ ବୈଦେଶିକ ସଚିବ ବିକ୍ରମ ମିଶ୍ରୀ, କର୍ଣ୍ଣେଲ ସୋଫିଆ କୁରେଶୀ ଏବଂ ୱିଙ୍ଗ କମାଣ୍ଡର ବ୍ୟୋମିକା ସିଂହ ଅପରେସନ ସିନ୍ଦୂର ବିଷୟରେ ନୂଆ ସୂଚନା ଦେଇଛନ୍ତି । କର୍ଣ୍ଣେଲ କୁରେଶୀ ପାକିସ୍ତାନର ପର୍ଦ୍ଦାଫାସ କରିବା ପାଇଁ ଫଟୋଗ୍ରାଫ୍ ଦେଖାଇଥିଲେ ଏବଂ ଆକ୍ରମଣ ସମୟରେ ପାକିସ୍ତାନ କିପରି ବେସାମରିକ ବିମାନକୁ ଢାଲ ଭାବରେ ବ୍ୟବହାର କରିବାର ଲଜ୍ଜାଜନକ ପ୍ରୟାସ କରିଥିଲା ତାହା କହିଥିଲେ ।
କର୍ଣ୍ଣେଲ ସୋଫିଆ କୁରେଶୀ କହିଛନ୍ତି ଯେ, ପାକିସ୍ତାନ ନିୟନ୍ତ୍ରଣ ରେଖା ଉପରେ ପ୍ରବଳ ଗୁଳିମାଡ଼ କରିଥିଲା । ଅନୁପ୍ରବେଶ କରିବାକୁ ଚେଷ୍ଟା କରାଯାଇଥିଲା । ତଙ୍ଗଧର, ଉରି ଏବଂ ଉଧମପୁରରେ ପ୍ରବଳ ଗୁଳିବର୍ଷା ହୋଇଥିଲା । ପାକିସ୍ତାନୀ ଗୁଳିମାଡ଼ ଯୋଗୁଁ କ୍ଷତି ହୋଇଛି । ଫଟୋ ଦେଖାଇ ସେ କହିଲେ ଯେ ଭାରତୀୟ ବାୟୁସେନା ବହୁତ ସଂଯମତା ଦେଖାଇଛି । ପାକିସ୍ତାନ ଅନ୍ତର୍ଜାତୀୟ ସୀମା ଏବଂ ନିୟନ୍ତ୍ରଣ ରେଖାର ୩୬ଟି ସ୍ଥାନକୁ ଟାର୍ଗେଟ କରିବାକୁ ଚେଷ୍ଟା କରିଥିଲା । ୩୬ଟି ସ୍ଥାନରେ ଅନୁପ୍ରବେଶ ପାଇଁ ୩୦୦-୪୦୦ ଡ୍ରୋନ୍ ବ୍ୟବହାର କରାଯାଇଥିଲା । ଭାରତ ଏହି ଡ୍ରୋନଗୁଡ଼ିକ ମଧ୍ୟରୁ ଅନେକକୁ ଖସାଇ ଦେଇଛି।”
ସେ ଆହୁରି କହିଛନ୍ତି ଯେ, ପ୍ରାରମ୍ଭିକ ତଦନ୍ତରୁ ଏହା ମଧ୍ୟ ଜଣାପଡ଼ିଛି ଯେ ଏହି ଆକ୍ରମଣରେ ତୁର୍କୀରେ ନିର୍ମିତ ଏକ ଡ୍ରୋନ୍ ବ୍ୟବହାର କରାଯାଇଥିଲା । ଭାରତୀୟ ବାୟୁସେନା ତୁରନ୍ତ ଏହି ଆକ୍ରମଣର ଜବାବ ଦେଇଥିଲା ଏବଂ ଏକ ଡ୍ରୋନ୍ ପ୍ରତି ଆକ୍ରମଣ କରିଥିଲା, ଯେଉଁଥିରେ ପାକିସ୍ତାନର ନିରୀକ୍ଷଣ ରାଡାର ପ୍ରଣାଳୀ ସମ୍ପୂର୍ଣ୍ଣ ଭାବରେ ଧ୍ୱଂସ ପାଇଯାଇଥିଲା । ଏହି ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନରେ ପାକିସ୍ତାନର ସେନାର ପ୍ରବଳ କ୍ଷତି ହୋଇଛି ଏବଂ ଏହା ଏହାର ସାମରିକ ଅଭିଯାନ ପାଇଁ ଏକ ବଡ଼ ବିପର୍ଯ୍ୟୟ ଅଟେ ।
କୁରେଶୀ କହିଛନ୍ତି ଯେ, ପାକିସ୍ତାନ ତାର ବାୟୁସୀମା ବନ୍ଦ କରିନାହିଁ ବରଂ ଏହାକୁ ଢାଲ ଭାବରେ ବ୍ୟବହାର କରିଛି । ଯେତେବେଳେ ଏହି ଆକ୍ରମଣ କରାଯାଇଥିଲା, ସେତେବେଳେ କରାଚୀ ଏବଂ ଲାହୋର ଭଳି ପ୍ରମୁଖ ସହରରେ ଯାତ୍ରୀବାହୀ ବିମାନଗୁଡ଼ିକ ଉଡ଼ୁଥିଲା, ଯାହା ସାଧାରଣ ନାଗରିକଙ୍କ ଜୀବନକୁ ବିପଦରେ ପକାଇଥିଲା । ଏହା ଅନ୍ତର୍ଜାତୀୟ ବିମାନ ସମେତ ସମସ୍ତ ବିମାନରେ ଯାତ୍ରା କରୁଥିବା ନାଗରିକଙ୍କ ପାଇଁ ବିପଦପୂର୍ଣ୍ଣ ଥିଲା । ସମଗ୍ର ଅପରେସନ୍ ସମୟରେ ଭାରତୀୟ ସୁରକ୍ଷା ବାହିନୀ ସଂଯମତା ଅବଲମ୍ବନ କରିଥିଲେ ଏବଂ ସାଧାରଣ ନାଗରିକଙ୍କ କ୍ଷତି ନ ହେବା ପାଇଁ ସୀମିତ ପ୍ରତିଆକ୍ରମଣ କରିଥିଲେ । ଏହି ପ୍ରତିରକ୍ଷାମୂଳକ ଏବଂ ସମ୍ବେଦନଶୀଳ ମନୋଭାବକୁ ଅନ୍ତର୍ଜାତୀୟ ସ୍ତରରେ ମଧ୍ୟ ପ୍ରଶଂସା କରାଯାଉଛି ।
Comments are closed.