କୋଲକାତା: ଚଳିତ ବିଶ୍ୱକପ କ୍ରିକେଟରେ ମଙ୍ଗଳବାର ପାକିସ୍ତାନ ୭ ୱିକେଟରେ ବାଂଲାଦେଶକୁ ପରାସ୍ତ କରିଛି । ୨୦୫ ରନର ବିଜୟ ଲକ୍ଷ୍ୟକୁ ପାକିସ୍ତାନ ୩୨.୩ ଓଭରରେ ୩ ୱିକେଟ ହରାଇ ହାସଲ କରି ନେଇଥିଲା । ଦୁଇ ଓପନର ଅବଦୁଲ୍ଲ ଶଫିକ ଓ ଫକର ଜମାନ ପ୍ରଥମ ୱିକେଟରେ ୧୨୮ ରନ ଯୋଗ କରି ଦଳକୁ ସୁବିଧାଜନକ ସ୍ଥିତିରେ ପଂହଚାଇଥିଲେ । ଅବଦୁଲ୍ଲ ୬୮ ଓ ଫକର ୮୧ ରନ କରି ଆଉଟ ହୋଇଥିଲେ । ମହମ୍ମଦ ରିଜୱାନ ୨୬ ଓ ଇଫତିକାର ଅହମ୍ମଦ ୧୭ ରନ କରି ଅପରାଜିତ ରହିଥିଲେ । ଅଧିନାୟକ ବାବର ଆଜମ ୯ ରନ କରି ଆଉଟ ହୋଇଥିଲେ । ବାଂଲାଦେଶ ପକ୍ଷରୁ ମେହେଦି ହାସନ ମିରାଜ ୩ଟି ଯାକ ୱିକେଟ ଅକ୍ତିଆର କରିଥିଲେ । ପୂର୍ବରୁ ପ୍ରଥମେ ବ୍ୟାଟିଂ କରି ବାଂଲାଦେଶ ୪୫.୧ ଓଭରରେ ୨୦୪ ରନରେ ଅଲଆଉଟ ହୋଇଯାଇଥିଲା । ମହମ୍ମୁଦାଲ୍ଲା ରିୟାଦ ୫୬, ଲିଟ୍ଟନ ଦାସ ୪୫ ଓ ଶାକିବ ଉଲ ହାସନ ୪୩ ରନ କରିଥିଲେ । ଅନ୍ୟ ବ୍ୟାଟ୍ସମ୍ୟାନଙ୍କ ବିଫଳତା ଯୋଗୁ ବାଂଲାଦେଶ ବଡ ସ୍କୋର କରିପାରି ନ ଥିଲା ।
ପାକିସ୍ତାନ ପକ୍ଷରୁ ଶାହୀନ ଶାହ ଆଫ୍ରିଦୀ ଓ ୱାସିମ ଜୁନିୟର ୩ଟି ଲେଖାଁଏ ୱିକେଟ ଅକ୍ତିଆର କରିଥିଲେ । ଇଫତିକାର ଅହମ୍ମଦ ଓ ଉସମା ମୀର ଗୋଟିଏ ଲେଖାଁଏ ୱିକେଟ ନେଇଥିଲେ । ବାଂଲାଦେଶ ଶେଷ ୧୫ ଓଭରରେ ୭୬ ରନରେ ୬ଟି ୱିକେଟ ହରାଇଥିଲା । ୬ଜଣ ବ୍ୟାଟ୍ସମ୍ୟାନ ଦୁଇ ଅଙ୍କ ଛୁଇଁପାରି ନ ଥିଲେ । ୩୧ତମ ଓଭରରେ ମହମ୍ମୁଦାଲ୍ଲା ଆଉଟ ହେବା ପରେ ନାଟକୀୟ ଢ଼ଙ୍ଗରେ ବାଂଲାଦେଶ ୱିକେଟର ପତନ ଘଟିଥିଲା । ବାଂଲାଦେଶର ସେମିଫାଇନାଲ ପ୍ରବେଶ ଆଶା ଶେଷ ହୋଇଛି । ଏହି ମ୍ୟାଚରେ ବିଜୟ ହାସଲ କରିବା ଯୋଗୁ ପାକିସ୍ତାନ ୬ ମ୍ୟାଚରେ ୬ ପଂଏଟ ହାସଲ କରି ଏବେ ବି ସେମିଫାଇନାଲ ଦୌଡରେ ରହିଛି । ଟସ ଜିତି ବାଂଲାଦେଶ ପ୍ରଥମେ ବ୍ୟାଟିଂ କରିବା ପାଇଁ ନିଷ୍ପତି ନେଇଥିଲା ।
Comments are closed.