ନୂଆଦିଲ୍ଲୀ: ଜମ୍ମୁ-କାଶ୍ମୀର ପହଲଜାମ୍ ଆକ୍ରମଣ ପରେ ସବୁ ଦୟା ମାୟା ସବୁକୁ ପଛରେ ରଖି ଏବେ ପ୍ରତିଶୋଧ ପରାୟଣ ହୋଇଉଠିଛି ଭାରତ । ଦାନା, ପାଣି, ବାସ ସବୁ ଛଡାଇନେବ ବୋଲି ଚେତାବନୀ ଦେଇଛି । ଏବେ ପାକିସ୍ତାନୀ ଭିସାରେ ଭାରତରେ ରହୁଥିବା ଲୋକଙ୍କୁ ନିଜ ଦେଶ ଫେରିବା ପାଇଁ ସମୟସୀମା ନିର୍ଦ୍ଦେଶରେ ଟିକିଏ କୋହଳ କରିଥିଲେ ମଧ୍ୟ ଆଗାମୀ ନିର୍ଦ୍ଦେଶ ସୁଦ୍ଧା ସେମାନେ ଦେଶ ଛାଡିବାକୁ ଅନୁମତି ଦିଆଯାଇଛି । ଏହାକୁ ନେଇ ମୋଦି ସରକାର ଏପ୍ରିଲ ୨୩ ତାରିଖରେ ଏକ ନିର୍ଦ୍ଦେଶ ଜାରି କରିଥିଲେ, ଯେଉଁଥିରେ ଭାରତରେ ରହୁଥିବା ପାକିସ୍ତାନୀମାନଙ୍କୁ ଫେରିଯିବାକୁ ପଡିବ ବୋଲି ନିର୍ଦ୍ଦେଶ ଜାରି କରିଥିଲେ । ହେଲେ ଏହାରି ଭିତରେ ଜଣେ ପାକିସ୍ତାନୀ ଯୁବକ ଉପରେ ଟିକିଏ ଦରଦ ଦେଖାଇଛନ୍ତି ସରକାର । ମାନବିକତା ଦୃଷ୍ଟିରୁ ତାଙ୍କୁ ଭାରତରେ ରହିବାକୁ କାଳେ ଅନୁମତି ଦିଆଯାଇଛି ।
କିଛି ଏମିତି ଦୃଶ୍ୟ ସାମ୍ନାକୁ ଆସିଛି, ଆନ୍ଧ୍ରପ୍ରଦେଶରୁ । ସେଠିକାର ଜଣେ ଦମ୍ପତିଙ୍କୁ କିଛି ଏପରି ଆଶ୍ବସ୍ତି, କେନ୍ଦ୍ର ସରକାରଙ୍କ ପକ୍ଷରୁ ମିଳିଛି । ତେବେ ଏହି ପାକିସ୍ତାନୀ ପରିବାରକୁ ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଭାରତରେ ରହିବାକୁ ଆଶ୍ୱସ୍ତି ଦେଇଛନ୍ତି ଆନ୍ଧ୍ର ପ୍ରଦେଶ ଟିଡିପି ସରକାର । ତେବେ ଏହାକୁ ନେଇ ପରିବାର ଲୋକଙ୍କ କହିବାନୁଯାୟୀ, ସେମାନେ ବିଶାଖାପାଟଣା ପୋଲିସ କମିଶନରଙ୍କୁ ଏକ ଚିଠି ଲେଖିଥିଲେ । ଯେଉଁଥିରେ ପରିବାରର ସ୍ୱାମୀ ପାକିସ୍ତାନର ହୋଇଥିବା ବେଳେ ତାଙ୍କ ସ୍ତ୍ରୀ ବିଶାଖାପାଟଣାର ବାସିନ୍ଦା ବୋଲି ଦର୍ଶାଯାଇଥିଲେ । ଏହି ଦମ୍ପତି ତାଙ୍କ ପୁଅର ଚିକିତ୍ସା ପାଇଁ ସହରରେ ରହୁଛନ୍ତି ବୋଲି ଦର୍ଶାଇଥିଲେ । ଏଥିସହିତ ପୋଲିସ୍ କମିଶନରଙ୍କୁ ଏହା ମଧ୍ୟ କହିଥିଲେ ଯେ ସେ ତାଙ୍କ ଭିସାକୁ ଦୀର୍ଘକାଳୀନ ଭିସାରେ ପରିବର୍ତ୍ତନ କରିବା ପାଇଁ ଆବେଦନ କରିଛନ୍ତି, ଯାହା ଏପର୍ଯ୍ୟନ୍ତ ପ୍ରକ୍ରିୟାକରଣ ହୋଇନାହିଁ । ତାଙ୍କ ଆବେଦନ ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି, ବାଗଚୀ ହାଇଦ୍ରାବାଦର ଫୋରେନସିକ୍ ଆଞ୍ଚଳିକ ପଞ୍ଜୀକରଣ କାର୍ଯ୍ୟାଳୟର ଉଚ୍ଚ କର୍ତ୍ତୃପକ୍ଷଙ୍କ ସହ ଯୋଗାଯୋଗ କରିଥିଲେ ଏବଂ ତାଙ୍କ ପୁଅର ଚିକିତ୍ସା ସମାପ୍ତ ନହେବା ପର୍ଯ୍ୟନ୍ତ ତାଙ୍କ ଭିସାକୁ ଅସ୍ଥାୟୀ ଭାବରେ ବୃଦ୍ଧି କରାଇଲେ । କିନ୍ତୁ ଏହି ପରିବାରର ସବୁଠୁ ଆଶ୍ଚର୍ଯ୍ୟଜନକ କଥା ହେଉଛି, ବାପା ଏବଂ ବଡ଼ ପୁଅ ପାକିସ୍ତାନୀ ନାଗରିକତ୍ବ ପାଇଥିବା ବେଳେ ମା ଏବଂ ସାନ ପୁଅ ଭାରତୀୟ ନାଗରିକ ଭାବେ ରହିଛନ୍ତି ।
ସେପଟେ ଯେଉଁଠି ‘କେହିବି ରହିବେନି, ସବୁ ପାକିସ୍ତାନ ଫେରିବେ’ ବୋଲି ଭାରତ ଦୃଢୋକ୍ତି ରଖିଥିବା ବେଳେ ଆନ୍ଧ୍ରପ୍ରଦେଶ ସରକାରଙ୍କ ଏଭଳି ପଦକ୍ଷେପ ନେଇ କେନ୍ଦ୍ର ସରକାରଙ୍କ ପକ୍ଷରୁ କୌଣସି ବି ପ୍ରତିକ୍ରିୟା ଆସିନାହିଁ । ଏହାକୁ ନେଇ ଅନ୍ୟ ପରିବାରର, ଯାହାଙ୍କ ପରିବାରରେ କେହି ପାକିସ୍ତାନୀ ରହିଛନ୍ତି ସେମାନେ ଅଭିଯୋଗ କରିପାରନ୍ତି । ପୂର୍ବରୁ ମଧ୍ୟ ଦେଶରେ ଥିବା ଅନେକ ପାକିସ୍ତାନୀ ଭାରତରେ ଘର ବସାଇଥିବା କାରଣରୁ ପାକିସ୍ତାନ ଫେରିବା ପାଇଁ ଅମଙ୍ଗ ପ୍ରକାଶ କରିଛନ୍ତି ।
ତେବେ କହିରଖୁଛୁ, ଗତକାଲି ଅର୍ଥାତ୍ ବୁଧବାର ପର୍ଯ୍ୟନ୍ତ ଆସିଥିବା ରିପୋର୍ଟ ଅନୁସାରେ, ଏପର୍ଯ୍ୟନ୍ତ ୭୮୬ ଜଣ ପାକିସ୍ତାନୀ ଭାରତରୁ ଫେରିଛନ୍ତି । ଏହା ବ୍ୟତୀତ, ଏପ୍ରିଲ ୨୪ ତାରିଖ ପରଠାରୁ, ୨୫ ଜଣ କୂଟନୀତିଜ୍ଞ ଏବଂ ଅଧିକାରୀ ସମେତ ମୋଟ ୧,୪୬୫ ଜଣ ଭାରତୀୟ ପାକିସ୍ତାନରୁ ପଞ୍ଜାବ ସହିତ ଥିବା ଅନ୍ତର୍ଜାତୀୟ ସୀମା ଦେଇ ଭାରତ ଆସିଛନ୍ତି । ଏହା ବ୍ୟତୀତ ଦୀର୍ଘକାଳୀନ ଭାରତୀୟ ଭିସା ଧାରଣ କରିଥିବା ୧୫୧ ଜଣ ପାକିସ୍ତାନୀ ନାଗରିକ ମଧ୍ୟ ଭାରତ ଫେରିଛନ୍ତି । ଗତ ୨୯ ଏପ୍ରିଲରେ ଦୀର୍ଘକାଳୀନ ଭାରତୀୟ ଭିସା ଥିବା ୨୨ ଜଣ ପାକିସ୍ତାନୀ ନାଗରିକ ଅଟାରୀ-ୱାଘା ସୀମା ଦେଇ ଦେଶରେ ପ୍ରବେଶ କରିଥିଲେ ଏବଂ ୨୮ ଏପ୍ରିଲରେ ସମାନ ବର୍ଗର ଭିସା ଥିବା ଆହୁରି ୧୨୯ ଜଣ ପାକିସ୍ତାନୀ ଭାରତରେ ପ୍ରବେଶ କରିଥିଲେ।
Comments are closed.