ମୁମ୍ବାଇ: ‘ବିଗବସ୍’ ଓ ‘କପିଲ ଶର୍ମା ଶୋ’କୁ ଯିବେନି ପାକିସ୍ତାନୀ ନାଗରିକ ସୀମା ହାଇଦର । ଏହି ଅଫରକୁ ସେ ପ୍ରତ୍ୟାଖାନ କରିଛନ୍ତି ବୋଲି ଏକ ଭିଡ଼ିଓ ମାଧ୍ୟମରେ ସ୍ପଷ୍ଟ କରିଛନ୍ତି । ଏବେ ଏହି ଭିଡ଼ିଓ ସୋସିଆଲ ମିଡ଼ିଆରେ ଖୁବ୍ ଭାଇରାଲ ହେବାରେ ଲାଗିଛି ।
ଏହି ଭିଡିଓ ଜରିଆରେ ସୀମା କହିଛନ୍ତି ଯେ, ମୋତେ ବିଗ୍ବସ ଓ କପିଲ ଶର୍ମା ଶୋ’କୁ ଯିବାର ଅଫର ମିଳିଥିଲା । କିନ୍ତୁ କୌଣସି ଶୋ’କୁ ଯିବାର ମୋର ଯୋଜନା ନାହିଁ । ଯଦି ଭବିଷ୍ୟତରେ କେବେ ମୁଁ ଶୋ’କୁ ଯିବା ପାଇଁ ସ୍ଥିର କରିବି । ତେବେ ଏ ବିଷୟରେ ଆପଣମାନଙ୍କୁ ନିଶ୍ଚୟ ଜଣାଇବି । ସେହିପରି ସୀମାଙ୍କ ଓକିଲ ଏ ପି ସିଂହ କହିଛନ୍ତି ଯେ, ‘ବିଗବସ’ ଓ ‘କପିଲ ଶର୍ମା’ ଶୋ’ରୁ ସୀମା ହାଇଦର ଓ ସଚିନଙ୍କ ପାଖକୁ ଅଫର ଆସିଥିଲା । କିନ୍ତୁ ଏବେ ଯେଉଁଭଳି ପରିସ୍ଥିତି ଅଛି ସେମାନେ ଶୋକୁ ଯିବା ଉଚିତ ହେବନାହିଁ ।
ପାକିସ୍ତାନରୁ ଭାରତ ଆସିଥିବା ସୀମା ହାଇଦରଙ୍କୁ ନେଇ ଏବେ ଚାରିଆଡ଼େ ଚର୍ଚ୍ଚା ଜୋର ଧରିଛି । ତାଙ୍କୁ ନେଇ ପ୍ରତିଦିନ ନୂଆ ନୂଆ ତଥ୍ୟ ମଧ୍ୟ ସାମ୍ନାକୁ ଆସୁଛି । ସେ ଅନଲାଇନ୍ ଗେମ୍ ପବ୍ଜୀ ଖେଳିବା ବେଳେ ଭାରତର ସଚିନ୍ ମୀନାଙ୍କ ସହ ପରିଚିତ ହୋଇଥିଲେ । ପରେ ତାଙ୍କୁ ଭଲ ପାଇ ବସିଥିଲେ । ସୀମା ତାଙ୍କ ପ୍ରେମ ପାଇଁ ନିଜ ସ୍ୱାମୀଙ୍କୁ ଛାଡ଼ି ନେପାଳ ଦେଇ ଗ୍ରେଟର ନୋଏଡାକୁ ଚାଲି ଆସିଥିଲେ । ତାଙ୍କର ଚାରି ପିଲା ମଧ୍ୟ ସେମାନଙ୍କ ସହିତ ଆସିଥିଲେ । ସମସ୍ତେ ସୀମାଙ୍କର ପ୍ରେମ କାହାଣୀ ବିଷୟରେ ଜାଣିବା ମାତ୍ରେ ସେଠାରେ ଉତ୍ତେଜନା ଦେଖାଦେଇଥିଲା । ପରେ ସୀମା ଏବଂ ସଚିନ୍ ଚର୍ଚ୍ଚାକୁ ଆସିଥିଲେ । ଏବେ ତାଙ୍କ ପ୍ରେମ କାହାଣୀକୁ ନେଇ ନିର୍ମାଣ ହୋଇଛି ଫିଲ୍ମ ‘କରାଚିଟୁ ନୋଏଡା’ ।
ଫିଲ୍ମ ‘କରାଚି ଟୁ ନୋଏଡ଼ା’ ର ପ୍ରଥମ ପୋଷ୍ଟର ମଧ୍ୟ ରିଲିଜ୍ ହୋଇଯାଛି । ସୀମାଙ୍କ ଚରିତ୍ରରେ ଅଭିନେତ୍ରୀ ଫରହିନ୍ ଫାଲକ ନଜର ଆସିବେ । ପ୍ରଯୋଜକ ଅମିତ ଜାନି ଏହାର ପ୍ରଯୋଜନା କରିଥିବା ବେଳେ ଫିଲ୍ମର ଗୀତଗୁଡ଼ିକ ମଧ୍ୟ ଲେଖିଛନ୍ତି । ଏଥିରେ କଣ୍ଠଦାନ କରିଛନ୍ତି ପ୍ରୀତି ସରୋଜ ।
Comments are closed.