କେନ୍ଦ୍ରାପଡା: ଏପଟେ ଚାଲିଥିଲା ବାହାଘର । ସେପଟେ ଚାଲିଥିଲା ଶୁଦ୍ଧଘର । ଏପଟେ ଚାଲିଥିଲା ଭୋଜି, ସେପଟେ ବି ଚାଲିଥିଲା ଭୋଜି । ଗୋଟିଏ ପଟେ ପଡୁଥିଲା ହାତଗଣ୍ଠି, ଅନ୍ୟପଟେ ଛିଣ୍ଡୁଥିଲା ସମ୍ପର୍କର ଗଣ୍ଠି । ଏପଟେ ଆଖିରେ ଆଖିଏ ସ୍ୱପ୍ନ ନେଇ ଝିଅ ଗଢିବାକୁ ଯାଉଥିଲା ନୂଆ ସଂସାର, ହେଲେ ଝିଅକୁ ସଂସାରରୁ ସବୁଦିନ ପାଇଁ ବିଦାୟ ଦେଉଥିଲେ ବାପା-ମା’ ଓ ପରିବାର ଲାେକେ । ଏମିତି କରୁଣ, ହୃଦୟଛୁଆଁ ଘଟଣା ଦେଖିବାକୁ ମିଳିଥିଲା କେନ୍ଦ୍ରାପଡା ଜିଲ୍ଲା ଆଳି ନୂଆବଜ଼ାର ଅଞ୍ଚଳରେ।
ପରିବାର ଲୋକଙ୍କ ଇଚ୍ଛା ବିରୋଧରେ ବିବାହ କରବାର ଏକ କରୁଣ ଦୃଶ୍ୟ ଦେଖିବାକୁ ମିଳିଥିଲା ଆଳି ନୂଆବଜ଼ାର ଅଂଚଳରେ । ଶ୍ରୀବାସ୍ତବ ମଳିକ ନାମ ଜଣେ ବ୍ୟକ୍ତିଙ୍କ ସହ ଆଳି ଅଞ୍ଚଳର ଜଣେ ଯୁବତୀଙ୍କର ପ୍ରେମ ସମ୍ପର୍କ ଗଢ଼ି ଉଠିଥିଲା। ହେଲେ ଯୁବତୀଙ୍କ ପରିବାର ଲୋକେ ଏହାକୁ ଘୋର ବିରୋଧ କରୁଥିଲେ। କିନ୍ତୁ ପୁଅଝିଅ ଉଭୟେ ନିଜ ନିଜ ଜିଦରେ ଅଟଳ ଥିଲେ । ଏକାଠି ଜିଇଁବେ..ଏକାଠି ମରିବେ ।
ଶେଷରେ ସବୁ ବିରୋଧ ସତ୍ତ୍ୱେ ପ୍ରେମିକଙ୍କ ହାତ ଧରିବାକୁ ନଷ୍ପତ୍ତି ନେଇଥିଲେ ଯୁବତୀ । ବିବାହ କରି ଏକାଠି ରହିବା ଲାଗି ଦିନେ ଯୁବତୀ ଜଣକ ଘର ଛାଡି ପ୍ରେମିକ ଶ୍ରୀବାସ୍ତବଙ୍କ ଘରକୁ ଚାଲି ଆସିଥିଲେ ।
ଶ୍ରୀବାସ୍ତବଙ୍କ ପରିବାର ଲୋକେ ଏନେଇ ଥାନାରେ ଜଣାଇଥିଲେ। ପୁଲିସ ଯୁବତୀ ଓ ପ୍ରେମିକ ଶ୍ରୀବାସ୍ତବ ତଥା ଦୁଇ ପରିବାର ଲୋକଙ୍କୁ ଡାକି ପଚରାଉଚରା କରିଥିଲା। ହେଲେ ଯୁବତୀ ଜଣକ ଶ୍ରୀବାସ୍ତବଙ୍କୁ ବିବାହ କରିବେ ବୋଲି ସମସ୍ତଙ୍କ ସାମ୍ନାରେ ଅଡି ବସିଥିଲେ।
Comments are closed.