ଭବାନୀପାଟଣା: ଆଜି ସ୍ଥାନୀୟ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖ ରାସ୍ତା କଡ଼ରେ ସ୍ୱତନ୍ତ୍ର ସଂକ୍ଷିପ୍ତ ସଂଶୋଧନ ୨୦୨୪ ଉପଲକ୍ଷେ ପଥଉତ୍ସବ ଓ ପଦଯାତ୍ରା ଅନୁଷ୍ଠିତ ହୋଇଯାଇଛି । ଏହି ପଦଯାତ୍ରାକୁ କଳାହାଣ୍ଡି ଜିଲ୍ଲାପାଳ ତଥା ଜିଲ୍ଲା ନିର୍ବାଚନ ଅଧିକାରୀ ପି. ଅନ୍ୱେଷା ରେଡ୍ଡୀ ପତାକା ଦେଖାଇ ଶୁଭାରମ୍ଭ କରିଛନ୍ତି । ଯୋଗ୍ୟ ଭୋଟରଙ୍କ ନାମ ପଞ୍ଜିକରଣ ଏବଂ ଆଶାୟୀ ଭୋଟରଙ୍କ ମଧ୍ୟରେ ସଚେତନତା ସୃଷ୍ଟି କରିବା ଉକ୍ତ କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ।
ଅନୁଷ୍ଠିତ ଏହି ପଦଯାତ୍ରା କାର୍ଯ୍ୟକ୍ରମରେ ଭବାନୀପାଟଣା ସହରର ୧୪ଟି ଉଚ୍ଚମାଧ୍ୟମିକ ଓ ମହାବିଦ୍ୟାଳୟର ବହୁ ସଂଖ୍ୟକ ଛାତ୍ରଛାତ୍ରୀ, ସଂପୃକ୍ତ ଶିକ୍ଷାନୁଷ୍ଠାନର କର୍ମକର୍ତ୍ତା, ବୁଥ ସ୍ତରୀୟ ଅଧିକାରୀ, କ୍ୟାମ୍ପସ ଆମ୍ବାସାଡର (ମୁଁ ବି ମିତା), ସାଧାରଣ ନାଗରିକ, ବିଭାଗୀୟ ଅଧିକାରୀ ଏବଂ ବୁଦ୍ଧିଜୀବୀମାନେ ଅଂଶଗ୍ରହଣ କରିଥିଲେ । ନଗର ପରିକ୍ରମା ସହ ଭୋଟ ସମ୍ବନ୍ଧୀୟ ସଚେତନତା ସୃଷ୍ଟି କରିଥିଲେ । ଚମତ୍କାର ସାଂସ୍କୃତିକ କାର୍ଯ୍ୟକ୍ରମ ଏବଂ ନିର୍ବାଚନ ପ୍ରକ୍ରିୟା ସମ୍ବନ୍ଧୀୟ ବିଷୟବସ୍ତୁ ଉପରେ ଆଧାରିତ ପଥପ୍ରାନ୍ତ ନାଟକ, ଯୋଗ, ଝୋଟି, ରଙ୍ଗୋଲି ଚିତ୍ରକଳା ଓ ବାଲୁକା କଳା ଇତ୍ୟାଦି ମାଧ୍ୟମରେ ବ୍ୟାପକ ସଚେତନତା ସୃଷ୍ଟି କରାଯାଇଛି ।
ସାଂସ୍କୃତିକ କାର୍ଯ୍ୟକ୍ରମରେ ବାଲ ଗୋପାଳ ସେବାନିକେତନ, ଏନଏସଡ୍ୟନ୍ସ ଗ୍ରୁପ୍, କଳାହାଣ୍ଡି କଳା କେନ୍ଦ୍ର, ସକ୍ଷମ ନୃତ୍ୟ କେନ୍ଦ୍ର, ପ୍ରଗତି କନସପ୍ଟ ସ୍କୁଲର ଛାତ୍ର ଛାତ୍ରୀ ଅଂଶ ଗ୍ରହଣ କରିଥିଲେ । ରାହାଗିରି ପଥ ଉତ୍ସବରେ କଳାହାଣ୍ଡି ଆର୍ଟସ ସ୍କୁଲ୍, ପତଞ୍ଜଳୀ ଯୋଗ କେନ୍ଦ୍ର, ତରୁଣ ମହାପାତ୍ର ଏବଂ ମାନସ ପଣ୍ଡାଙ୍କ ରଙ୍ଗୋଲି, ବାଲ ଗୋପାଳ ସେବା ଅନୁଷ୍ଠାନର ବାଲୁକା କଳା, କାରୁଣ୍ଡ କଳା କେନ୍ଦ୍ରର ପଥପ୍ରାନ୍ତ ନାଟକ ମତଦାନ ଉପରେ ବିଶେଷ ସଚେତନତା ସୃଷ୍ଟି କରିଥିଲା । ଏହି ସ୍ୱତନ୍ତ୍ର ସଂକ୍ଷିପ୍ତ ସଂଶୋଧନ ୨୦୨୪ କାର୍ଯ୍ୟକ୍ରମ ଗତ ୨୭ ଅକ୍ଟୋବରରୁ ଆରମ୍ଭ ହୋଇ ଆସନ୍ତା ୯ ପର୍ଯ୍ୟନ୍ତ ପର୍ଯ୍ୟନ୍ତ ଚାଲିବ । ଆଶାୟୀ ଭୋଟର ନିଜର ନାମକୁ ଭୋଟର ତାଲିକାରେ ଅନ୍ତର୍ଭୁକ୍ତ କରିବାକୁ କିମ୍ବା ପୂର୍ବରୁ ପଞ୍ଜୀକୃତ ଭୋଟର ନିଜର ନାମ ଅପସାରଣ, ସବିଶେଷ (ନାମ, ଠିକଣା, ତଥ୍ୟ, ଫଟୋ) ସଂଶୋଧନ, ଆଧାର କାର୍ଡ ସଂଯୋଗୀ କରଣ ପାଇଁ ନିକଟସ୍ଥ ବୁଥ୍ କୁ ଯାଇ ବା ନିଜ ମୋବାଇଲରେ ଭୋଟର ହେଲ୍ପଲାଇନ ଆପ ଡାଉନଲୋଡ କରି ଅନଲାଇନ ମାଧ୍ୟମରେ କରିପାରିବେ ।
ଏହି କାର୍ଯ୍ୟକ୍ରମରେ ଅତିରିକ୍ତ ଜିଲ୍ଲାପାଳ ତନ୍ମୟ କୁମାର ଦରୱାନ, ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ, ଜିଲ୍ଲା ପରିଷଦ ସଚିନ ପାୱାର ପ୍ରକାଶ, ଉପଜିଲ୍ଲାପାଳ, ଭବାନୀପାଟଣା ଡ ବିଶ୍ୱଜିତ ଦାସ, ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡ ନିହାରେନ୍ଦ୍ର ପଣ୍ଡା, ଜିଲ୍ଲା ଶିକ୍ଷା ଅଧିକାରୀ, ଡେପୁଟି କଲେକ୍ଟର (ନିର୍ବାଚନ) କିରଣ କୁମାର ମହାନ୍ତି, ସହକାରୀ ଜିଲ୍ଲାପାଳ ଶରତ ସାହୁ, ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ମନୋଜ ବେହେରା, ଜିଲ୍ଲା କ୍ରୀଡା ଅଧିକାରୀ ରମେଶ ଚନ୍ଦ୍ର ପାଢୀ, କାର୍ଯ୍ୟନିର୍ବାହୀ ଅଧିକାରୀ, ମୁନିସିପାଲିଟି ଭବାନୀପାଟଣା ଚିନ୍ମୟ ନାୟକ, ଅବସରପ୍ରାପ୍ତ ଅଧ୍ୟକ୍ଷ ଅଜୟ ମିଶ୍ର, ହେମନ୍ତ ମୁଣ୍ଡ, ବହୁ ବୁଦ୍ଧିଜୀବୀ, ଏନଜିଓ କର୍ମକର୍ତ୍ତା ଏବଂ ଜିଲ୍ଲା ସ୍ତରର ଅଧିକାରୀମାନେ ଉପସ୍ଥିତ ଥିଲେ ।
Comments are closed.