ନୂଆଦିଲ୍ଲୀ: ପୁଣି ଆତଙ୍କବାଦୀ ଆକ୍ରମଣକୁ ନେଇ ମୁହାଁମୁହିଁ ହୋଇଛନ୍ତି ଭାରତ ଓ ପାକିସ୍ତାନ । ଏହି ସମୟ ଭିତରେ ଭାରତ ସରକାର ଅଟାରୀ ସୀମା ଦେଇ ପାକିସ୍ତାନୀ ନାଗରିକଙ୍କୁ ଫେରିବାକୁ ଅନୁମତି ଦେଇଛନ୍ତି । ଏହା ସତ୍ତ୍ୱେ, ଆଜି ସକାଳଠାରୁ ପାକିସ୍ତାନ ପକ୍ଷରୁ ଫାଟକ ଖୋଲାଯାଇ ନାହିଁ । ପାକିସ୍ତାନ ନା ତା’ର ନାଗରିକମାନଙ୍କୁ ଫେରାଇ ନେଉଛି ନା ପାକିସ୍ତାନରେ ଫସି ରହିଥିବା ଭାରତୀୟ ନାଗରିକମାନଙ୍କୁ ଭାରତ ଫେରିବାକୁ ଦେଉଛି । ଭାରତୀୟ ଇମିଗ୍ରେସନ କାଉଣ୍ଟରରେ ଇମିଗ୍ରେସନ ଅଧିକାରୀମାନେ ପାକିସ୍ତାନ ଫାଟକ ଖୋଲିବା ପର୍ଯ୍ୟନ୍ତ ଅପେକ୍ଷା କରିଛନ୍ତି ।
ସକାଳେ ଅଟାରୀ ସୀମାରେ ପହଞ୍ଚିଥିବା ପାକିସ୍ତାନୀ ନାଗରିକମାନେ ଏବେ ବି ପାକିସ୍ତାନ ଯିବା ପାଇଁ ଅପେକ୍ଷା କରି ନିଜ ଗାଡ଼ିରେ ବସିଛନ୍ତି ।
ସୂଚନା ଅନୁଯାୟୀ, ପାକିସ୍ତାନ ପକ୍ଷରୁ ଏପର୍ଯ୍ୟନ୍ତ ଗେଟ୍ ଖୋଲାଯାଇ ନାହିଁ । ଭାରତ ସରକାରଙ୍କ ନୂତନ ନିର୍ଦ୍ଦେଶର ସମୀକ୍ଷା କରାଯାଉଛି । ପାକିସ୍ତାନ ପାର୍ଶ୍ୱରୁ ଗେଟ୍ ଖୋଲିବା ପରେ, ବିଏସଏଫ କାଗଜପତ୍ର ଯାଞ୍ଚ କରିବ ଏବଂ ପାକିସ୍ତାନୀମାନଙ୍କୁ ସୀମା ପାର କରିବାକୁ ଅନୁମତି ଦେବ । ତା’ପରେ ଇମିଗ୍ରେସନ ଯାଞ୍ଚ କରିବା ପରେ, ପାକିସ୍ତାନୀମାନେ ପାକିସ୍ତାନ ଫେରିପାରିବେ । ସକାଳ ପରଠାରୁ ଜଣେ ହେଲେ ପାକିସ୍ତାନୀ ନାଗରିକ ସୀମା ପାର ହୋଇନଥିବା ସୂଚନା ରହିଛି ।
ଭାରତ ସରକାରଙ୍କ ଗୃହ ବିଭାଗ ଦ୍ୱାରା ଜାରି କରାଯାଇଥିବା ଆଦେଶରେ କୁହାଯାଇଛି ଯେ ମେ ୧ ତାରିଖରେ ଅଟାରୀ ଅନ୍ତର୍ଜାତୀୟ ସୀମାରେ ସମସ୍ତ ଗତିବିଧି ବନ୍ଦ କରିବା ଏବଂ ବାଣିଜ୍ୟ ସମ୍ପୂର୍ଣ୍ଣ ବନ୍ଦ କରିବା ପାଇଁ ନିର୍ଦ୍ଦେଶ ସତ୍ତ୍ୱେ, ପାକିସ୍ତାନୀ ନାଗରିକମାନଙ୍କୁ ସୀମା ପାର କରିବାକୁ ଅନୁମତି ଦିଆଯିବ । ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ, ଭାରତରେ ଉପସ୍ଥିତ ପାକିସ୍ତାନୀ ନାଗରିକମାନେ ଅଟାରୀ ସୀମା ଦେଇ ନିଜ ଦେଶକୁ ଫେରିପାରିବେ । ତେବେ ଭାରତ ସରକାରଙ୍କ ଏହି ନିଷ୍ପତ୍ତି ପାକିସ୍ତାନୀ ନାଗରିକଙ୍କୁ ବଡ ଆଶ୍ବସ୍ତି ଦେଇଛି ।
Comments are closed.