ରାୟପୁର: ରାଜନନ୍ଦଗାଓଁରେ ଦ୍ୱିତୀୟ ପର୍ଯ୍ୟାୟ ନିର୍ବାଚନ ସମୟରେ ପୂର୍ବତନ ମୁଖ୍ୟମନ୍ତ୍ରୀ ଭୂପେଶ ବାଘେଲ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉତ୍ତରାଧିକାର ଟିକସ ଉପରେ ମନ୍ତବ୍ୟକୁ ଖୋଲାଖୋଲି ସମାଲୋଚନା କରିଛନ୍ତି।
ବାଘେଲ କହିଛନ୍ତି, ପ୍ରଧାନମନ୍ତ୍ରୀ ମୋଦୀ ଜଣେ ମିଛ କହୁଥିବା ବ୍ୟକ୍ତି। ଇତିହାସ କିମ୍ବା ନିୟମ ବିଷୟରେ ତାଙ୍କର କୌଣସି ଜ୍ଞାନ ନାହିଁ । ୧୯୭୦ରେ ଇନ୍ଦିରା ଗାନ୍ଧୀ ତାଙ୍କର ସମସ୍ତ ସମ୍ପତ୍ତି ସରକାରଙ୍କୁ ଦାନ କରିଥିଲେ । ସେ ଆନନ୍ଦ ଭବନ ମଧ୍ୟ ଦାନ କରିଥିଲେ। ଆଉ ଏହା ପରେ ବି ସେ ମିଛ କହୁଛନ୍ତି । ୧୦ ବର୍ଷ ମଧ୍ୟରେ ସେ ସ୍ଲୋଗାନ ଦେବା ବ୍ୟତୀତ ଆଉ କିଛି କରିନାହାନ୍ତି ଏବଂ ନିଜ ସଫଳତା ଆଧାରରେ ଭୋଟ ପାଇପାରୁନଥିବାରୁ ସେ କେବଳ କଂଗ୍ରେସକୁ ସମାଲୋଚନା କରିପାରିବେ। ଏହା ବ୍ୟତୀତ ତାଙ୍କ ପାଖରେ ଆଉ କ’ଣ ଅଛି?
ଜଣେ ମଣିଷର ମୃତ୍ୟୁ ପରେ ଉତ୍ତରାଧିକାରୀ ସମସ୍ତ ସମ୍ପତ୍ତି ନେଇପାରିବେ ନାହିଁ। କଂଗ୍ରେସ ନେତା ସାମ୍ ପିଟ୍ରୋଡା ଆମେରିକାର ଉତ୍ତରାଧିକାରୀ ଟିକସ ବାବଦରେ କହିବାକୁ ଯାଇ ଏପରି କହିଥିଲେ। ଯାହାକୁ ନେଇ ବିବାଦ ତେଜିଛି। ଏହି ପ୍ରସଙ୍ଗରେ ଶାସକ ବିଜେପିର ଆକ୍ରମଣକୁ ଜୋରଦାର କରିବା ପାଇଁ ଗୁରୁବାର ଦିନ ପ୍ରଧାନମନ୍ତ୍ରୀ ମୋଦୀ ଉତ୍ତରାଧିକାରୀ ଟିକସ ଉପରେ ବର୍ଷିଥିଲେ। କଂଗ୍ରେସ ମଣିଷର ମୃତ୍ୟୁ ପରର ସମ୍ପତ୍ତି ଉପରେ ନଜର ରଖିଛି ବୋଲି କହିଥିଲେ।
ରାଜନାନ୍ଦଗାଓଁରୁ ନିର୍ବାଚନ ଲଢୁଥିବା ବାଘେଲ ବିଜେପି ପ୍ରାର୍ଥୀ ସନ୍ତୋଷ ପାଣ୍ଡେଙ୍କ ଠାରୁ ପ୍ରତିଦ୍ୱନ୍ଦ୍ୱିତାର ସମ୍ମୁଖୀନ ହୋଇଛନ୍ତି। ଛତିଶଗଡର ମହାସମୁନ୍ଦ ଓ କାଙ୍କେର ଭଳି ଅନ୍ୟ ନିର୍ବାଚନ ମଣ୍ଡଳୀରେ ମଧ୍ୟ ବିଜେପି ଓ କଂଗ୍ରେସ ମହାସମୁନ୍ଦରେ ରୂପ କୁମାରୀ ଚୌଧୁରୀ ଓ ତାମ୍ରଧ୍ୱଜ ସାହୁ ଏବଂ କାଙ୍କେରରେ ଭୋଜରାଜ ନାଗ ଓ ବୀରେଶ ଠାକୁରଙ୍କୁ ପ୍ରାର୍ଥୀ କରିଛନ୍ତି।
ମତଦାନ ଦିନ ବାଘେଲ ବିଭିନ୍ନ ବୁଥ୍ ପରିଦର୍ଶନ କରି ଅସହ୍ୟ ଗରମ ସତ୍ତ୍ୱେ ଅଧିକ ମତଦାନ ଓ ଉତ୍ସାହ ଦେଖିଥିଲେ। ଗଣତନ୍ତ୍ର ଓ ସାମ୍ବିଧାନିକ ସଂରକ୍ଷଣ ଉପରେ ଗୁରୁତ୍ୱ ଦେଇ ଭୋଟ ଦେବାକୁ ସେ ନାଗରିକମାନଙ୍କୁ ଅନୁରୋଧ କରିଛନ୍ତି।
ପୂର୍ବାହ୍ନ ୧୧ଟା ସୁଦ୍ଧା ଛତିଶଗଡ଼ରେ ୩୫.୪୭% ମତଦାନ ହୋଇଥିବା ବେଳେ ଲୋକସଭା ନିର୍ବାଚନ ୨୦୨୪ର ଦ୍ୱିତୀୟ ପର୍ଯ୍ୟାୟ ମତଦାନ ୧୨ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ୮୮ଟି ନିର୍ବାଚନ ମଣ୍ଡଳୀର ସକାଳ ୭ଟାରୁ ଆରମ୍ଭ ହୋଇଛି।
Comments are closed.