ସିନ୍ଦୂର, ମୋଦି, ଆତଙ୍କୀ ଆକ୍ରମଣ…କାନ୍ସରେ ଚମକାଇଲା ଏମିତି ଫ୍ୟାସନ୍!

ନୂଆଦିଲ୍ଲୀ: କାନ୍ସ ଫିଲ୍ମ ଫେଷ୍ଟିଭାଲ, କେବଳ ବିଶ୍ୱ ସିନେମାର ଏକ ପ୍ରମୁଖ ଉତ୍ସବ ନୁହେଁ, ବରଂ ଶୋ-ଷ୍ଟପିଂ ଫ୍ୟାଶନ ପାଇଁ ମଧ୍ୟ ଏକ ପ୍ରମୁଖ ମଞ୍ଚ । ସବୁ ବର୍ଷ କାନ୍ସରେ କିଛି ନା କିଛି ଭିନ୍ନ ଦେଖିବାକୁ ମିଳେ। ହେଲେ ଏହି ବର୍ଷ, କାନ୍ସ ଫିଲ୍ମ ଫେଷ୍ଟିଭାଲ କେବଳ ସିନେମା ଏବଂ ରେଡ କାର୍ପେଟ ଗ୍ଲାମର ଭିତରେ ସୀମିତ ନାହିଁ ବରଂ ରାଜନୈତିକ ନାଟକର ମଧ୍ୟ ଅଂଶ ପାଲଟିଛି । କାନ୍ସରେ ସମସ୍ତଙ୍କୁ ଚମକାଇଛି ଭାରତ । ପ୍ରଧାନମନ୍ତ୍ରୀ ମୋଦି, ସିନ୍ଦୂର, ଆଉ ଆତଙ୍କୀ ଆକ୍ରମଣକୁ ବିଶ୍ବ ଆଗରେ ପ୍ରଦର୍ଶିତ କରିଛି ଭାରତ ।

ଅପରେସନ ସିନ୍ଦୂରରେ ଭାରତ ପହଲଗାମ୍ ଆକ୍ରମଣର କଡା ଜବାବ ଦେବା ପରେ ଏବେ ସାରା ବିଶ୍ବ ଆଗରେ ତାର ଗୌରବର ଗାଥା ଗାଉଛି । କାନ୍ସ ଫିଲ୍ମ ଫେଷ୍ଟିଭାଲରେ ମଧ୍ୟ ତାର ଝଲକ ଦେଖିବାକୁ ମିଳିଛି । ଗତ ୧୩ ଏପ୍ରିଲରୁ କାନ୍ସ ଫିଲ୍ମ ଫେଷ୍ଟିଭାଲ୍ ଆରମ୍ଭ ହେବା ପରଠାରୁ, ସାରା ବିଶ୍ବ ‘କାନ୍ସ କୁଇନ୍’ ଐଶ୍ୱର୍ଯ୍ୟା ରାୟ ବଚ୍ଚନଙ୍କ ରେଡ୍ କାର୍ପେଟ ଲୁକ୍ ପାଇଁ ଚାତକ ଭଳି ଚାହିଁ ରହିଥିବା ବେଳେ ମନୀଷ ମଲୋହୋତ୍ରାଙ୍କ ବନାରସୀ ଶାଢ଼ିରେ ସେ ପୂରା ବିଶ୍ବର ଦୃଷ୍ଟି ଆକର୍ଷଣ କରିଛନ୍ତି । କିନ୍ତୁ ସବୁଠୁ ବେଶୀ ଚର୍ଚ୍ଚା ହେଉଛି ତାଙ୍କ ମଥାରେ ସେ ଜଳଜଳ କରି ଦେଖାଯାଉଥିବା ଲାଲ୍ ସିନ୍ଦୁରକୁ ନେଇ । ଅନ୍ତର୍ଜାତୀୟ ରେଡ୍ କାର୍ପେଟରେ ଐଶ୍ବର୍ଯ୍ୟ ଲାଲ୍ ସିନ୍ଦୁର ପିନ୍ଧି ଭାରତ ଅପରେସନ ସିନ୍ଦୁର ନେଇ ବଡ ବାର୍ତ୍ତା ଦେଇଥିବା ଚର୍ଚ୍ଚା ହେଉଛି । ଏହାକୁ ନେଇ ଜଣେ ଫ୍ୟାନ୍ସ ଲେଖିଛନ୍ତି, ବିଶ୍ୱ ମଞ୍ଚରେ ‘ଅପରେସନ୍ ସିନ୍ଦୂର’କୁ ଏହିପରି ସମ୍ମାନ ଦିଅନ୍ତି। କୌଣସି ଟ୍ୱିଟ୍ ନାହିଁ, କୌଣସି ବିବୃତ୍ତି ନାହିଁ, କୌଣସି ପ୍ଲାକାର୍ଡ ନାହିଁ। କାର୍ଯ୍ୟ ଶବ୍ଦ ଅପେକ୍ଷା ଅଧିକ ଉଚ୍ଚ ସ୍ୱରରେ କଥା ହୁଏ। ସେହିପରି ଆକର୍ଷଣୀୟ ଭାବରେ, ଅଦିତି ରାଓ ହାଇଦରୀ ମଧ୍ୟ କାନ୍ସରେ ଲାଲ୍ ଶାଢୀ ସହ ଲାଲ୍ ବିନ୍ଦି ଆଉ ମଥାରେ ସିନ୍ଦୂର ମଧ୍ୟ ପିନ୍ଧିଥିଲେ। ତେବେ ହିନ୍ଦୁ ସଂସ୍କୃତିରେ ସିନ୍ଦୁର କିମ୍ବା ସିନ୍ଦୁରକୁ ଏକ ପବିତ୍ର ପ୍ରତୀକ ଏବଂ ନାରୀ ଶକ୍ତିର ଏକ ପ୍ରତୀକ ଭାବରେ ବିବେଚନା କରାଯାଇଥିବା ବେଳେ ସମ୍ପ୍ରତି ଅପରେସନ ସିନ୍ଦୂର ସହ ଏହାକୁ ଯୋଡା ଯାଉଛି ।

ଖାଲି ସେତିକି ନୁହେଁ, ଏହି ସମୟରେ, ମଡେଲ ତଥା ଅଭିନେତ୍ରୀ ସୋନମ ଛାବ୍ରାଙ୍କୁ ଦେଶର ଚାରୋଟି ଭୂତପୂର୍ଣ୍ଣ ତାରିଖକୁ ନିଜ ଗାଉନରେ କଏଦ୍ କରିଥିବାର ଦେଖିବାକୁ ମିଳିଥିଲା । ଯେଉଁଥିରେ ୨୦୦୮ – ମୁମ୍ବାଇ, ୨୦୧୬ – ଉରି,୨୦୧୯ – ପୁଲୱାମା, ଏବଂ ୨୦୨୫ – ପହଲଗାମ୍’, ଯାହା ଉପରେ ‘ଅନବ୍ରୋକେନ୍’ ଶବ୍ଦ ଲେଖାଯାଇଛି। ଅଭିନେତା, ତାଙ୍କ ପୋଷାକ ମାଧ୍ୟମରେ, ଭାରତୀୟ ଲୋକଙ୍କ ସ୍ଥିରତା ଏବଂ ଅମର ଆତ୍ମାକୁ ଶ୍ରଦ୍ଧାଞ୍ଜଳି ଜଣାଇଥିଲେ ।

ଅଭିନେତ୍ରୀ ଏବଂ ମଡେଲ, ରୁଚି ଗୁଜ୍ଜର ମଧ୍ୟ ନିଆରା ଢଙ୍ଗରେ ନଜର ଆସିଥିଲେ । କାନ୍ସ ରେଡ କାର୍ପେଟରେ ଏକ ବ୍ରାଇଡ୍ ଅବତାରରେ ଚାଲିଥିବା ବେଳେ, ତାଙ୍କରେ ବେକରେ ଥିବା ନେକପିସଟି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା । ଯେଉଁଥିରେ ଲାଗିଥିବା ପେଣ୍ଡେଣ୍ଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଫଟୋ ଥିବା ଏକ କଷ୍ଟମାଇଜଡ ହାର ଥିଲା । ତେବେ ଏହାକୁ ନେଇ ଅନେକ ସମୋଲୋଚନାର ଶିକାର ହୋଇଛନ୍ତି ଗୁଜ୍ଜର ।