କଟକ: ତଦନ୍ତରେ ସହଯୋଗ ନକରିବାରୁ କଣ୍ଠଶିଳ୍ପୀ ସୌରିନ୍ ଭଟ୍ଟଙ୍କ ବିରୋଧରେ କମିଶନରେଟ ପୋଲିସ କୋର୍ଟରେ ତାଙ୍କ ବିରୋଧରେ ଜାମିନ ବିହୀନ ଓ୍ୱାରେଣ୍ଟ୍ (ଏନବିଡବ୍ଲ୍ୟୁ) ଆବେଦନ କରିବାକୁ ଯୋଜନା କରିଛି। ଜଣେ ମହିଳା ତାଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ ଆଣିବା ପରେ ଫେରାର ଅଛନ୍ତି ସଂପୃକ୍ତ ଲୋକପ୍ରିୟ କଣ୍ଠଶିଳ୍ପୀ।
ସୋମବାର କଟକ ଡିସିପି ପିନାକ ମିଶ୍ର କହିଛନ୍ତି ଯେ, ଲୁକ୍ ଆଉଟ୍ ନୋଟିସ୍ ଜାରି କରିବା ସହ ତାଙ୍କ ବ୍ୟାଙ୍କ୍ ଆକାଉଣ୍ଟ୍ ଫ୍ରିଜ୍ କରିବା ପରେ ମଧ୍ୟ ପୋଲିସ ତାଙ୍କୁ ଖୋଜିବାରେ ଅସମର୍ଥ ହୋଇଛି। ପୁଲିସ ଟିମ୍ ସୌରିନଙ୍କ ଘରକୁ ମଧ୍ୟ ଦୁଇ ଦୁଇ ଥର ଯାଇ ଛାନଭିନ୍ କରିଛି। କିନ୍ତୁ ସେମାନେ ତାଙ୍କୁ ପାଇନଥିଲେ।
ଯେହେତୁ ସୌରୀନ ଭଟ୍ଟ ତଦନ୍ତରେ ସହଯୋଗ କରିବାକୁ ଆଗେଇ ଆସି ନାହାନ୍ତି କିମ୍ବା ପୁଲିସ ତାଙ୍କୁ ଖୋଜିବାରେ ସକ୍ଷମ ହୋଇନାହିଁ, ତେଣୁ ତାଙ୍କ ବିରୋଧରେ ଏନ୍ବିଡବ୍ଲ୍ୟୁ ଆବେଦନ କରିବାକୁ ଆମେ କୋର୍ଟକୁ ଯିବାର ଯୋଜନା କରୁଛୁ ବୋଲି ପିନାକ ମିଶ୍ର କହିଛନ୍ତି।
ସୋରିନ୍ ଓଡ଼ିଶା ହାଇକୋର୍ଟରୁ ମଧ୍ୟବର୍ତ୍ତୀକାଳୀନ ସୁରକ୍ଷା ପାଇଥିଲେ। ପରେ ହାଇକୋର୍ଟ ତାଙ୍କୁ ତଦନ୍ତକାରୀ ଅଧିକାରୀଙ୍କ ନିକଟରେ ହାଜର ହେବାକୁ ନିର୍ଦ୍ଦେଶ ଦେଇଥିଲେ। କୋର୍ଟଙ୍କ ନିର୍ଦ୍ଦେଶ ସତ୍ତ୍ୱେ ଗାୟକ ପହଞ୍ଚି ନ ପାରିବାରୁ ପୁଲିସ ତାଙ୍କ ବିରୋଧରେ ଲୁକ୍ ଆଉଟ୍ ସର୍କୁଲାର ଜାରି କରିଥିଲା ଯାହା ଏବେ ବି ବଳବତ୍ତର ରହିଛି।
ଆମେ ତାଙ୍କ କିଛି ବ୍ୟାଙ୍କ ଆକାଉଣ୍ଟକୁ ମଧ୍ୟ ଫ୍ରିଜ୍ କରିଦେଇଛୁ। କିନ୍ତୁ ସୌରିନଙ୍କର ଏଯାଏଁ ପତ୍ତା ମିଳିନାହିଁ। ତେଣୁ ଆମେ ତାଙ୍କ ବିରୋଧରେ କୋର୍ଟରେ ଏନବିଡବ୍ଲ୍ୟୁ ଜାରି କରିବା ପାଇଁ ଆବେଦନ କରିବୁ ବୋଲି ସେ କହିଛନ୍ତି।
ସୂଚନାଯୋଗ୍ୟ, ୪୨ ବର୍ଷୀୟ ସୌରିନଙ୍କ ବିରୋଧରେ କଟକ ସହରର ଜଣେ ବାସିନ୍ଦା ଯିଏକି ଏକ ଘରୋଇ ବ୍ୟାଙ୍କରେ କାମ କରନ୍ତି, ଜୁନ୍ ୧୨ ତାରିଖରେ ମହିଳା ଥାନାରେ ଏତଲା ଦେଇଥିଲେ। ବିବାହ, ପ୍ରତାରଣା, ନିର୍ଯାତନା ଓ ଶୋଷଣ ଭଳି ମିଥ୍ୟା ପ୍ରତିଶ୍ରୁତି ଦେଇଥିବା ଅଭିଯୋଗ ଆଣିଛନ୍ତି ମହିଳା। ଏହା ସହ ଗାୟିକା ଜଣକ ତାଙ୍କ ଠାରୁ ୧୦ ଲକ୍ଷ ଟଙ୍କା ନେଇଥିବା ସେ ଅଭିଯୋଗ କରିଛନ୍ତି।
Comments are closed.