ଭୁବନେଶ୍ବର: ପୁଣି ମୁହାଁମୁହିଁ ହୋଇଛନ୍ତି ଶାସକ ବିରୋଧୀ । ରାଜ୍ୟରେ ଆଇନ ଶୃଙ୍ଖଳାକୁ ନେଇ ପୁଣି ଥରେ ଆରୋପପ୍ରତ୍ୟାରୋପ ସାମନାକୁ ଆସିଛି । ନୂଆ ସରକାର ଶାସନକୁ ଆସିବା ପରଠାରୁ ରାଜ୍ୟରେ ଆଇନ ବ୍ୟବସ୍ଥା ସଂପୂର୍ଣ୍ଣ ବିପର୍ଯ୍ୟସ୍ତ ହୋଇଛି । ସରକାରଙ୍କ ନିୟନ୍ତ୍ରଣ ବାହାରେ ରହିଛି ବୋଲି କହି ବିଜେଡି ତାତ୍ସଲ୍ୟ କରିଥିବା ବେଳେ, ଏହାର କଡା ଜବାବ ରଖିଛି ବିଜେପି । ୨୪ ବର୍ଷ କାଳ ବିଜେଡି ତାଙ୍କ ସରକାର ସମୟରେ କ’ଣ କରିଥିଲେ, ତାହା ଦୋହରାଇଛି ।
ତେବେ ଏନେଇ ବିଜେଡି ବରିଷ୍ଠ ନେତା ତଥା ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ, ବିଜେପି ସରକାରଙ୍କୁ ତାତ୍ସଲ୍ୟ କରି କହିଛନ୍ତି, ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ଆଉ ସରକାରଙ୍କ ନିୟନ୍ତ୍ରଣରେ ନାହିଁ । ସରକାର ଏଥିରେ ବିଫଳ ହୋଇଛନ୍ତି । ରାଜଧାନୀ ସମେତ ସାରା ରାଜ୍ୟରେ ଆଇନ ଶୃଙ୍ଖଳା ଭୁଶୁଡ଼ିଛି । ପୋଲିସର ନିୟନ୍ତ୍ରଣ ନାହିଁ । ବିଧାନସଭା ଭିତରେ ଆଉ ବାହାରେ ପୋଲିସ କର୍ତ୍ତୁତ୍ୱ ଦେଖାଉଛନ୍ତି । ଭୁବନେଶ୍ୱରର ଭରତପୁର ଓ କବିସୂର୍ଯ୍ୟନଗର ଘଟଣା ଏହା ପ୍ରମାଣିତ କରୁଛି । ଏ ସରକାରରେ ପ୍ରତି କଥାରେ ରାଜନୈତିକ ହସ୍ତକ୍ଷେପ ରହୁଛି ବୋଲି ଅଭିଯୋଗ କରିଛନ୍ତି ପ୍ରସନ୍ନ । ସରକାରୀ ଦଳର ସାଧାରଣ କର୍ମୀ ପୋଲିସ କାମରେ ହସ୍ତକ୍ଷେପ କରୁଛନ୍ତି । ପୋଲିସ ସ୍ୱାଧୀନ ଭାବେ କାମ କରୁନଥିବାରୁ ଅପରାଧ ବଢୁଛି । ସରକାରୀ ଦଳ ପୋଲିସ ଉପରେ ଚାପ ନ ପକାନ୍ତୁ । ପୋଲିସ ଵି ଅପରାଧରେ ସମ୍ପୃକ୍ତ ରହୁଥିବା ରିପୋର୍ଟ ଆସୁଛି ବୋଲି କହିଛନ୍ତି ପ୍ରସନ୍ନ । ବିଜେପି ବହୁ କଷ୍ଟରେ ଶାସନକୁ ଆସିଛି । ସେମାନେ ନିଜ କର୍ମୀଙ୍କୁ ପୋଲିସ ଉପରେ ହସ୍ତକ୍ଷେପ ଉପରୁ ନିବୃତ ରଖିବା କଥା, ନ ହେଲେ ଆହୁରି ଆଇନ ଶୃଙ୍ଖଳା ବିଗିଡିବ ବୋଲି କହିଛନ୍ତି ପ୍ରସନ୍ନ ।
ପ୍ରସନ୍ନଙ୍କ ଏଭଳି ଆରୋପକୁ କଡା ଜବାବ ଦେଇଛନ୍ତି ବିଜେପି ବିଧାୟକ ଅମର ନାୟକ । ସେ କହିଛନ୍ତି, ଗଲାଦିନର ଆଇନ ଶୃଙ୍ଖଳାକୁ ତର୍ଜମା କରାଯାଇଛି । ମୁଖ୍ୟମନ୍ତ୍ରୀଙ୍କ ପ୍ରଥମ ପ୍ରାଥମିକତା ହେଉଛି ଆଇନ ଶୃଙ୍ଖଳା । ପୁର୍ବ ଅପେକ୍ଷା ୪.୨ ପ୍ରତିଶତ ହାରରେ ନାରୀ ନିର୍ଯାତନା କମିଛି । ବିରୋଧୀଙ୍କ ଅଭିଯୋଗ ସମ୍ପୂର୍ଣ୍ଣ ମିଛ । ପୂର୍ବ ସରକାରର ୨୪ ବର୍ଷ ଇତିହାସ ଦେଖିଲେ, ପୋଲିସ, ଦଳୀୟ କର୍ମୀ ଭଳି କାମ କରୁଥିଲେ । ମାହାଙ୍ଗା ଡବଲ ମର୍ଡର, ପରୀ, ବେବିନା କେସକୁ ଏବେ ବିଜେଡି ଭୁଲି ଯାଇଛି । ସେତେବେଳେ କାର୍ଯ୍ୟାନୁଷ୍ଠାନ ନେବାର ସାହାସ ନ ଥିଲା । ବର୍ତ୍ତମାନ ସବୁ କେସରେ ଦୋଷୀ ଧରା ପଡୁଛନ୍ତି । ସେତେବେଳେ କେହି ଜଣେ ଧରା ପଡିଛନ୍ତି କି ବୋଲି ପ୍ରଶ୍ନ କରିଛନ୍ତି ଅମର ।
ଏଥିସହିତ ପୋଲିସ ଉପରେ ଭୟ ନ ଥିବା ଅଭିଯୋଗରେ ଭଅର କହିଚନ୍ତି, ବିଜେଡିର ଏ ଯାଏଁ ସରକାରରେ ଥିବା ହ୍ୟାଙ୍ଗ ଓଭର୍ ଯାଇନି । ତେଣୁ ସେମାନେ ଏ ଅଭିଯୋଗ କରୁଛନ୍ତି । ଏଥିରେ କୌଣସି ଭିତ୍ତି ନାହିଁ । ନିରଞ୍ଜନ ପଟ୍ଟନାୟକ ଘରେ ପଶିଥିବା ଦୋଷୀ ଧରାପିଡ଼ିଛି । ପ୍ରବାସୀ ଭାରତୀୟ ଦିବସ ସମୟରେ ଭୁବନେଶ୍ୱରରେ ହୋଇଥିବା ହତ୍ୟାର ହତ୍ୟାକାରୀ ମଧ୍ୟ ଧରା ପଡ଼ିଛନ୍ତି । ବିଧାନସଭା ନିୟମ ଅନୁସାରେ ଚାଲେ । କୌଣସି ଜନପ୍ରତିନିଧିଙ୍କ ଉପରେ ପୋଲିସ କର୍ତ୍ତୃତ୍ୱ ଦେଖାଉ ନାହିଁ ବୋଲି ବିଜେଡିର ଦାବିକୁ ଖଣ୍ଡନ କରିଛନ୍ତି ବିଜେପି ବିଧାୟକ ।
Comments are closed.