କଟକ: ପ୍ରତିମା ବେହେରା ଓ ସବିତା ଦାସ ଏବେ ଉତ୍ସାହିତ। ରାକ୍ଷୀ ତିଆରି କରି ବ୍ୟବସାୟ କରନ୍ତି। ତାଙ୍କ ରାକ୍ଷୀର ଅନେକ ଗ୍ରାହକ ରହିଛନ୍ତି। କିନ୍ତୁ ଏବେ ତାଙ୍କ ଦ୍ବାରା ପ୍ରସ୍ତୁତ ରାକ୍ଷୀ ବନ୍ଧା ହେବ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ହାତରେ। ଯିଏକି ଏବେ ବିଶ୍ବର ସବୁଠୁ ଲୋକପ୍ରିୟ ଏବଂ ଅନ୍ୟତମ କ୍ଷମତାଶାଳୀ ବ୍ୟକ୍ତି। ରାକ୍ଷୀ ପୂର୍ଣ୍ଣିମାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ରାକ୍ଷୀ ବାନ୍ଧିବା ପାଇଁ ଯେଉଁ ଭାଗ୍ୟଶାଳୀ ବ୍ୟକ୍ତିମାନଙ୍କୁ ଚୟନ କରାଯାଇଛି ସେମାନଙ୍କ ମଧ୍ୟରେ ଏମାନେ ମଧ୍ୟ ସାମିଲ ହୋଇଛନ୍ତି।
ଉଭୟ ପ୍ରତିମା ଓ ସବିତାଙ୍କ ଘର କଟକ ଜିଲ୍ଲା ଆଠଗଡ଼ରେ। ଏହି ରାକ୍ଷୀ ବନ୍ଧନରେ ରାକ୍ଷୀ ବାନ୍ଧିବା ପାଇଁ ପ୍ରଧାନମନ୍ତ୍ରୀଙ୍କ ବାସଭବନରେ ଉପସ୍ଥିତ ରହିବାକୁ ନିମନ୍ତ୍ରଣ ପାଇଥିବା ଅନ୍ୟ ୫୦ ଜଣଙ୍କ ମଧ୍ୟରେ ସେମାନେ ମଧ୍ୟ ସାମିଲ ଅଛନ୍ତି। ଦୁହେଁ କାରିଗର ଏବଂ ସେମାନେ ଖଦି ସମେତ ବିଭିନ୍ନ ସାମଗ୍ରୀ ତିଆରି କରନ୍ତି।
ଆମେ ନିଜକୁ ଭାଗ୍ୟବାନ ମନେ କରୁଛୁ। ପ୍ରଧାନମନ୍ତ୍ରୀଙ୍କୁ ଆମେ କେବେ ବ୍ୟକ୍ତିଗତ ଭାବେ ଦେଖିନାହୁଁ ଏବଂ ତାଙ୍କ ହାତରେ ରାକ୍ଷୀ ବାନ୍ଧିବା ଆମ ପାଇଁ ସ୍ୱପ୍ନ ସାକାର ହେବା ଭଳି। ଆମେ ସୁଯୋଗ ପାଇଥିବାରୁ ଏହା ନିଶ୍ଚିତ ଭାବେ ଏକ ଚମତ୍କାର ଅନୁଭୂତି ବୋଲି ପ୍ରତିମା କହିଛନ୍ତି।
ମୋଦି ‘ଭୋକାଲ ଫର ଲୋକାଲ’ ମିଶନ ଜରିଆରେ ସ୍ଥାନୀୟ କାରିଗରଙ୍କୁ ପ୍ରୋତ୍ସାହିତ କରୁଛନ୍ତି। ଆମେ ମହିଳା ବିକାଶ ପରିଷଦର ସଦସ୍ୟମାନେ ରାକ୍ଷୀ ପ୍ରସ୍ତୁତ କରିଥାଉ। ମାତ୍ର ପାଞ୍ଚ ଦିନ ତଳେ ଆମେ କେଭିଆଇସି ଅଫିସରୁ ସୂଚନା ପାଇଥିଲୁ ଏବଂ ସେହି ଅନୁସାରେ ଆମେ ରାକ୍ଷୀ ପ୍ରସ୍ତୁତ କରିଛୁ ବୋଲି ସେ କହିଛନ୍ତି।
ମଜାଦାର କଥା ହେଉଛି ସେ ବାନ୍ଧିବାକୁ ଥିବା ରାକ୍ଷୀକୁ ଟସର ବ୍ୟବହାର କରି ପ୍ରସ୍ତୁତ କରାଯାଉଛି। ଏଥିରେ ଆମେ ତୁଳସୀ ଓ ରୁଦ୍ରାକ୍ଷ ମିଶାଇଛୁ ବୋଲି ସବିତା କହିଛନ୍ତି।
ସବିତାଙ୍କ କହିବାନୁସାରେ, ଏହି ରାକ୍ଷୀର କ୍ରେଜ୍ ମଧ୍ୟ ରହିଛି ଏବଂ ଏହାର ଦାମ ମଧ୍ୟ ୫୦ ଟଙ୍କାରୁ ଅଧିକ ରହିଛି। ବଜାରରେ ଅନେକ ଫ୍ୟାନ୍ସି ଆଇଟମ୍ ଭରି ରହିଥିଲେ ମଧ୍ୟ ଜଣେ ରାକ୍ଷୀ ପ୍ରସ୍ତୁତ କରି ଜୀବିକା ନିର୍ବାହ କରିପାରିବ।
ସମସ୍ତେ ଆମର ରାକ୍ଷୀକୁ ଦେଖି ଆମକୁ ଅଧିକ ପ୍ରସ୍ତୁତି ପାଇଁ ଉତ୍ସାହିତ କରିଥିଲେ। ହାତରେ ବୁଣାଯାଇଥିବା ରାକ୍ଷୀ ଆମର ନିଜସ୍ୱ ଉତ୍ପାଦକୁ ବ୍ୟବହାର କରିବା ଦ୍ୱାରା କାରିଗରମାନେ ନିଶ୍ଚିତ ଭାବେ ଲାଭବାନ ହୋଇପାରିବେ ଏବଂ ସେମାନେ ଏକ ଉତ୍ତମ ଜୀବିକା ଅର୍ଜନ କରିପାରିବେ ବୋଲି ସବିତା କହିଛନ୍ତି।
Comments are closed.