ଦ୍ଵିତୀୟ ପର୍ଯ୍ୟାୟ ଲାଗି ଆଜି ସରୁଛି ପ୍ରଚାର: ଭାଇ ପାଇଁ ୱାୟନାଡ଼ରେ ପ୍ରିୟଙ୍କା ଗାନ୍ଧୀଙ୍କ ଜୋରଦାର ପ୍ରଚାର

ନୂଆଦିଲ୍ଲୀ: ସାଧାରଣ ନିର୍ବାଚନର ଦ୍ଵିତୀୟ ପର୍ଯ୍ୟାୟ ଲାଗି ଆଜି ସରୁଛି ପ୍ରଚାର। ଏଥିଲାଗି ଆସନ୍ତା ୨୬ ଏପ୍ରିଲରେ ଭୋଟଗ୍ରହଣ ହେବ। ଗୋଟିଏ ପଟେ ବିଜେପିର ଷ୍ଟାର ପ୍ରଚାରକମାନେ ନିର୍ବାଚନ ମଇଦାନକୁ ଓହ୍ଲାଇ ଜୋରଦାର ପ୍ରଚାର କରୁଥିବାବେଳେ ଅନ୍ୟପଟେ ମିଶନ ୨୦୨୪କୁ ଜିତିବା ପାଇଁ କଂଗ୍ରେସର ହେବିୱେଟ୍ ନେତା ମଧ୍ୟ ନିର୍ବାଚନ ଦାୟିତ୍ୱ ଗ୍ରହଣ କରି ପ୍ରଚାରକୁ ଜୋରଦାର କରୁଛନ୍ତି। ପ୍ରଚାରର ଦ୍ୱିତୀୟ ପର୍ଯ୍ୟାୟର ଶେଷ ଦିନରେ ପ୍ରିୟଙ୍କା ଗାନ୍ଧୀ କେରଳର ୱାୟନାଡରେ ଏକ ନିର୍ବାଚନ ରାଲିରେ ସମ୍ବୋଧିତ କରିବେ। ସେ ତାଙ୍କ ଭାଇ ରାହୁଲ ଗାନ୍ଧୀଙ୍କ ପାଇଁ ସାଧାରଣ ଲୋକଙ୍କଠାରୁ ଭୋଟ୍ ଭିକ୍ଷା କରିବେ। କଂଗ୍ରେସର ସାଧାରଣ ସମ୍ପାଦକ ତିନୋଟି ପୃଥକ ବୈଠକ ମଧ୍ୟ କରିବେ। ଦ୍ୱିତୀୟ ପର୍ଯ୍ୟାୟ ମତଦାନ ପାଇଁ ଆଜି ସରୁଛି ନିର୍ବାଚନ ପ୍ରଚାର । ୧୩ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ୮୯ଟି ଆସନରେ ଏପ୍ରିଲ ୨୬ରେ ହେବ ମତଦାନ ।

ଏଥି ସହିତ ରାହୁଲ ଗାନ୍ଧୀ ମହାରାଷ୍ଟ୍ର ଗସ୍ତ କରିବେ। ଯେଉଁଠାରେ ସେ ଅମରାବତୀ କଂଗ୍ରେସ ପ୍ରାର୍ଥୀ ବଳବନ୍ତ ୱାନଖେଡେଙ୍କ ପାଇଁ ଦିନ ୧.୧୫ ସମୟରେ ଏକ ସାଧାରଣ ସଭାକୁ ସମ୍ବୋଧିତ କରିବେ। ଅମରାବତୀ ପରେ ରାହୁଲ ଗାନ୍ଧୀ ଅପରାହ୍ନ ୩.୫୫ ରେ ସୋଲାପୁର ଗସ୍ତ କରିବେ ଏବଂ ସେଠାରେ ସେ କଂଗ୍ରେସ ପ୍ରାର୍ଥୀ ପ୍ରଣୀତି ସିନ୍ଦେଙ୍କ ପାଇଁ ପ୍ରଚାର କରିବେ। ଏହା ବ୍ୟତୀତ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ ଆଜି କର୍ଣ୍ଣାଟକ ଗସ୍ତ କରିବେ, ଯେଉଁଠାରେ ସେ ଅନେକ ସାଧାରଣ ସଭା କରିବାର କାର୍ଯ୍ୟକ୍ରମ ରହିଛି। ଖଡ଼ଗେ ପ୍ରଥମେ କୁଲବର୍ଗୀ ଯାଇ ମଧ୍ୟାହ୍ନ ୧୨ଟାରେ ଅଫଜାଲପୁରରେ ଏକ ସାଧାରଣ ସଭା କରିବେ। କର୍ଣ୍ଣାଟକର ଆଲନ୍ଦରେ ଅପରାହ୍ନ ୨.୩୦ରେ ଏକ ସାଧାରଣ ସଭାକୁ ସମ୍ବୋଧିତ କରି ଅପରାହ୍ନ୫.୩୦ରେ ଅନ୍ୟ ଏକ ସମାବେଶକୁ ସମ୍ବୋଧିତ କରିବେ।

କଂଗ୍ରେସର ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ କଡ଼ା ଟକ୍କର ଦେବା ମୁଡରେ ନଜର ଆସିଛନ୍ତି। ଗତକାଲି କର୍ଣ୍ଣାଟକର ବେଙ୍ଗାଲୁରୁରେ ଏକ ସାଧାରଣ ସଭାରେ ସମ୍ବୋଧିତ କରିବାବେଳେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ଆକ୍ରମଣ କରିଥିଲେ। ସେ ମଙ୍ଗଲସୁତ୍ର ସମ୍ବନ୍ଧରେ ପ୍ରଧାନମନ୍ତ୍ରୀଙ୍କ ବିବୃତ୍ତିରେ ପାଲଟା ଜବାବ ଦେଇଥିଲେ। ଏନେଇ ପ୍ରିୟଙ୍କା ଗାନ୍ଧୀ କହିଛନ୍ତି, ଗତ ଦୁଇ ଦିନ ଧରି କଂଗ୍ରେସ ନାଁରେ ମିଥ୍ୟା ପ୍ରଚାର କରାଯାଉଛି ଯେ, କଂଗ୍ରେସ ଆପଣଙ୍କ ମଙ୍ଗଳସୁତ୍ର ଏବଂ ଆପଣଙ୍କ ସୁନାକୁ ଆପଣଙ୍କଠାରୁ ଛଡ଼େଇ ନେବାକୁ ଚାହୁଁଛି। ଏହି ଦେଶ ୭୦ ବର୍ଷ ଧରି ସ୍ୱାଧୀନ ରହିଆସିଛି। କଂଗ୍ରେସ ସରକାର ୫୫ ବର୍ଷ ଧରି କ୍ଷମତାରେ ଅଛନ୍ତି। କ୍ଷମତାରେ ଥିବା ବେଳେ କଂଗ୍ରେସ ଆପଣଙ୍କ ସୁନା ଛଡ଼ାଇ ନେଇଛି ନା ମଙ୍ଗଳସୁତ୍ରକୁ ଆପଣଙ୍କଠାରୁ ଛଡ଼ାଇ ନେଇଛି ବୋଲି ପ୍ରିୟଙ୍କ ପ୍ରଶ୍ନ ପଚାରିଛନ୍ତି।

ସେ ଆହୁରି ମଧ୍ୟ କହିଛନ୍ତି, ‘ଯେତେବେଳେ ଯୁଦ୍ଧ ହୋଇଥିଲା ସେତେବେଳେ ଇନ୍ଦିରା ଗାନ୍ଧୀ ତାଙ୍କ ଦେଶକୁ ସୁନା ଦେଇଥିଲେ। ଏହି ଦେଶ ପାଇଁ ମୋ ମା’ର ମଙ୍ଗଳସୁତ୍ରକୁ ବଳି ଦିଆଯାଇଛି। ଯଦି ମୋଦୀ ଜୀ ମଙ୍ଗଳସୁତ୍ରର ମହତ୍ତ୍ୱ ବୁଝିଥାନ୍ତେ, ତେବେ ସେ ଏପରି ଅନୈତିକ କଥା କହି ନଥାନ୍ତେ। ସୂଚନା ଥାଉକି ଯେ ଲୋକସଭା ନିର୍ବାଚନର ଦ୍ୱିତୀୟ ପର୍ଯ୍ୟାୟ ଅଭିଯାନ ଆଜି ବନ୍ଦ ହୋଇଯିବ ଏବଂ ମତଦାନ ୨୬ ଏପ୍ରିଲ ସକାଳ ୭ଟାରୁ ଆରମ୍ଭ ହୋଇ ସନ୍ଧ୍ୟା ୫ଟାରେ ଶେଷ ହେବ। ନିର୍ବାଚନ ଆୟୋଗ (ECI) ର କାର୍ଯ୍ୟସୂଚୀ ଅନୁଯାୟୀ ତୃତୀୟ ପର୍ଯ୍ୟାୟ ମେ ୭, ଚତୁର୍ଥ ପର୍ଯ୍ୟାୟ ମେ ୧୩, ପଞ୍ଚମ ପର୍ଯ୍ୟାୟ ମେ ୨୦, ଷଷ୍ଠ ପର୍ଯ୍ୟାୟ ମେ ୨୫ ଏବଂ ଶେଷ ପର୍ଯ୍ୟାୟ ଜୁନ୍ ୧ ତାରିଖରେ ଅନୁଷ୍ଠିତ ହେବ। ଭୋଟ୍ ଗଣନା ଜୁନ୍ ୪ ତାରିଖରେ କରାଯିବ। ମେ ୧୩ ତାରିଖରେ ଆନ୍ଧ୍ରପ୍ରଦେଶ ଏବଂ ଓଡିଶାରେ ବିଧାନସଭା ନିର୍ବାଚନ ଅନୁଷ୍ଠିତ ହେବ।