ଚେନ୍ନାଇ: ଚଳିତ ଆଇପିଏଲରେ ରବିବାର ଅନୁଷ୍ଠିତ ରୋମାଂଚକ ମୁକାବିଲାରେ ପଞ୍ଜାବ କିଙ୍ଗସ ୪ ୱିକେଟରେ ଚେନ୍ନାଇ ସୁପର କିଙ୍ଗସକୁ ପରାସ୍ତ କରିଛି । ପ୍ରଥମେ ବ୍ୟାଟିଂ କରି ଚେନ୍ନାଇ ୪ ୱିକେଟ ବିନିମୟରେ ୨୦୦ ରନ ସଂଗ୍ରହ କରିଥିଲା । ଡେଭନ କନୱେ ୯୨ ରନର ବିସ୍ଫୋରକ ଇନିଂସ ଖେଳିଥିଲେ । ଅନ୍ୟମାନଙ୍କ ମଧ୍ୟରେ ରିତୁରାଜ ଗାଏକ୍ୱାଡ ୩୭, ଶିବମ ଦୁବେ ୨୮ ଓ ମହେନ୍ଦ୍ର ସିଂ ଧୋନୀ ୪ ବଲରୁ ୧୩ ରନ ସଂଗ୍ରହ କରିଥିଲେ ।
ଅର୍ଶଦୀପ ସିଂ, ସାମ କୁରାନ, ରାହୁଲ ଚହର ଓ ସିକନ୍ଦର ରାଜା ଗୋଟିଏ ଲେଖାଁଏ ୱିକେଟ ଅକ୍ତିଆର କରିଥିଲେ । ୨୦୧ ରନର ବିଜୟ ଲକ୍ଷ୍ୟକୁ ପିଛା କରି ୧୭ ଓଭରରେ ୫ ୱିକେଟ ହରାଇ ୧୭୦ ରନ କରି ପଞ୍ଜାବ ଭଲ ସ୍ଥିତିରେ ରହିଥିଲା । ପ୍ରଭସିମ୍ରନ ସିଂ ୪୨, ଲିୟାମ ଲିଭିଂଷ୍ଟୋନ ୪୦, ଜିତେଶ ଶର୍ମା ୨୧ ଓ ସାମ କୁରାନ ୨୯ ରନ କରିଥିଲେ ।
ଶେଷ ୩ ଓଭରରେ ଆଉ ୩୧ ରନ ଆବଶ୍ୟକ ହେଉଥିଲା । ପଞ୍ଜାବ ୧୮ତମ ଓଭରରେ ୯ ଓ ୧୯ତମ ଓଭରରେ ୧୩ ରନ ସଂଗ୍ରହ କରିଥିଲା । ଅନ୍ତିମ ଓଭରରେ ଦଳ ବିଜୟ ପାଇଁ ୯ ରନ ଆବଶ୍ୟକ କରୁଥିଲା । ମଥୀଶା ପାଥିରନ ଚମତ୍କାର ବୋଲିଂ ପ୍ରଦର୍ଶନ କରି ମ୍ୟାଚକୁ ରୋମାଂଚକର କରି ଦେଇଥିଲେ । ଶେଷ ବଳରେ ସିନ୍ଦର ରାଜା ୩ ରନ କରି ଦଳକୁ ବିଜୟୀ କରାଇଥିଲେ ।
ଚେନ୍ନାଇ ପକ୍ଷରୁ ତୁଷାର ଦେଶପାଣ୍ଡେ ୩ଟି ଏବଂ ରବୀନ୍ଦ୍ର ଜାଡେଜା ୨ଟି ୱିକେଟ ଅକ୍ତିଆର କରିଥିଲେ । କନୱେ ପ୍ଲେୟାର ଅଫ ଦି ମ୍ୟାଚ ବିବେଚିତ ହୋଇଥିଲେ । ଏହି ବିଜୟ ସହ ପଞ୍ଜାବ ୯ ମ୍ୟାଚରୁ ୧୦ ଏବଂ ଚେନ୍ନାଇ ପରାଜୟ ସତ୍ୱେ ୯ଟି ମୁକାବିଲାରୁ ସମାନ ପଂଏଟ ହାସଲ କରିଛି ।
Comments are closed.