ନୂଆଦିଲ୍ଲୀ: ଜଳନ୍ଧରରେ ପାକିସ୍ତାନର ISI ସମର୍ଥିତ ଆତଙ୍କବାଦୀଙ୍କ ବିରୋଧରେ ପଞ୍ଜାବ ପୋଲିସ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଗୁରୁବାର ଦିନ ବବର ଖାଲସା ଇଣ୍ଟରନ୍ୟାସନାଲ (BKI)ର ଏକ ସକ୍ରିୟ ଆତଙ୍କବାଦୀ ମଡ୍ୟୁଲ୍ ଠାବ କରାଯାଇଛି ।
ଏହି ଅପରେସନ ସମୟରେ ପୋଲିସ ଦୁଇ ଜଣ ଆତଙ୍କବାଦୀ, ଗୁରଜିନ୍ଦର ସିଂହ ଏବଂ ଦିୱାନ ସିଂହଙ୍କୁ ଗିରଫ କରିଥିଲା। ସେମାନଙ୍କ ନିକଟରୁ ୨.୫ କିଲୋଗ୍ରାମ IED (ଇମ୍ପ୍ରୋଭାଇଜଡ୍ ଏକ୍ସପ୍ଲୋସିଭ୍ ଡିଭାଇସ୍)/RDX ଏବଂ ଏକ ରିମୋଟ୍ କଣ୍ଟ୍ରୋଲ୍ ଜବତ କରାଯାଇଥିଲା।
ପଞ୍ଜାବ ପୋଲିସ ମହାନିର୍ଦ୍ଦେଶକ (ଡିଜିପି) ଗୌରବ ଯାଦବ ଏହି ସଫଳତା ଘୋଷଣା କରି କହିଛନ୍ତି ଯେ ଜବତ ହୋଇଥିବା ୨.୫ କିଲୋଗ୍ରାମ ବିସ୍ଫୋରକ ସାମଗ୍ରୀ ରାଜ୍ୟରେ ଏକ ଆତଙ୍କବାଦୀ ଆକ୍ରମଣ ପାଇଁ ଉଦ୍ଦିଷ୍ଟ ଥିଲା।
ପୋଲିସ କହିଛି ଯେ ଏହି ସମ୍ପୂର୍ଣ୍ଣ ମଡ୍ୟୁଲ୍ ପଛରେ ୟୁକେର ହ୍ୟାଣ୍ଡଲର୍ ନିଶାନ ଜୋରିଆନ୍ ଏବଂ ଆଦେଶ ଜାମରାଇ ଥିଲେ। ଏହାର ନେତୃତ୍ୱ ନେଇଥିଲା ବିକେଆଇ ନେତା ହରବିନ୍ଦର ସିଂହ ରିନ୍ଦା।
ତଦନ୍ତରୁ ଜଣାପଡ଼ିଥିଲା ଯେ ଏହି ମଡ୍ୟୁଲ୍ ଆନ୍ତର୍ଜାତୀୟ ସ୍ତରରେ ଆକ୍ଟିଭ ଥିଲା ଏବଂ ପାକିସ୍ତାନର ISI ଦ୍ୱାରା ପ୍ରାୟୋଜିତ ଥିଲା। ବ୍ରିଟେନ ସ୍ଥିତ ହ୍ୟାଣ୍ଡଲର୍ ଏବଂ BKIର ଶୀର୍ଷ ନେତୃତ୍ୱ ସ୍ଥାନୀୟ ଆତଙ୍କବାଦୀଙ୍କ ମାଧ୍ୟମରେ ପଞ୍ଜାବରେ ଭୟ ଏବଂ ଆତଙ୍କ ପ୍ରସାର କରିବାକୁ ପ୍ରସ୍ତୁତ ହୋଇଥିଲେ।
ଡିଜିପି କହିଛନ୍ତି ଯେ ଗିରଫ ଅଭିଯୁକ୍ତଙ୍କ ବିରୁଦ୍ଧରେ ଅମୃତସରରେ ବେଆଇନ କାର୍ଯ୍ୟକଳାପ (ନିବାରଣ) ଆଇନ (UAPA) ଏବଂ ବିସ୍ଫୋରକ ପଦାର୍ଥ ଆଇନର ପ୍ରାସଙ୍ଗିକ ଧାରା ଅନୁଯାୟୀ ଏକ ଏଫଆଇଆର ରୁଜୁ କରାଯାଇଛି। ଏହି ମଡ୍ୟୁଲର ଅନ୍ୟ ସଦସ୍ୟ ଏବଂ ସେମାନଙ୍କର ସମଗ୍ର ନେଟୱାର୍କକୁ ଠାବ କରିବା ପାଇଁ ପୋଲିସ ଏବେ ଜୋରଦାର ତଦନ୍ତ ଚଳାଇଛି।
Comments are closed.