ପୁରୀ : ବଡ଼ଦିନ ତଥା ଖ୍ରୀଷ୍ଟମାସ ପାଇଁ ଲୋକାରଣ୍ୟ ହୋଇଛି ଜଗନ୍ନାଥଧାମ ପୁରୀ । ସେପଟେ ଆଜି ପୁରୀ ବେଳାଭୂମିରେ ପ୍ରବଳ ଜନସମାଗମ ଦେଖିବାକୁ ମିଳୁଛି । ମନ ମୋହୁଛି ଖ୍ରୀଷ୍ଟମାସର ବାଲୁକା କଳା । ଆନ୍ତର୍ଜାତିକ ଖ୍ୟାତିସମ୍ପନ୍ନ ବାଲୁକା ଶିଳ୍ପୀ ମାନସ କୁମାର ସାହୁଙ୍କ ହାତର ଯାଦୁ ଦେଖିବା ପାଇଁ ପର୍ଯ୍ୟଟକଙ୍କ ଭିଡ । ଖ୍ରୀଷ୍ଟମାସ ପାଇଁ ବାଲିରେ କେଡେ ସୁନ୍ଦର ସାଣ୍ଟା କ୍ଲଜ୍ ତିଆରି କରିଛନ୍ତି ସେ । ମାନସ ସାହୁ ସ୍ୟାଣ୍ଡ ଆର୍ଟ ପାର୍କରେ ଏଥର ବିଭିନ୍ନ ସଚେତନତା ଭିତ୍ତିକ ବାଲୁକା କଳାମାନ କରାଯାଇଛି । ସର୍ବସାଧାରଣ ସ୍ୟାଣ୍ଡ ଆର୍ଟ ପାର୍କରେ ନିଶୁଳ୍କ ପ୍ରବେଶ କରି ବାଲୁକା କଳାକୁ ଉପଭୋଗ କରୁଛନ୍ତି ।
ରଙ୍ଗୀନ santa clause କୁ ଦେଖି ପିଲାମାନେ ଖୁସିରେ ଗଦ୍ ଗଦ୍ ହୋଇପଡୁଛନ୍ତି । ବଡଦିନର ମଜା ନେବା ପାଇଁ ପୁରୀ ବେଳାଭୂମିକୁ ଆସିଛନ୍ତି । ପିଲାମାନଙ୍କୁ ଭାରି କୌତୁକିଆ ଲାଗୁଛି ବାଲିରେ ତିଆରି ଏହି ସାଣ୍ଟା । ବାଲି ସାଣ୍ଟା ଭଳି ଜଣେ କୁନି ପିଲା ବି ସାଣ୍ଟା ବେଶ ଧରି ପର୍ଯ୍ୟଟକଙ୍କୁ ଖୁସି କରାଉଥିବା ଦେଖିବାକୁ ମିଳୁଛି ।
ପୁରୀରେ ଆଜି ଛୁଟି ମନାଇବାକୁ ପର୍ଯ୍ୟଟକଙ୍କ ପ୍ରବଳ ଭିଡ଼ ଦେଖିବାକୁ ମିଳିଛି । ଖ୍ରୀଷ୍ଟମାସ ସମସ୍ତଙ୍କ ମନରେ ଶାନ୍ତି, ଖୁସି ଭରିଦେଉ ଏହା ହିଁ କାମନା ।
