ମୁମ୍ବାଇ: ବକ୍ସ ଅଫିସରେ ଗୋଟିଏ ପରେ ଗୋଟିଏ ଫିଲ୍ମର ରେକର୍ଡ ଭାଙ୍ଗିବାରେ ଲାଗିଛି ଫିଲ୍ମ ’ପୁଷ୍ପା-୨’ । ଆଲ୍ଲୁ ଅର୍ଜୁନଙ୍କ ଅଭିନୀତ ଏହି ଫିଲ୍ମ କେବଳ ଦର୍ଶକଙ୍କ ମହଲରେ ଆଦୃତ ନୁହେଁ ବରଂ ଭଲ ରୋଜଗାର ମଧ୍ୟ କରୁଛନ୍ତି । ରିଲିଜ ହେବାର ୧୦ଦିନ ଭିତରେ ଦମଦାର ରୋଜଗାର କଲାଣି ପୁଷ୍ପା ୨ । ବିଶ୍ବବ୍ୟାପି କଲେକ୍ସନ ଏବେ ୧୦୦୦ କୋଟି ପାର କରିଥିବା ବେଳେ ଭାରତରେ ମଧ୍ୟ ଗୋଟେ ପରେ ଗୋଟେ ରେକର୍ଡ ଭାଙ୍ଗିବାରେ ଲାଗିଛି ପୁଷ୍ପା ୨ ।
ସାକନିଲ୍କର ରିପୋର୍ଟ ଅନୁଯାୟୀ, ‘ପୁଷ୍ପା ୨’ ରିଲିଜ୍ ହେବାର ପ୍ରଥମ ସପ୍ତାହରେ ୭୨୫.୮ କୋଟି ଟଙ୍କା ଆୟ କରିଥିଲା। ଚଳଚ୍ଚିତ୍ରଟି ଦ୍ୱିତୀୟ ସପ୍ତାହରେ ମଧ୍ୟ ବକ୍ସ ଅଫିସରେ ଭଲ କଲେକ୍ସନ କରିଛି । ନବମ ଦିନରେ ୩୬.୪ କୋଟି ଟଙ୍କା ସଂଗ୍ରହ କରିଥିବାବେଳେ ଦଶମ ଦିନରେ ମଧ୍ୟ ରେକର୍ଡ ତୋଡ ରୋଜଗାର କରିଛି । ଦଶମ ଦିନରେ ଫିଲ୍ମଟି ୬୨.୩ କୋଟି ରୋଜଗାର କରିଛି । ଏଥିସହ ଦଶମ ଦିନର ଆୟକୁ ମିଶାଇ ଭାରତରେ ବର୍ତ୍ତମାନ ୮୦୦ କୋଟି କ୍ଲବରେ ଏଣ୍ଟ୍ରୀ କରିଛି ପୁଷ୍ପା ୨ । ୮୦୦ କୋଟି କ୍ଲବରେ ଏଣ୍ଟ୍ରୀ କରିବା ସହ ପୁଷ୍ପା ୨ ବର୍ତ୍ତମାନ ଜୁନିୟର ଏନଟିଆର ଏବଂ ରାମ ଚରଣଙ୍କ ‘ଆରଆରଆର’ ରେକର୍ଡକୁ ଭାଙ୍ଗିଛି ।
୨୦୨୨ ମସିହାରେ ମୁକ୍ତିଲାଭ କରିଥିବା ଏହି ଚଳଚ୍ଚିତ୍ର ଘରୋଇ ବକ୍ସ ଅଫିସରେ ୭୮୨.୨ କୋଟି ଟଙ୍କା ଆୟ କରିଥିଲା । କିନ୍ତୁ ଅଲୁ ଅର୍ଜୁନଙ୍କ ଫିଲ୍ମ ପୁଷ୍ପା ୨ ୧୦ରେ ୮୦୦ କୋଟି ରୋଜଗାର କରିସାରିଲାଣି । ବର୍ତ୍ତମାନ ‘ପୁଷ୍ପା ୨’ ଭାରତର ତୃତୀୟ ସର୍ବାଧିକ ଆୟ କରିଥିବା ଚଳଚ୍ଚିତ୍ରରେ ପରିଣତ ହୋଇଛି। ଯଦି ଏହିପରି ରୋଜଗାର ହୁଏ ତେବେ ଦୁଇ ଦିନ ଭିତରେ ଫିଲ୍ମଟି ‘କେଜିଏଫ୍ ୨’ର ରେକର୍ଡକୁ ଭାଙ୍ଗିପାରେ । ଘରୋଇ ବକ୍ସ ଅଫିସରେ ‘କେଜିଏଫ୍ ୨’ ୮୫୯.୭ କୋଟି ଆୟ କରିଥିଲା । ସେପଟେ ୧୦ ଦିନ ଭିତରେ ବିଶ୍ଵବ୍ୟାପୀ ବକ୍ସ ଅଫିସରେ ୧୧୦୫.୮୫ କୋଟି ଟଙ୍କା ସଂଗ୍ରହ କରି ସାରିଲାଣି ପୁଷ୍ପା ୨ । ଯଦି ଏପରି ଚାଲେ ତେବେ ସାରା ବିଶ୍ଵରେ ୧୨୩୦ କୋଟି ଆୟ କରିଥିବା ‘ଆରଆରଆର’ର ରେକର୍ଡକୁ ମଧ୍ୟ ଭଙ୍ଗିପାରେ ।