ନୂଆଦିଲ୍ଲୀ: ଓଡିଶା ରାଜ୍ୟପାଳ ରଘୁବର ଦାସ ନିଜ ପଦରୁ ଇସ୍ତଫା ଦେବା ପରେ ଦିଲ୍ଲୀରୁ ରାଞ୍ଚି ପର୍ଯ୍ୟନ୍ତ ଚାଲିଛି ରାଜନୈତିକ କଳ୍ପନାଜଳ୍ପନା। ଭାରତୀୟ ଜନତା ପାର୍ଟି ରାଜ୍ୟରୁ ଜାତୀୟ ସ୍ତର ପର୍ଯ୍ୟନ୍ତ ସଂଗଠନ ମଜବୁତ କରୁଥିବା ସମୟରେ ଶ୍ରୀ ଦାଶ ଇସ୍ତଫା ଦେଇଛନ୍ତି। ରାଜ୍ୟପାଳ ଭାବରେ ନିଯୁକ୍ତ ହେବା ପୂର୍ବରୁ ସେ ବିଜେପିର ରାଷ୍ଟ୍ରୀୟ ଉପାଧ୍ୟକ୍ଷ, ଝାଡଖଣ୍ଡର ମୁଖ୍ୟମନ୍ତ୍ରୀ ଏବଂ ଝାଡଖଣ୍ଡ ବିଜେପି ରାଜ୍ୟ ସଭାପତି ଭାବରେ କାର୍ଯ୍ୟ କରିଥିଲେ।
ରଘୁବରଙ୍କୁ ନେଇ କାହିଁକି ହେଉଛି ଚର୍ଚ୍ଚା ?
ରଘୁବର ଦାସ ୩୧ ଅକ୍ଟୋବର ୨୦୨୩ ରେ ଓଡିଶାର ରାଜ୍ୟପାଳ ଭାବରେ ନିଯୁକ୍ତ ହୋଇଥିଲେ। ୧୪ ମାସ କାର୍ଯ୍ୟ କରିବା ପରେ ସେ ତାଙ୍କ ପଦବୀରୁ ଇସ୍ତଫା ଦେଇଛନ୍ତି। ଝାଡଖଣ୍ଡରେ ନିର୍ବାଚନ ପରେ ତାଙ୍କ ଇସ୍ତଫା ରାଜନୈତିକ ଉଷ୍ମତା ସୃଷ୍ଟି କରୁଛି। ଶ୍ରମିକ ସଂଗଠନରୁ ନିଜର ରାଜନୈତିକ କ୍ୟାରିଅର ଆରମ୍ଭ କରିଥିବା ଶ୍ରୀ ଦାସ ବିଜେପି ନେତା ଭାବରେ ଜଣାଶୁଣା।
୨୦୧୪ ରେ ଝାଡଖଣ୍ଡରେ ବିଜେପି ଏକ ବଡ଼ ବିଜୟ ହାସଲ କରିଥିଲା। ଏହି ବିଜୟ ପଛରେ ଶ୍ରୀ ଦାସଙ୍କ ପ୍ରମୁଖ ଭୂମିକା ଗ୍ରହଣ କରିଥିଲେ। ଏହା ପରେ ତାଙ୍କୁ ମୁଖ୍ୟମନ୍ତ୍ରୀ ପଦ ମଧ୍ୟ ଦିଆଯାଇଥିଲା। ୨୦୧୯ରେ ସେ ବହୁତ ଭୋଟ ବ୍ୟବଧାନରେ ଝାଡ଼ଖଣ୍ଡ ବିଧାନସଭା ନିର୍ବାଚନରେ ହାରିଥିଲେ। ତେବେ ୨୦୨୩ ରେ ରାଜ୍ୟପାଳ ପଦରେ ନିଯୁକ୍ତ ହୋଇଥିଲେ।
ଜାତୀୟ ନା ରାଜ୍ୟ ରାଜନୀତିରେ ପ୍ରବେଶ କରିବେ ?
ଝାଡଖଣ୍ଡ ନିର୍ବାଚନରେ ପରାଜୟ ପରେ ବିଜେପି ସଂଗଠନରେ ରାଜ୍ୟ ସଭାପତିଙ୍କ ଠାରୁ ଝାଡଖଣ୍ଡର ବିରୋଧୀ ଦଳର ନେତା ଚୟନ କରାଯିବ। ଜାନୁଆରୀ ତୃତୀୟ ସପ୍ତାହ ସୁଦ୍ଧା ଏହି ପ୍ରକ୍ରିୟା କରାଯିବା ନେଇ ରାଜ୍ୟ ଦାୟିତ୍ୱରେ ଥିବା ଲକ୍ଷ୍ମୀକାନ୍ତ ବାଜପେୟୀ କହିଛନ୍ତି।
ଅନ୍ୟପକ୍ଷରେ ଝାଡଖଣ୍ଡ ରାଜନୀତିରେ ତାଙ୍କ ଅନୁପସ୍ଥିତିକୁ ନେଇ ଚର୍ଚ୍ଚା ହେଉଛି। ବୋହୂ ପୂର୍ଣ୍ଣିମା ବିଧାୟକ ହେବା ପରେ ଶ୍ରୀ ଦାସଙ୍କ ଝାଡଖଣ୍ଡ ପ୍ରତ୍ୟାବର୍ତ୍ତନ ପରିବାରବାଦ ରାଜନୀତିକୁ ଦର୍ଶାଇପାରେ।
ଜାତୀୟ ରାଜନୀତିରେ ଏଣ୍ଟ୍ରି କରିପାରନ୍ତି ରଘୁବର
ରାଜ୍ୟପାଳ ପଦ ପୂର୍ବରୁ ରଘୁବର ଦାସ ବିଜେପିର ରାଷ୍ଟ୍ରୀୟ ଉପାଧ୍ୟକ୍ଷ ଭାବରେ କାର୍ଯ୍ୟ କରୁଥିଲେ। ଉପାଧ୍ୟକ୍ଷ ଭାବରେ ସେ ଅନେକ ରାଜ୍ୟରେ ବିଜେପି ରଣନୀତି ପ୍ରସ୍ତୁତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ବର୍ତ୍ତମାନ ଦଳରେ ନୂଆ ଭୂମିକା ବିଷୟରେ ପୁରୀରେ ସାମ୍ବାଦିକମାନଙ୍କୁ ପ୍ରତିକ୍ରିୟା ଦେଇ ସେ କହିଛନ୍ତି, ଦଳ ଯାହା ନିଷ୍ପତ୍ତି ନେବ, ସେହି ଅନୁଯାୟୀ କାର୍ଯ୍ୟ କରିବି। ତେବେ ବର୍ତ୍ତମାନ ପର୍ଯ୍ୟନ୍ତ ରାଜ୍ୟପାଳ ପଦରେ ଥିବା ସମସ୍ତ ବ୍ୟକ୍ତି ନିଜ ରାଜ୍ୟମାନଙ୍କରେ ସକ୍ରିୟ ରାଜନୀତିରେ ପ୍ରବେଶ କରି ସାରିଛନ୍ତି। ଆଗକୁ ବିହାର ନିର୍ବାଚନ ହେବାକୁ ଥିବାବେଳେ ଶ୍ରୀ ଦାସଙ୍କୁ କୌଣସି ବଡ ଦାୟିତ୍ବ ମିଳିପାରେ ବୋଲି କୁହାଯାଉଛି।
ଛାତ୍ର ରାଜନୀତିରୁ ଆରମ୍ଭ ହୋଇଥିଲା କ୍ୟାରିୟର
ଛାତ୍ର ରାଜନୀତିରୁ ରଘୁବର ଦାସ ଆରମ୍ଭ କରିଥିଲେ ତାଙ୍କର ରାଜନୈତିକ କ୍ୟାରିଅର। ସେ ଜାମସେଦପୁର ବିଶ୍ୱବିଦ୍ୟାଳୟ ଦାବିରେ ପ୍ରାୟ ୧୯୭୭ ରେ ଆନ୍ଦୋଳନ କରିବା ସହ ଜନତା ପାର୍ଟିରେ ଯୋଗ ଦେଇଥିଲେ। ୩ ବର୍ଷ ପରେ ସେ ଜନତା ପାର୍ଟି ଛାଡି ୧୯୮୦ ମସିହାରେ ବିଜେପିରେ ଯୋଗ ଦେଇଥିଲେ। ୧୯୯୫ ରେ ଶ୍ରୀ ଦାସ ଜାମସେଦପୁର ପୂର୍ବ ଆସନରୁ ବିଧାୟକ ଭାବରେ ନିର୍ବାଚିତ ହୋଇଥିଲେ। ଏହା ପରେ ସେ ଲଗାତାର ୫ ଥର ଏହି ଆସନରୁ ଜିତିଥିଲେ। ୨୦୦୦ ମସିହାରେ ବାବୁ ଲାଲ ମାରାଣ୍ଡିଙ୍କ ମୁଖ୍ୟମନ୍ତ୍ରୀ ସମୟରେ ଶ୍ରୀ ଦାସ ଶ୍ରମ ମନ୍ତ୍ରୀ ଭାବରେ କାର୍ଯ୍ୟ ତୁଳାଇଥିଲେ।
ବ୍ୟୁରୋ ରିପୋର୍ଟ ଓଡ଼ିଶା ସମ୍ବାଦ