ନୂଆଦିଲ୍ଲୀ: ଦିଲ୍ଲୀରେ କଂଗ୍ରେସ ମୁଖ୍ୟାଳୟ ବାହାରେ ଲାଗିଥିବା ପୋଷ୍ଟରଗୁଡ଼ିକ ରାଜନୈତିକ ମହଲ ଏବଂ ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଛି। ଏହି ପୋଷ୍ଟରରେ ଲୋକସଭାରେ ବିରୋଧୀ ଦଳ ନେତା କଂଗ୍ରେସ ନେତା ରାହୁଲ ଗାନ୍ଧୀଙ୍କୁ “ପ୍ରକୃତ ଜୀବନର ବ୍ୟାଟ ମ୍ୟାନ” ଭାବରେ ଦର୍ଶାଯାଇଛି।
ପୋଷ୍ଟରରେ ଲେଖାଯାଇଛି, “ନୀରବ ରକ୍ଷକ, ଜଣେ ସତର୍କ ରକ୍ଷକ। LoP ରାହୁଲ ଗାନ୍ଧୀ, ପ୍ରକୃତ ଜୀବନର ବ୍ୟାଟ ମ୍ୟାନ।” ରାହୁଲ ଗାନ୍ଧୀଙ୍କ “ବ୍ୟାଟ ମ୍ୟାନ” ଚିତ୍ର ସମ୍ପ୍ରତି ସୋସିଆଲ ମିଡିଆରେ ଆଲୋଚନାର ବିଷୟ ପାଲଟିଛି। ଏହି ମାସର ଆରମ୍ଭରେ ରାହୁଲ ଗାନ୍ଧୀ ଯୁବକମାନଙ୍କ ସହିତ, ବିଶେଷକରି ଜେନ-ଜିଙ୍କ ସହିତ ସିଧାସଳଖ ଆଲୋଚନା କରିବା ପାଇଁ ଇନଷ୍ଟାଗ୍ରାମରେ “ଆସ୍କ ମି ଏନିଥ୍” ସେଶନ କରିଥିଲେ। ତାଙ୍କୁ ଶିକ୍ଷା, ଛାତ୍ର ଆନ୍ଦୋଳନ, ରାଜନୀତି ଏବଂ ଦର୍ଶନ ସମେତ ବିଭିନ୍ନ ପ୍ରସଙ୍ଗରେ ପ୍ରଶ୍ନ ପଚରାଯାଇଥିଲା।
ସେଶନ ସମୟରେ, ଜଣେ ୟୁଜର୍ସ ସିଧାସଳଖ ରାହୁଲ ଗାନ୍ଧୀଙ୍କୁ ପଚାରିଥିଲେ, “ଆପଣ ବ୍ୟାଟ ମ୍ୟାନ?” ପ୍ରଶ୍ନକୁ ଗମ୍ଭୀରତାର ସହିତ ନେବା ପରିବର୍ତ୍ତେ ରାହୁଲ ଏକ ମଜାଦାର ଉତ୍ତର ଦେଇଥିଲେ। “କେହି ମୋତେ ଏବଂ ବ୍ୟାଟ ମ୍ୟାନଙ୍କୁ ଗୋଟିଏ କୋଠରୀରେ ଦେଖିନାହାଁନ୍ତି।”
ପରବର୍ତ୍ତୀ ସମୟରେ କଂଗ୍ରେସ ଦଳ ସୋସିଆଲ ମିଡିଆରେ ଆଲୋଚନାର ଭିଡିଓ କ୍ଲିପ୍ ସେୟାର କରିଥିଲା। ଏହା ପରେ ସୋସିଆଲ ମିଡିଆରେ ରାହୁଲଙ୍କୁ କାଳ୍ପନିକ ସୁପରହିରୋ ବ୍ୟାଟମ୍ୟାନଙ୍କ ସହିତ ତୁଳନା କରୁଥିବା ମିମ୍ ଏବଂ ପୋଷ୍ଟ ଖୁବ୍ ଭାଇରାଲ ହୋଇଥିଲା।