ବରଗଡ଼: ବରଗଡ଼ ଜିଲ୍ଲା ଭଟଲି ରାସ୍ତାରେ ଥିବା ଏକ ପଞ୍ଚ ତାରକା ହୋଟେଲ ମଙ୍ଗଲମ ପ୍ୟାଲେସରେ ଆଜି ଏକ ବଡଧରଣର ଜୁଆ ଆଡ୍ଡା ଉପରେ ରେଡ କରିଛି ବରଗଡ଼ ପୋଲିସ । ହୋଟେଲ ମାଲିକ ପ୍ରତାପ ନାୟକ ସମେତ ୨୭ ଜଣକୁ ଗିରଫ କରିଛି ପୋଲିସ । ଏହି ଘଟଣାରେ ଆନ୍ତଃ ରାଜ୍ୟ ଲିଙ୍କ ରହିଥିବା ସୂଚନା ମିଳିଛି ।
ସୂଚନା କ୍ରମେ, ଆଜି ସନ୍ଧ୍ୟା ୬ ଘଣ୍ଟା ସମୟରେ ବରଗଡ଼ ଭଟଲି ରାସ୍ତାରେ ରହିଥିବା ହୋଟେଲ ମଙ୍ଗଲମ ପ୍ୟାଲେସରେ ବରଗଡ଼ ଆରକ୍ଷୀ ଅଧିକ୍ଷକ ପ୍ରହଲ୍ଲାଦ ସାହି ମୀନାଙ୍କ ନିର୍ଦ୍ଦେଶ କ୍ରମେ ଅତିରିକ୍ତ ଏସପି ସୌରଭ ଅଟା, ଏସଡିପି ଓ ପଦାରବିନ୍ଦ ତ୍ରିପାଠୀ ଓ ସ୍ବ ଇନିସ୍ପେକ୍ଟର ସୁଶାନ୍ତ ସାହୁଙ୍କ ସହିତ ଅନ୍ୟ ପୋଲସ କର୍ମଚାରୀଙ୍କୁ ନେଇ ଗଠିତ ଏକ ସ୍ୱତନ୍ତ୍ର ଟିମ୍ ଚଢ଼ାଉ କରିଥିଲେ ।
ଚଢ଼ାଉ ସମୟରେ ହୋଟେଲ ଭିତରେ ଜୁଆ ଖେଳୁଥିବା ୨୭ଜଣ ଜୁଆଡି ସମେତ ହୋଟେଲ ମାଲିକ ପ୍ରତାପ ନାୟକ, ଚାରୋଟି କାର, ୩୦ରୁ ଅଧିକ ମୋବାଇଲ ଓ ଲକ୍ଷାଧିକ ଟଙ୍କା ଜବତ କରିଛି ବରଗଡ଼ ପୋଲିସ । ସମସ୍ତ ଅଭିଯୁକ୍ତଙ୍କୁ ବରଗଡ଼ ଟାଉନ ଥାନାରେ ଅଟକ ରଖିଥିବା ବେଳେ ଆନ୍ତରାଜ୍ୟ ଲିଙ୍କ ରହିଥିବା ସୂଚନା ମିଳିଛି ।
ସହର ମଧ୍ୟରେ ରହିଥିବା ଉକ୍ତ ହୋଟେଲରେ ଦୀର୍ଘଦିନ ହେଲା ଜୁଆ ସମେତ ଅସାମାଜିକ କାର୍ଯ୍ୟ ଚାଲୁଥିବାନେଇ ବରଗଡ଼ ପୋଲିସ ଅନୁମାନ କରିଛି ।