ନୂଆଦିଲ୍ଲୀ: ସିଗନାଲ-ସର୍କିଟ-ବଦଳରେ ତ୍ରୁଟି ଯୋଗୁଁ ବାଲେଶ୍ୱର ବାହାନଗାରେ କରମଣ୍ଡଳ ଏକ୍ସପ୍ରେସକୁ ଭୁଲ୍ ସିଗନାଲ ମିଳିଥିଲା, ଯାହା ଫଳରେ ଏକ ଭୟଙ୍କର ଟ୍ରେନ୍ ଦୁର୍ଘଟଣା ଘଟି ୨୯୫ ଜଣଙ୍କର ମୃତ୍ୟୁ ଘଟିଥିଲା ବୋଲି କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି।
ଗତ ଜୁନ ୨ ତାରିଖରେ ବାହାନଗା ବଜାର ଷ୍ଟେସନ ନିକଟରେ ଘଟିଥିବା ଦୁର୍ଘଟଣା ନେଇ ରାଜ୍ୟସଭାରେ ପ୍ରଶ୍ନର ଉତ୍ତର ରଖି ଏହା କହିଛନ୍ତି ବିଭାଗୀୟ ମନ୍ତ୍ରୀ। ସେ କହିଥିଲେ ଯେ ଲେଭଲ କ୍ରସିଂ ଗେଟରେ ଏକ ବିଦ୍ୟୁତ୍ ଉଠାଣ ବ୍ୟାରିଅରକୁ ବଦଳାଇବା ପାଇଁ କାମ କରିବା ସମୟରେ ସିଗନାଲରେ ତ୍ରୁଟି ଦେଖାଦେଇଥିଲା। ଭୁଲ୍ ସିଗନାଲ୍ ଯୋଗୁଁ ଟ୍ରେନଟି ଲୁପ୍ ଲାଇନ୍ ଉପରେ ଯାଉଥିବା ବେଳେ ସେଠାରେ ଛିଡ଼ା ହୋଇଥିବା ଏକ ମାଲବାହୀ ଟ୍ରେନ୍ ସହ ଧକ୍କା ହୋଇଥିଲା।
ବାହାନଗା ବଜାର ଷ୍ଟେସନ ନିକଟରେ ୨୯୫ ଜଣଙ୍କ ଜୀବନ ନେଇଥିବା ଏହି ଦୁର୍ଘଟଣାକୁ ନେଇ ରାଜ୍ୟସଭାରେ ସିପିଆଇ(ଏମ୍)ର ଜନ୍ ବ୍ରିଟାସ ଓ ଆପ ସାଂସଦ ସଞ୍ଜୟ ସିଂହଙ୍କ ପ୍ରଶ୍ନର ଉତ୍ତର ଦେଇ ମନ୍ତ୍ରୀ ଏହା କହିଛନ୍ତି। ରେଳ ସୁରକ୍ଷା କମିସନର (ସିଆରଏସ୍) ଏହି ଦୁର୍ଘଟଣା ସମ୍ପର୍କରେ ରିପୋର୍ଟ ପ୍ରଦାନ କରିଛନ୍ତି କି ନାହିଁ ଏବଂ ସିବିଆଇ ତଦନ୍ତ ପାଇଁ ସେମାନେ କୌଣସି ସମୟସୀମା ଧାର୍ଯ୍ୟ କରିଛନ୍ତି କି ନାହିଁ ତାହା ସ୍ପଷ୍ଟ କରିବାକୁ ବିରୋଧୀ ଦଳ ନେତାମାନେ ସରକାରଙ୍କୁ କହିଥିଲେ।
ବୈଷ୍ଣବ କହିଛନ୍ତି ଯେ, ରେଳ ସୁରକ୍ଷା କମିଶନର (ସିଆରଏସ୍) ଏହି ଦୁର୍ଘଟଣା ସମ୍ପର୍କରେ ରିପୋର୍ଟ ଦେଇଥିଲେ ଏବଂ ସିବିଆଇ ଏହାର ତଦନ୍ତ କରୁଛି। ସେ ଆହୁରି ମଧ୍ୟ କହିଛନ୍ତି ଯେ, ଏହି ଅନିୟମିତତା ପାଇଁ ଯେଉଁମାନେ ଦାୟୀ ସେମାନଙ୍କ ବିରୋଧରେ ସରକାର କାର୍ଯ୍ୟାନୁଷ୍ଠାନ ଗ୍ରହଣ କରିବେ।
Comments are closed.