କଳାହାଣ୍ଡି: କଳାହାଣ୍ଡି ଜିଲ୍ଲା ଭବାନୀପାଟଣାରେ ଅଭାବନୀୟ ଘଟଣା ଘଟିଛି । ରାଜବାଟୀକୁ ଚୋରୀ କରିବାକୁ ଆସି ଧରାପଡିଛି ଚୋର । ଆଉ ଚୋରକୁ କାବୁ କରିବା ପରେ ତାକୁ ଅକଥନୀୟ ନିର୍ଯ୍ୟାତନା ଦିଆଯାଇଛି । ସୁରକ୍ଷାକର୍ମୀଙ୍କ ନିର୍ଯ୍ୟାତନା ସବୁ ସୀମା ପାର୍ କରିଛି । ରାଜବାଟୀର ସୁରକ୍ଷାକର୍ମୀ ଚୋରଟିକୁ ପ୍ରଥମେ ନିସ୍ତୁକ ମାଡ ମାରି ଦରମରା କରିଦେଇଛନ୍ତି । ପରେ ଅତି ଅମାନବୀୟ ଢଙ୍ଗରେ ହାତଗୋଡ ବାନ୍ଧି ଏକ ସାଇକେଲରେ ଥାନାକୁ ନେଇ ପୋଲିସର ଜିମା ଦେଇଛନ୍ତି ।
ଗତକାଲି ବିଳମ୍ବିତ ରାତିରେ କିଛି ଚୋର ଚୋରୀ କରିବା ଉଦ୍ଦେଶ୍ୟରେ ରାଜବାଟୀରେ ପଶିଥିଲେ । ମାତ୍ର ହଠାତ୍ ଏମାନେ ସୁରକ୍ଷାକର୍ମୀଙ୍କ ହାବୁଡରେ ପଡିଥିଲେ । କିଛି ଚୋର ଖସି ଯାଇଥିବାବେଳେ ଆଉ କିଛି ଚୋର ଧରାପଡିଯାଇଥିଲେ । ଫଳରେ ସୁରକ୍ଷାକର୍ମୀ ମାନେ ଚୋର ମାନଙ୍କ ହାତ ଗୋଡ ବାନ୍ଧି ନିସ୍ତୁକ ଭାବରେ ମାଡ ମାରିଥିଲେ । ଏବଂ ପରେ ଅଚେତ୍ ଅବସ୍ଥାରେ ଭବାନୀପାଟଣା ଟାଉନ ଥାନାକୁ ନେଇ ପୋଲିସରେ ଜିମା ଦେଇଛନ୍ତି । ଚୋର ମାନଙ୍କ ନିକଟରୁ ଏକ ବ୍ୟାଗ , ମୋବାଇଲ ଚାର୍ଜର, ଚିମୁଟା, ୩ଟି ସ୍କୃଡ୍ରାଇଭର ଜବତ କରାଯାଇଛି । ତେବେ ଏଠି ପ୍ରଶ୍ନ ଉଠୁଛି ଚୋରକୁ ଦଣ୍ଡ ଦେବା ପାଇଁ ଆଇନ ବ୍ୟବସ୍ଥା ରହିଛି । ହେଲେ ରାଜବାଟୀର ସୁରକ୍ଷାକର୍ମୀଙ୍କୁ କିଏ ଏହି ଅନୁମତି ଦେଲା ।