ରାଜଧାନୀ ରଜ

 ରଜ ସ୍ୱତନ୍ତ୍ର 

ରାଜଧାନୀ ରଜ

ସରୋଜ ବଳ

ପିଇ ଭିଟାମିନ୍‍ ପେଜ
ଚିଡ଼ିଆଖାନାରେ ଡାକିଲା ଗଜ
ଡାକିଲା ଗଜ ଲୋ
ଆସି ପହଂଚିଲା ରଜ

କାଗଜ ଖାଇଲା ଛେଳି
ସପିଙ୍ଗ ମଲରେ ଭାରି ଗହଳି
ଭାରି ଗହଳି ଲୋ
ପଅର୍ସ ଯାଏ ତରଳି

ବାଉଁଶ ପତର ନେଳି
ଟିଭି ଷ୍ଟୁଡିଓରେ ଲାଗିଛି ଦୋଳି
ଲାଗିଛି ଦୋଳି ଲୋ
ପେମେଣ୍ଟ୍‍ ପାଇଁକି କଳି

ରଜ ଦୋଳି କଟକଟ
ରବୀନ୍ଦ୍ର ମଣ୍ଡପେ ଚାଲିଚି ନାଟ
ଚାଲିଚି ନାଟ ଲୋ
ପୋଡ଼ପିଠା ଖୋଜେ ପେଟ

ସ୍କୁଟିଯାଏ ଗଡ଼ିଗଡ଼ି
ମୁହଁରୁ ମେକପ ଗଲାଣି ଛାଡ଼ି
ଗଲାଣି ଛାଡ଼ି ଲୋ
ଯୁବତୀ ଦିଶଇ ବୁଢ଼ୀ

ଲଘୁଚାପ ଚପଚପ
ଅଫର ସବୁ ତ ହେଲାଣି ବାମ୍ଫ
ହେଲାଣି ବାମ୍ଫ ଲୋ
ଦୋକାନୀ ଦେହରେ କମ୍ପ

ଆକାଶରେ ଘଡ଼ଘଡ଼ି
ଫରେଷ୍ଟ ପାର୍କରେ ପ୍ରେମର ଯୋଡ଼ି
ପ୍ରେମର ଯୋଡ଼ି ଲୋ
ଆଖିଡୋଳା ଯାଏ ପୋଡ଼ି

ମେଘହୁଏ ଝିପିଝିପି
ଚତୁରୀ ଯୁବତୀ ନିଏ ସେଲଫି
ନିଏ ସେଲଫି ଲୋ
ଫସେଇବ ବେଳ ଦେଖି

ହାଇହିଲ ଫଟଫଟ
ହୁଆଟସାପରେ ଚାଲିଛି ଚାଟ
ଚାଲିଛି ଚାଟ ଲୋ
ଝୁଣ୍ଟିପଡି ମୁଣ୍ଡଫାଟ

ଝଡ଼ିପୋକ ଫରଫର
ଫେସବୁକେ ଝୁଲେ ଫଟୋ ରଜର
ଫଟୋ ରଜର ଲୋ
ଲାଇକ୍‍ ଜମା ହଜାର

ପାଣି ବହେ କଳକଳ
ରଜର ଖବର ବଡ଼ ବିକଳ
ବଡ଼ ବିକଳ ଲୋ
ଭଣଇ ସରୋଜ ବଳ…
ମାଉସୀ ଲୋ, ଆଖି ହୁଏ ଛଳଛଳ
ମଉସା ଲୋ, ଛାତି ତଳେ ଦମକଳ…
ବାବୁମାନେ, ବୁଡ଼ିଯାଉଛି ହେ କୁଳ
ବେବିମାନେ, ନିଜକୁ ନିଜେ ସଂଭାଳ…