ଯୁଦ୍ଧ ଏବେ ମାସରେ ନୁହେଁ, ବରଂ ଘଣ୍ଟା ଏବଂ ସେକେଣ୍ଡରେ ମପାଯାଉଛି: ପ୍ରତିରକ୍ଷା ମନ୍ତ୍ରୀ

ନୂଆଦିଲ୍ଲୀ: ସୋମବାର ଭାରତୀୟ ତଟରକ୍ଷୀ ବାହିନୀର ମୁଖ୍ୟାଳୟରେ ଅନୁଷ୍ଠିତ ୪୨ତମ ICG କମାଣ୍ଡର ସମ୍ମିଳନୀରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଯୋଗଦେଇଥିଲେ । ଏହି ଅବସରରେ ସୋମବାର ଦିନ ସେ କହିଛନ୍ତି ଯେ, ଯୁଦ୍ଧଗୁଡ଼ିକ ଏବେ ମାସରେ ନୁହେଁ, ବରଂ ଘଣ୍ଟା ଏବଂ ସେକେଣ୍ଡରେ ମାପ କରାଯାଉଛି । କାହିଁକି ନା ସାଟେଲାଇଟ୍, ଡ୍ରୋନ୍ ଏବଂ ସେନ୍ସର ସଂଘର୍ଷର ପ୍ରକୃତିକୁ ନୂଆ କରି ପରିଭାଷିତ କରାଯାଉଛି । ସେ ଭାରତୀୟ ତଟରକ୍ଷୀ ବାହିନୀ (ICG)କୁ ଏକ ଭବିଷ୍ୟତ ରୋଡମ୍ୟାପ୍ ବିକଶିତ କରିବାକୁ ଅନୁରୋଧ କରିଛନ୍ତି ଯାହା ନୂତନ ଚ୍ୟାଲେଞ୍ଜକୁ ପୂର୍ବାନୁମାନ କରିପାରିବ, ଅତ୍ୟାଧୁନିକ ପ୍ରଯୁକ୍ତିବିଦ୍ୟାକୁ ସମନ୍ୱିତ କରିବ ଏବଂ ନିରନ୍ତର ରଣନୀତିକୁ ଗ୍ରହଣ କରିପାରିବ ।

ରାଜନାଥ ସିଂହ ତାଙ୍କ ଭାଷଣରେ ଏହା ମଧ୍ୟ ଉଲ୍ଲେଖ କରିଛନ୍ତି ଯେ, ସାଇବର ଏବଂ ଇଲେକ୍ଟ୍ରୋନିକ୍ ଯୁଦ୍ଧ ଆଉ କାଳ୍ପନିକ ବିପଦ ନୁହେଁ ବରଂ ବର୍ତ୍ତମାନର ବାସ୍ତବତା ।

ସେ କହିଛନ୍ତି, “ଏକ ରାଷ୍ଟ୍ର କ୍ଷେପଣାସ୍ତ୍ର ମାଧ୍ୟମରେ ନୁହେଁ, ବରଂ ହ୍ୟାକିଂ, ସାଇବର ଆକ୍ରମଣ ଏବଂ ଇଲେକ୍ଟ୍ରୋନିକ୍ ଜାମିଂ ମାଧ୍ୟମରେ ଆମର ବ୍ୟବସ୍ଥାକୁ ପଙ୍ଗୁ କରିବାକୁ ଚେଷ୍ଟା କରିପାରିବ । ଏପରି ବିପଦରୁ ରକ୍ଷା କରିବା ପାଇଁ ICGକୁ ନିରନ୍ତର ଭାବରେ ଏହାର ତାଲିମ ଏବଂ ଉପକରଣଗୁଡ଼ିକୁ ଗ୍ରହଣ ଏବଂ ଅପଗ୍ରେଡ୍ କରିବାକୁ ପଡିବ । ପ୍ରତିକ୍ରିୟା ସମୟକୁ ସେକେଣ୍ଡକୁ ହ୍ରାସ କରିବା ଏବଂ ସବୁବେଳେ ପ୍ରସ୍ତୁତି ସୁନିଶ୍ଚିତ କରିବା ପାଇଁ ସ୍ୱୟଂଚାଳିତ ନିରୀକ୍ଷଣ ନେଟୱାର୍କ ଏବଂ AI-ସକ୍ଷମ ବ୍ୟବସ୍ଥା ଅତ୍ୟାବଶ୍ୟକ।”

ସିଂହ ଗୁରୁତ୍ୱାରୋପ କରି କହିଥିଲେ ଯେ, ଭାରତର ୭ ହଜାର ୫୦୦ କିଲୋମିଟର ଲମ୍ବା ଉପକୂଳ, ଆଣ୍ଡାମାନ ଏବଂ ନିକୋବର ଦ୍ୱୀପପୁଞ୍ଜ ଏବଂ ଲାକ୍ଷଦ୍ୱୀପ ଭଳି ଦ୍ୱୀପାଞ୍ଚଳ ସହିତ, “ବିପୁଳ ଚ୍ୟାଲେଞ୍ଜ” ସୃଷ୍ଟି କରେ ଯାହା ପାଇଁ ଉନ୍ନତ ପ୍ରଯୁକ୍ତିବିଦ୍ୟା, ସୁପ୍ରଶିକ୍ଷିତ କର୍ମଚାରୀ ଏବଂ ୨୪ ଘଣ୍ଟା ନଜର ରଖିବା ଆବଶ୍ୟକ ।

ସୂଚନାଯୋଗ୍ୟ, ଭାରତୀୟ ତଟରକ୍ଷୀ ବାହିନୀର ଏହି ସମ୍ମିଳନୀ ‘ବଢୁଥିବା ସାମୁଦ୍ରିକ ସୁରକ୍ଷା ଚ୍ୟାଲେଞ୍ଜ’ ଏବଂ ଭାରତ ମହାସାଗର ଅଞ୍ଚଳର ବର୍ଦ୍ଧିତ ରଣନୈତିକ ଗୁରୁତ୍ୱର ପୃଷ୍ଠଭୂମିରେ ୨୮ ରୁ ଆରମ୍ଭ ହୋଇଥିବା ବେଳେ ଏହା ୩୦ ସେପ୍ଟେମ୍ବର ଅର୍ଥାତ୍ ଆସନ୍ତାକାଲି ପର୍ଯ୍ୟନ୍ତ ଆୟୋଜିତ ଚାଲିବ ।