ନୂଆଦିଲ୍ଲୀ: ମୌସୁମୀ ଆସିଛି, ଲୋକଙ୍କୁ ଆନମନା କରିଛି । କିଏ ଖରାରୁ ତ୍ରାହି ପାଇବା ପରେ ବର୍ଷାରେ ଭିଜୁଛି ତ ଆଉ କିଏ ଘରକୁ ସଜାଉଛି । ହେଲେ ଚିନ୍ତାରେ ଅଛନ୍ତି ଦେଶର ଅନ୍ୟତମ ଶିଳ୍ପଦ୍ୟୋଗୀ ତଥା ଅରବପତି ରତନ ଟାଟା । ବୁଲା କୁକୁରଙ୍କୁ ନେଇ ରତନ ଟାଟା ଚିନ୍ତିତ ଥିବା ବେଳେ ଟ୍ୱିଟ୍ କରି ଲୋକଙ୍କୁ ଅପିଲ୍ କରିଛନ୍ତି ।
କୁକୁରଙ୍କୁ ବେଶ୍ ପସନ୍ଦ କରନ୍ତି ରତନ ଟାଟା । ଆଉ ବୁଲା କୁକୁରଙ୍କ ପାଇଁ ରତନ ଟାଟାଙ୍କ ଚିନ୍ତା ସେମାନଙ୍କ ପ୍ରତି ଥିବା ତାଙ୍କ ଭଲ ପାଇବାକୁ ଦର୍ଶାଉଛି । ଏବେ ବର୍ଷା ଋତୁ ଆରମ୍ଭ ହୋଇଥିବା ବେଳେ ଅଧିକାଂଶ ବୁଲା ବିଲେଇ, କୁକୁର କାର ଓ ଅନ୍ୟ ଗାଡ଼ି ତଳେ ଆଶ୍ରୟ ନେଉଛନ୍ତି । ଆଉ ଗାଡ଼ି ଚାଳକ ଜନ୍ତୁଙ୍କୁ ନ ଦେଖି ଗାଡ଼ି କାଢ଼ିବା ବେଳେ ସେମାନେ ଆହତ ହେବା ସହ ଅନେକଙ୍କ ଜୀବନ ଯାଉଛି ।
Now that the monsoons are here, a lot of stray cats and dogs take shelter under our cars. It is important to check under our car before we turn it on and accelerate to avoid injuries to stray animals taking shelter. They can be seriously injured, handicapped and even killed if we… pic.twitter.com/BH4iHJJyhp
— Ratan N. Tata (@RNTata2000) July 4, 2023
ଯାହାକୁ ନେଇ ରତନ ଟାଟା ଚିନ୍ତାବ୍ୟକ୍ତ କରିବା ସହ ଟ୍ୱିଟ୍ କରି ବୁଲା ଜୀବଜନ୍ତୁଙ୍କୁ ରକ୍ଷା କରିବା ଲାଗି ନିବେଦନ କରିଛନ୍ତି । ଲେଖିଛନ୍ତି, ବର୍ଷା ଦିନେ ଅନେକ ବୁଲା କୁକୁର ଓ ବିଲେଇ କାର୍ ତଳେ ଆଶ୍ରୟ ନେଉଛନ୍ତି । ସେମାନଙ୍କୁ ଆଘାତ ନ ପହଞ୍ଚାଇବା ଲାଗି ଗାଡ଼ି କାଢ଼ିବା ବେଳେ ତଳକୁ ଟିକେ ଦେଖି ନିଅନ୍ତୁ । ଯଦି ଗାଡ଼ି ତଳେ ସେମାନେ ଥିବା ନ ଜାଣି ଗାଡ଼ି ବାହାର କରିବା ତ ଆଘାତ ଲାଗିବ, ଏପରିକି ମୃତ୍ୟୁ ବି ହୋଇପାରେ । ଆସନ୍ତୁ ବର୍ଷା ଦିନେ ସେମାନଙ୍କୁ ଅସ୍ଥାୟୀ ଆଶ୍ରୟ ସ୍ଥଳ ପ୍ରଦାନ କରିବା ।
ବୁଲା କୁକୁରଙ୍କୁ ଭଲ ପାଉଥିବା ରତନ ଟାଟା ଅନେକ ବେସରକାରୀ ସଂଗଠନଙ୍କୁ ଆନିମଲ ସେଲ୍ଟର ପାଇଁ ଦାନ କରନ୍ତି । ଏପରିକି ରତନ ଟାଟାଙ୍କ ଘରେ ଥିବା ପୋଷା କୁକୁର ‘ଗୋଆ’ ମଧ୍ୟ ବୁଲା କୁକୁର ଥିଲା । ଯାହାକୁ ଗୋଆ ସଡ଼କରୁ ନେଇ ଘରେ ପାଳିଛନ୍ତି ରତନ ଟାଟା ।