ଢେଙ୍କାନାଳ : ତ୍ରିସ୍ତରୀୟ ପଞ୍ଚାୟତ ନିର୍ବାଚନକୁ ଆଉ ମାତ୍ର ଦିନ କେଇଟା ବାକି ଅଛି । କିନ୍ତୁ ନିର୍ବାଚନ ଲଢୁଥିବା ପ୍ରାର୍ଥୀ ସୁବ୍ରତ ବେହେରାଙ୍କ ପତ୍ତା ମିଳୁନି । ଢେଙ୍କାନାଳ ଜିଲ୍ଲା ହିନ୍ଦୋଳ ବ୍ଲକ ନୂଆଗାଁ ପଞ୍ଚାୟତରେ ସମିତି ସଭ୍ୟ ଭାବେ ନିର୍ବାଚନ ଲଢୁଥିବା ପ୍ରାର୍ଥୀ ସୁବ୍ରତ ବେହେରାଙ୍କ ପତ୍ତା ମିଳୁନି । ପରିବାର ପକ୍ଷରୁ ଥାନାରେ ଏ ନେଇ ଅଭିଯୋଗ କରିଛନ୍ତି ।
ସୁବ୍ରତ ବେହେରା ବିଜେଡି ସମର୍ଥିତ ସମିତି ସଭ୍ୟ ପ୍ରାର୍ଥୀ ହୋଇଥିବା ବେଳେ ତାଙ୍କ ଘର ନୂଆଗାଁରେ । ତେବେ ଚଳିତ ପଂଚାୟତ ନିର୍ବାଚନରେ ନୂଆଗାଁ ଗ୍ରାମ ପଂଚାୟତର ସମିତି ସଭ୍ୟ ପଦବୀ ସାଧାରଣ ବର୍ଗଙ୍କ ପାଇଁ ଥିବାବେଳେ ଏଠାରୁ ସୁବ୍ରତଙ୍କୁ ମିଶାଇ ମୋଟ ୮ଜଣ ପ୍ରାର୍ଥୀ ପ୍ରତିଦ୍ବନ୍ଦିତା କରୁଛନ୍ତି ।
ମଙ୍ଗଳବାର ଅପରାହ୍ନରୁ ସେ କେଉଁଆଡେ ନିଖୋଜ ହୋଇଯାଇଥିବା ଜଣାପଡିଛି । ନିର୍ବାଚନୀ ପୋଷ୍ଟରରେ କମଳା ରଙ୍ଗକୁ ବଦଳାଇବା ପାଇଁ ତାଙ୍କ ବାଇକ ଯୋଗେ ନିମବାହାଳି ଛକକୁ ଯାଇ ଆଉ ଘରକୁ ଫେରିନଥିଲେ । ପରିବାର ଲୋକେ ଖୋଜା ଖୋଜି ପରେ ନପାଇବାରୁ କଣ୍ଟା ବଣିଆ ଥାନାରେ ଲିଖିତ ଅଭିଯୋଗ କରିଥିବା ଜଣାପଡ଼ିଛି ।
ନିଖୋଜ ସୁବ୍ରତଙ୍କ ବାଇକକୁ ନିମବାହାଳି ଛକ ଠାରୁ କିଛି ଦୂରରୁ ଠାବ କରିଛି । ପୁଲିସ ଅନୁ ସନ୍ଧାନୀ କୁକୁର ମାଧ୍ୟମରେ ତଦନ୍ତ ଜାରି ରଖିଛି । ଘଟଣାସ୍ଥଳକୁ ଆଜି ହିନ୍ଦୋଳ ବିଧାୟିକା ସୀମାରଣୀ ନାୟକ ପହଂଚି ଥିବାବେଳେ ସୁବ୍ରତଙ୍କୁ ରାଜନୈତିକ ଆକ୍ରୋଶ ରଖି ଅପହରଣ କରାଯାଇଥିବା ଅଭିଯୋଗ କରିଛନ୍ତି ।
Comments are closed.