Satluj : ‘ସତଲୁଜ’ରେ ପଞ୍ଜାବର ଲୁଚିଥିବା କଳା ଇତିହାସ! ଦିଲଜିତ୍ ଦୋସାଞ୍ଜଙ୍କ ଫିଲ୍ମ ଦେଉଛି ୫ ବଡ଼ ସନ୍ଦେଶ…
ମୁମ୍ବାଇ: ପଞ୍ଜାବର ଇତିହାସର ଏକ ଅନ୍ଧକାର ଅଧ୍ୟାୟକୁ ପରଦାରେ ଆଣିଛି ଦିଲଜିତ୍ ଦୋସାଞ୍ଜଙ୍କ ନୂଆ ଫିଲ୍ମ ‘ସତଲୁଜ’। ପୂର୍ବରୁ ‘ପଞ୍ଜାବ ୯୫(Punjab 95)’ ନାମରେ ପରିଚିତ ଏହି ଫିଲ୍ମ ଜୁଲାଇ ୩ରୁ କୌଣସି ପ୍ରଚାର ପ୍ରସାର ବିନା ସିଧାସଳଖ ZEE5 ଓଟିଟି ପ୍ଲାଟଫର୍ମରେ ରିଲିଜ୍ ହୋଇଛି। ଫିଲ୍ମଟି ମୁକ୍ତି ପୂର୍ବରୁ ବିବାଦରେ ଥିଲା। ଖବର ଅନୁସାରେ, ଥିଏଟରରେ ରିଲିଜ୍ ପାଇଁ ସେଣ୍ଟ୍ରାଲ ବୋର୍ଡ ଅଫ୍ ଫିଲ୍ମ ସର୍ଟିଫିକେସନ୍ (CBFC) ୧୨୦ରୁ ଅଧିକ କଟ୍ ଲଗାଇବାକୁ କହିଥିଲା।
ଫିଲ୍ମଟି ମାନବାଧିକାର କର୍ମୀ ଜସୱନ୍ତ ସିଂହ ଖାଲରାଙ୍କ ଜୀବନରୁ ପ୍ରେରିତ। ୧୯୯୦ ଦଶକରେ ପଞ୍ଜାବରେ କଥିତ ବେଆଇନ ହତ୍ୟା, ନିଖୋଜ ଘଟଣା ଓ ଗୁପ୍ତ ଅନ୍ତିମ ସଂସ୍କାରର ସତ୍ୟକୁ ସାମ୍ନାକୁ ଆଣିବା ପାଇଁ ସେ ଯେଉଁ ସଂଘର୍ଷ କରିଥିଲେ, ତାହାକୁ ଏହି ଫିଲ୍ମରେ ଦେଖାଯାଇଛି।
ଏହି ଫିଲ୍ମ କେବଳ କିଛି ଲୁକାୟିତ ସତକୁ ସାମ୍ନାକୁ ଆଣିଛି ତାହା ନୁହେଁ, ବରଂ ‘ସତଲୁଜ’ ନାଗରିକଙ୍କୁ ୫ଟି ବଡ଼ ସନ୍ଦେଶ ବି ଦେଉଛି । ପ୍ରଥମ, ଜଣେ ସାଧାରଣ ମଣିଷ ମଧ୍ୟ ସମଗ୍ର ବ୍ୟବସ୍ଥା ବିରୋଧରେ ଲଢ଼ିପାରେ। ଦ୍ୱିତୀୟ, ଇତିହାସର ଲୁଚିଥିବା ଅଧ୍ୟାୟକୁ ଜାଣିବା ଆବଶ୍ୟକ। ତୃତୀୟ, ପ୍ରତ୍ୟେକ ସଂଖ୍ୟା ପଛରେ ଗୋଟିଏ ପରିବାରର ଯନ୍ତ୍ରଣା ଲୁଚି ରହିଛି। ଚତୁର୍ଥ, ମାନବାଧିକାରର ଲଢ଼େଇ କେବଳ ଗୋଟିଏ ରାଜ୍ୟର ନୁହେଁ, ସମଗ୍ର ବିଶ୍ୱର। ପଞ୍ଚମ, ଭବିଷ୍ୟତକୁ ସୁରକ୍ଷିତ କରିବା ପାଇଁ ଅତୀତର କଠିନ ସତ୍ୟକୁ ସାମ୍ନା କରିବା ଜରୁରୀ।
ଫିଲ୍ମ ରିଲିଜ୍ ପରେ ସୋସିଆଲ୍ ମିଡିଆରେ ଦର୍ଶକମାନେ ଏହାକୁ ଜୋରଦାର ପ୍ରଶଂସା କରୁଛନ୍ତି। ଅନେକ ଏହାକୁ କେବଳ ଏକ ଫିଲ୍ମ ନୁହେଁ, ବରଂ ପଞ୍ଜାବର ଲୁଚିଥିବା ସତ୍ୟକୁ ସାମ୍ନାକୁ ଆଣିଥିବା ଏକ ସାହସିକ ପ୍ରୟାସ ବୋଲି କହୁଛନ୍ତି। ଦିଲଜିତ୍ ଦୋସାଞ୍ଜଙ୍କ ଅଭିନୟକୁ ମଧ୍ୟ ଦର୍ଶକ ବେଶ୍ ପସନ୍ଦ କରିଛନ୍ତି। ବର୍ତ୍ତମାନ ଏହି ଫିଲ୍ମ ZEE5ରେ ଷ୍ଟ୍ରିମ୍ ହେଉଛି।