ମାଲକାନଗିରି: ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ ବିଜାପୁର ଜିଲ୍ଲାରେ ପୁଣି ସୁରକ୍ଷାକର୍ମୀ ଓ ମାଓବାଦୀ ମୁହାଁମୁହିଁ ହୋଇଛନ୍ତି । ଫଳରେ ସୁରକ୍ଷାକର୍ମୀଙ୍କ ସହ ଗୁଳି ବିନିମୟରେ ଜଣେ ମାଓବାଦୀ ନିହତ ହୋଇଛି । ତା ନିକଟରୁ ଗୋଟିଏ ୯ ଏମଏମ୍ ପିସ୍ତଲ, ଗୋଟିଏ ଆଇଇଡି ଓ ୬ଟି ରିମୋଟ ସ୍ବିଚ୍ ଜବତ ହୋଇଛି ।
ଖବର ମୁତାବକ, ମୁନଗାଁ ଜଙ୍ଗଲରେ ୩୦ରୁ ୪୦ ମାଓବାଦୀଙ୍କ ଉପସ୍ଥିତି ଥିବା ନେଇ ବିଶେଷ ସୂତ୍ରରୁ ଖବରପାଇଥିଲେ ସୁରକ୍ଷା କର୍ମୀ । ଏହାପରେ ଡିଆରଜି ସୁରକ୍ଷା କର୍ମୀ ମାନେ ଉକ୍ତ ଜଙ୍ଗଲରେ କୋମ୍ବିଂ ଅପରେସନ ପାଇଁ ଯାଇଥିଲେ । ମାଓବାଦୀମାନେ ଯବାନଙ୍କ ଆସୁଥିବା ଦେଖି ପ୍ରଥମେ ଗୁଳି ଚାଳଣା କରିଥିଲେ । ଏହାର ପାଲଟା ଜବାବରେ ସୁରକ୍ଷାକର୍ମୀ ମାନେ ମଧ୍ୟ ଗୁଳି ଚାଳନା କରିଥିବା ବେଳେ ଏଥିରେ ଜଣେ ମାଓବାଦୀର ମୃତ୍ୟୁ ହୋଇଛି ।
ମାଓବାଦୀଙ୍କ ଦ୍ୱାରା ପୂର୍ବରୁ ଉକ୍ତ ଜଙ୍ଗଲରେ ଆଇଇଡି ଖଞ୍ଜା ଯାଇଥିବା ବେଳେ ଯବାନମାନଙ୍କ କୋମ୍ବିଂ ସମୟରେ ଏହା ବିସ୍ଫୋରଣ ହୋଇଥିଲା । ଫଳରେ ଜଣେ ଯବାନ ସାମାନ୍ୟ ଆହତ ହୋଇଛନ୍ତି ।
ତେବେ ଘଟଣାସ୍ଥଳରୁ ଅନ୍ୟ ମାଓବାଦୀ ମାନେ ଛତ୍ରଭଙ୍ଗ ଦେଇଥିବାବେଳେ, ବର୍ତ୍ତମାନ ଉକ୍ତ ସ୍ଥାନରେ ସର୍ଚ୍ଚ ଅପରେସନ ଜାରି ରହିଛି ।