ପୁଣି ଭାରତ ବିରୋଧରେ ବିଷ ଉଗାରିଲେ ପାକ୍ ପ୍ରଧାନମନ୍ତ୍ରୀ: ପହଲଗାମ ଆକ୍ରମଣ ଦୁର୍ଭାଗ୍ୟଜନକ କହି ଲଗାଇଲେ ବଡ ଅଭିଯୋଗ…

ନୂଆଦିଲ୍ଲୀ: ଭାରତ ବିରୋଧରେ ବଡ ଅଭିଯୋଗ ଆଣିଛି ପାକିସ୍ତାନ । ପାକିସ୍ତାନୀ ପ୍ରଧାନମନ୍ତ୍ରୀ ଶହବାଜ ସରିଫ ଅପରେସନ ସିନ୍ଦୂରକୁ ଉଲ୍ଲେଖ କରି ଭାରତ ଆଞ୍ଚଳିକ ଶାନ୍ତିକୁ ଅସ୍ଥିର କରିବା ପାଇଁ ବ୍ୟବହାର କରିଥିଲା ବୋଲି ଅଭିଯୋଗ କରିଛନ୍ତି । ସରିଫ୍ ଭାରତକୁ ଟାର୍ଗେଟ କରି କହିଛନ୍ତି, ଭାରତ ପହଲଗାମରେ ଦୁର୍ଭାଗ୍ୟଜନକ ଆତଙ୍କବାଦୀ ଆକ୍ରମଣକୁ ବ୍ୟବହାର କରି ପାକିସ୍ତାନ ପ୍ରତି “ଅଣଉତ୍ସାହନୀୟ ଏବଂ ବେପରୁଆ” ଶତ୍ରୁତା ମାଧ୍ୟମରେ ଆଞ୍ଚଳିକ ଶାନ୍ତିକୁ ଅସ୍ଥିର କରିବାକୁ ଚେଷ୍ଟା କରିଛି ।

ସିନ୍ଦୁର ଅପରେସନ ସମୟରେ ପାକିସ୍ତାନକୁ ସମର୍ଥନ କରିଥିବା ରାଷ୍ଟ୍ରମାନଙ୍କ ମଧ୍ୟରୁ ଗୋଟିଏ, ଅଜରବାଇଜାନରେ ଅନୁଷ୍ଠିତ ଅର୍ଥନୈତିକ ସହଯୋଗ ସଂଗଠନ (ECO) ସମ୍ମିଳନୀରେ ଭାଷଣ ଦେଇ ପୁଣି ଭାରତ ବିରୋଧରେ କିଛି ଏପରି ବିଷ ଉଗାରିଛନ୍ତି ପାକ୍ ପ୍ରଧାନମନ୍ତ୍ରୀ ସରିଫ । ପୁଣି ଥରେ କାଶ୍ମୀର ପ୍ରସଙ୍ଗ ଉଠାଇ କେନ୍ଦ୍ର ଶାସିତ ଅଞ୍ଚଳରେ ନିର୍ଦ୍ଦୋଷ ଲୋକଙ୍କ ବିରୁଦ୍ଧରେ “ବର୍ବର କାର୍ଯ୍ୟ”କୁ ନିନ୍ଦା କରିଥିଲେ । ଏଥିସହିତ ସେ ଇସ୍ରାଏଲ ଉପରେ ଏକ ପ୍ରଚ୍ଛନ୍ନ ଆକ୍ଷେପ କରି ଗାଜା ଏବଂ ଇରାନରେ ନିର୍ଦ୍ଦୋଷଙ୍କୁ ଟାର୍ଗେଟ କରିବାର ନିନ୍ଦା କରିଥିଲେ।

ସରିଫ କହିଛନ୍ତି, ଜମ୍ମୁ ଏବଂ କାଶ୍ମୀରରେ ଏକ ଦୁର୍ଭାଗ୍ୟଜନକ ଘଟଣା ପରେ ପାକିସ୍ତାନ ପ୍ରତି ନିର୍ଦ୍ଦେଶିତ ଅକାରଣ ଏବଂ ବେପରୁଆ ଭାରତୀୟ ଶତ୍ରୁତା ଆଞ୍ଚଳିକ ଶାନ୍ତିକୁ ଅସ୍ଥିର କରିବାର ଆଉ ଏକ ପ୍ରୟାସ ଥିଲା । ଏଥିସହିତ ଇରାନ ବିରୁଦ୍ଧରେ ଇସ୍ରାଏଲର ସାମ୍ପ୍ରତିକ ବିମାନ ଆକ୍ରମଣକୁ ନିନ୍ଦା କରିଛନ୍ତି, ଏହାକୁ “ଆକ୍ରମଣାତ୍ମକ କାର୍ଯ୍ୟ” ବୋଲି କହିଛନ୍ତି । ପାକିସ୍ତାନ ସେମାନଙ୍କ ବିରୁଦ୍ଧରେ ଦୃଢ଼ ଭାବରେ ଠିଆ ହୋଇଛି ଯେଉଁମାନେ ବିଶ୍ୱର ଯେକୌଣସି ସ୍ଥାନରେ ନିରୀହ ଲୋକଙ୍କ ବିରୁଦ୍ଧରେ ବର୍ବର କାର୍ଯ୍ୟ କରନ୍ତି, ତାହା ଗାଜା, କାଶ୍ମୀର କିମ୍ବା ଇରାନରେ ହେଉ, ବୋଲି କହି ପୁଣି ଥରେ ଭାରତକୁ ଟାର୍ଗେଟ କରିଛନ୍ତି ସରିଫ୍ ।