ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ ଆକ୍ରମଣ, ଗିରଫ ପରେ ଅଭିଯୁକ୍ତର ଉଦ୍ଦେଶ୍ୟ ଜଣାପଡ଼ିଲା!

ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କୁ ବୁଧବାର ଜନ ଶୁଣାଣି କାର୍ଯ୍ୟକ୍ରମରେ ଜଣେ ବ୍ୟକ୍ତି ଆକ୍ରମଣ କରିଛନ୍ତି। ପୁଲିସ ଅଭିଯୁକ୍ତଙ୍କୁ ଗିରଫ କରିଛି। ଅଭିଯୁକ୍ତ ରାଜେଶ ଭାଇ ଖିମଜୀ ଭାଇ ସାକାରିୟା (୪୧) ଗୁଜୁରାଟର ରାଜକୋଟର ବାସିନ୍ଦା।

ଘଟଣା ଦିଲ୍ଲୀର ସିଭିଲ ଲାଇନ୍ସସ୍ଥିତ ମୁଖ୍ୟମନ୍ତ୍ରୀଙ୍କ ବାସଭବନରେ ଘଟିଛି। ସୂଚନା ଅନୁସାରେ, ଅଭିଯୁକ୍ତ ଜଣେ ସମ୍ପର୍କୀୟଙ୍କ ଜାମିନ ପାଇଁ ଆବେଦନ ନେଇ ଆସିଥିଲେ। ଯାହା ବର୍ତ୍ତମାନ କୋର୍ଟରେ ବିଚାରଧୀନ।

ପରିବାର ଲୋକଙ୍କ ସୂଚନା ଅନୁଯାୟୀ, ରାଜେଶ ଏକ ପ୍ରାଣୀପ୍ରେମୀ ଓ ମାନସିକ ଅସ୍ଥିରତା ଦେଇ ଗତି କରୁଛନ୍ତି। ତାଙ୍କ ମାଆଙ୍କୁ ରାଜକୋଟ ପୋଲିସ ପଚରା ଉଚରା ପାଇଁ ନେଇଛି। ଅଭିଯୁକ୍ତଙ୍କ ମା କହିଛନ୍ତି ଯେ ସେ ଜାଣିନଥିଲେ ତାଙ୍କ ପୁଅ ଦିଲ୍ଲୀ ଯିବେ। କୋର୍ଟଙ୍କ ରାୟ ପରେ ପୁଅ ଦିଲ୍ଲୀ ଯାଇଥିବା ସେ କହିଛନ୍ତି। ପୂର୍ବରୁ ପୁଅ ଦିଲ୍ଲୀ ଯାଇଥିବା କଥା କହିଛନ୍ତି। ରାଜେଶ ସାକାରିୟା ଏକ ରିକ୍ସା ଚାଳକ ପରିବାରରୁ ଆସିଥିବା ବୋଲି ଜଣାପଡ଼ିଛି। ସେ ବର୍ତ୍ତମାନ ପୋଲିସ ହେପାଜତରେ ଅଛନ୍ତି ଓ ତାଙ୍କ ମନୋଭାବ ଓ ଉଦ୍ଦେଶ୍ୟ ବିଷୟରେ ଅଧିକ ତଦନ୍ତ ହେବ। ଦିଲ୍ଲୀ ପୋଲିସ ଗୁଜରାଟ ପୋଲିସ ସହ ଯୋଗାଯୋଗ କରି ତାଙ୍କ ନାମ ଓ ଠିକଣା ଯାଞ୍ଚ କରୁଛି।

ମିଳିଥିବା ସୂଚନା ଅନୁସାରେ ଅଭିଯୁକ୍ତ ପ୍ରଥମେ ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କୁ କାଗଜପତ୍ର ଦେଇଥିଲେ। ତା’ପରେ ଚିତ୍କାର କରି ଆକ୍ରମଣ କରିଥିଲେ। ପୁଲିସ ତାଙ୍କୁ ତୁରନ୍ତ ଗିରଫ କରି ସିଭିଲ ଲାଇନ୍ସ ଥାନାରେ ରଖିଛି।

ଦିଲ୍ଲୀ ବିଜେପି ମୁଖ୍ୟ ବିରେନ୍ଦ୍ର ସଚଦେବ ଏହି ଘଟଣାକୁ ନିନ୍ଦା କରିଛନ୍ତି। ସେ କହିଛନ୍ତି, ଅଭିଯୁକ୍ତ ମୁଖ୍ୟମନ୍ତ୍ରୀଙ୍କ ହାତ ଟାଣିଥିଲେ, ତେଣୁ ତାଙ୍କ ମୁଣ୍ଡ କୌଣସି ଜାଗାରେ ବାଜି ଥାଇପାରେ। ଡାକ୍ତରୀ ପରୀକ୍ଷାରୁ ଜଣାପଡ଼ିଛି, ରେଖା ଗୁପ୍ତା ସୁସ୍ଥ ଅଛନ୍ତି କିନ୍ତୁ ମାନସିକ ଆଘାତରେ ଅଛନ୍ତି। ସେ ଜନ ଶୁଣାଣି କାର୍ଯ୍ୟକ୍ରମ ଜାରି ରଖିବାକୁ ନିଷ୍ପତ୍ତି ନେଇଛନ୍ତି।

ମନ୍ତ୍ରୀ ମଞ୍ଜିନ୍ଦର ସିଂ ସିରସା ଏହାକୁ ରାଜନୈତିକ ଷଡ଼ଯନ୍ତ୍ର ବୋଲି ଅଭିଯୋଗ କରିଛନ୍ତି। ସେ କହିଛନ୍ତି, “ମୁଖ୍ୟମନ୍ତ୍ରୀ ଦିଲ୍ଲୀ ପାଇଁ ଦିନରାତି କାମ କରୁଛନ୍ତି। ଏହା ପ୍ରତିଦ୍ୱନ୍ଦୀମାନେ ସହି ପାରୁ ନାହାନ୍ତି।” ମନ୍ତ୍ରୀ କପିଲ ମିଶ୍ର ଏହାକୁ “ଅମାନବୀୟ ଅପରାଧ” ବୋଲି କହି ନିନ୍ଦା କରିଛନ୍ତି।

ଘଟଣାସ୍ଥଳରେ ଉପସ୍ଥିତ ଅଞ୍ଜଳି ନାମକ ଜଣେ ମହିଳା କହିଛନ୍ତି, “ଏହା ଭୁଲ। ଜନ ଶୁଣାଣିରେ ସମସ୍ତଙ୍କୁ ଅଧିକାର ଅଛି। ଜଣେ ଠକ ଏଭଳି କଲେ ଏହା ବଡ଼ କଥା। ସେ କଥା ହେଉଥିଲେ ଓ ହଠାତ୍ ଆକ୍ରମଣ କଲେ।”

ଦିଲ୍ଲୀ କଂଗ୍ରେସ ମୁଖ୍ୟ ଦେବେନ୍ଦ୍ର ଯାଦବ ଏହାକୁ “ଦୁର୍ଭାଗ୍ୟଜନକ” ବୋଲି କହିଛନ୍ତି। ସେ ପ୍ରଶ୍ନ ଉଠାଇଛନ୍ତି, “ମୁଖ୍ୟମନ୍ତ୍ରୀ ସୁରକ୍ଷିତ ନାହାନ୍ତି ତେବେ ସାଧାରଣ ମହିଳା କିପରି ସୁରକ୍ଷିତ ହେବେ?” ପୂର୍ବତନ ମୁଖ୍ୟମନ୍ତ୍ରୀ ଆତିଶୀ ମଧ୍ୟ ଏହାକୁ ନିନ୍ଦା କରିଛନ୍ତି। ସେ କହିଛନ୍ତି, “ଗଣତନ୍ତ୍ରରେ ବିବାଦ ଓ ପ୍ରତିବାଦର ସ୍ଥାନ ଅଛି, କିନ୍ତୁ ହିଂସାର ନାହିଁ।”

ଏହି ଘଟଣା ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନ ଉଠାଇଛି। ରେଖା ଗୁପ୍ତାଙ୍କୁ ଜେଡ-ପ୍ଲସ ସୁରକ୍ଷା ମିଳିଥାଏ। ତଥାପି ଅଭିଯୁକ୍ତ ତାଙ୍କ ନିକଟକୁ ପହଞ୍ଚି ଆକ୍ରମଣ କରିଥିଲେ। ପୁଲିସ ତଦନ୍ତ ଜାରି ରଖିଛି ଓ ଗୁଜୁରାଟ ପୁଲିସ ସହାୟତାରେ ଅଭିଯୁକ୍ତଙ୍କ ପରିଚୟ ଯାଞ୍ଚ କରୁଛି।