ନୂଆଦିଲ୍ଲୀ: ଭାରତରେ ୫ଜି ସେବା ଆରମ୍ଭ ହୋଇଛି, ଏଭଳି ପରିସ୍ଥିତିରେ ସରକାର ୫ଜି ୟୁଜରଙ୍କ ସଂଖ୍ୟା ଶୀଘ୍ର ବୃଦ୍ଧି କରିବା ପାଇଁ ଅନେକ ବଡ ପଦକ୍ଷେପ ନେଉଛନ୍ତି। ନିକଟରେ ସରକାର ସମସ୍ତ ସ୍ମାର୍ଟଫୋନ ନିର୍ମାତାମାନଙ୍କୁ ଯଥାଶୀଘ୍ର ୫ଜି ସ୍ମାର୍ଟଫୋନରେ ୫ଜି ସେବା ସହାୟତା ଦେବାକୁ କହିଛନ୍ତି। ବିଭିନ୍ନ ଗଣମାଧ୍ୟମରେ ପ୍ରକାଶିତ ରିପୋର୍ଟରେ ଉଲ୍ଲେଖ କରାଯାଇଛି ଯେ କମ୍ପାନୀମାନଙ୍କୁ ୫ଜି ନେଟୱର୍କକୁ ପରିବର୍ତ୍ତନ କରିବାକୁ ତିନି ମାସ ସମୟ ଦିଆଯାଇଛି। ସ୍ମାର୍ଟଫୋନ୍ ନିର୍ମାତାମାନେ ସରକାରଙ୍କୁ ଆଶ୍ୱାସନା ଦେଇଛନ୍ତି ଯେ ସେମାନେ ଧୀରେ ଧୀରେ ୧୦ ହଜାର ଟଙ୍କା କିମ୍ବା ତାଦଠାରୁ ଅଧିକ ମୂଲ୍ୟର ୫ଜି ଫୋନ ବିକ୍ରି କରିବେ।
ଦୂରସଞ୍ଚାର ବିଭାଗ ଏବଂ ଇଲେକ୍ଟ୍ରୋନିକ୍ସ ଏବଂ ଟେଲି କମ୍ୟୁନିକେସନ ମନ୍ତ୍ରଣାଳୟର ବରିଷ୍ଠ ପ୍ରତିନିଧିମାନେ ସ୍ମାର୍ଟଫୋନ୍ ନିର୍ମାତା ଏବଂ ଟେଲିକମ୍ ଉତ୍ପାଦକାରୀଙ୍କୁ ଭେଟି ୫ଜି ଫୋନ୍ ସେବା ସମ୍ବନ୍ଧରେ କଥା ହୋଇଛନ୍ତି।
ରିପୋର୍ଟରେ କୁହାଯାଇଛି ଯେ ଭାରତରେ ପ୍ରାୟ ୭୫୦ ନିୟୁତ ମୋବାଇଲ୍ ଫୋନ୍ ବ୍ୟବହାରକାରୀ ଅଛନ୍ତି। ଯେଉଁମାନଙ୍କ ମଧ୍ୟରୁ କେବଳ ୧୦୦ ନିୟୁତ ଉପଭୋକ୍ତାଙ୍କର ୫ଜି ପ୍ରସ୍ତୁତ ଫୋନ୍ ରହିଛି। କେବଳ ଏତିକି ନୁହେଁ, ବର୍ତ୍ତମାନ ସୁଦ୍ଧା ୩୫୦ ମିଲିୟନରୁ ଅଧିକ ଉପଭୋକ୍ତା ଅଛନ୍ତି ଯେଉଁମାନେ କେବଳ ୩ଜି ଏବଂ ୪ଜି ମୋବାଇଲ୍ ଫୋନ୍ ବ୍ୟବହାର କରୁଛନ୍ତି। ସରକାର ଏବେ ୩ଜି-୪ଜି ଫୋନ୍ ତିଆରି ଉପରେ ଧୀରେ ଧୀରେ ରୋକ୍ ଲଗାଇ ୫ଜି ଟେକ୍ନୋଲୋଜି ଫୋନ୍ ବଜାରକୁ ଦେବାକୁ କହିଥିବା ସୂଚନା ରହିଛି।
ଭାରତରେ ଅନେକ ଟେଲିକମ୍ କମ୍ପାନୀ ଅଛି, କିନ୍ତୁ ବର୍ତ୍ତମାନ କେବଳ ଏୟାରଟେଲ ଏବଂ ମୁକେଶ ଅମ୍ବାନୀଙ୍କ ରିଲାଏନ୍ସ ଜିଓ ହେଉଛି ଦୁଇଟି କମ୍ପାନୀ ଯାହା ଅକ୍ଟୋବର ଆରମ୍ଭରେ ୫ଜି ସେବା ଆରମ୍ଭ କରିବାକୁ ଘୋଷଣା କରିଥିଲେ।
ଦେଶର ୮ ଟି ସହରରେ ଏୟାରଟେଲ ୫ଜି ପ୍ଲସ୍ ସେବା ଆରମ୍ଭ ହୋଇଥିବାବେଳେ ଅନ୍ୟପକ୍ଷରେ କେବଳ ଚାରିଟି ସହରରେ ରିଲାଏନ୍ସ ଜିଓ ୫ ଜି ସେବା ଆରମ୍ଭ ହୋଇଛି। ଏଥି ସହିତ, ଭୋଡାଫୋନ୍ ଆଇଡିଆ ଏହାର ୫ଜି ସେବା ସମ୍ବନ୍ଧରେ କୌଣସି ସୂଚନା ଦେଇ ନାହିଁ, କିନ୍ତୁ କମ୍ପାନୀ ସ୍ପଷ୍ଟ କରିଛି ଯେ ଖୁବ୍ ଶୀଘ୍ର ସେ ୫ଜି ସେବା ଆରମ୍ଭ କରିବ।