ନୂଆଦିଲ୍ଲୀ: ଚାଲିଛି ଭୋଟ୍ ଗଣତି, ଆସୁଛି ଟ୍ରେଣ୍ଡ। ଲୋକସଭା ନିର୍ବାଚନରେ ଉତ୍ତରପ୍ରଦେଶର ଅମେଠିରୁ ସ୍ମୃତି ଇରାନୀଙ୍କୁ ପ୍ରାର୍ଥୀ କରିଛି ବିଜେପି। ବର୍ତ୍ତମାନ ହଟ ସିଟ୍ ଆମେଠି ଉପରେ ମଧ୍ୟ ସମସ୍ତଙ୍କର ନଜର ରହିଛି ଏଠାରେ କଂଗ୍ରେସ ଆଗୁଆ ଥିବା ବେଳେ ୨୦ ହଜାର ଭୋଟରେ ବିଜେପି ପଛରେ ଚାଲିଛି। ଏହି ଆସନରେ କଂଗ୍ରେସ କିଶୋରୀ ଲାଲ ଶର୍ମାଙ୍କୁ ତାଙ୍କ ବିରୋଧରେ ପ୍ରାର୍ଥୀ କରିଥିଲା। ଏବେ ପ୍ରଥମ ରାଉଣ୍ଡରେ କଂଗ୍ରେସର କିଶୋରୀ ଲାଲ ଶର୍ମା ବିଜେପି ପ୍ରାର୍ଥୀ ସ୍ମୃତି ଇରାନୀଙ୍କଠାରୁ ଆଗରେ ରହିଥିବା ଜଣାପଡ଼ିଛି।
ଆମେଠି ଆସନରେ ପ୍ରଥମ ରାଉଣ୍ଡ ବେଳକୁ ବିଜେପି ପ୍ରାର୍ଥୀ ସ୍ମୃତି ଇରାନୀ ଆଗୁଆ ଥିଲେ କିନ୍ତୁ ଗଣତିର ୨ ଘଣ୍ଟା ପରେ ଅର୍ଥାତ ସକାଳ ୧୦ଟା ପର୍ଯ୍ୟନ୍ତ କିଶୋରୀ ଲାଲ ଶର୍ମା ସ୍ମୃତି ଇରାନୀଙ୍କଠାରୁ ୧୩ ହଜାର ୯୫୪ଭୋଟରେ ଆଗୁଆ ଥିଲେ। ବର୍ତ୍ତମାନ ୨୦ ହଜାର ଭୋଟରେ ପଛୁଆ ଅଛନ୍ତି ସ୍ମୃତି। ସ୍ମୃତିଙ୍କଠାରୁ ବିଜେପି ବିଜୟ ଆଶା ରଖିଥିବା ବେଳେ ଏଥର ସେ ଦଳକୁ ନିରାଶ କରିପାରନ୍ତି ବୋଲି ପ୍ରଥମ ରାଉଣ୍ଡ ଦେଖି ଆଶଙ୍କା କରାଯାଉଛି।
ଉତ୍ତରପ୍ରଦେଶର ୮୦ଟି ଲୋକସଭା ଆସନ ପାଇଁ ୭ଟି ପର୍ଯ୍ୟାୟରେ ମତଦାନ ଅନୁଷ୍ଠିତ ହୋଇଥିଲା। ଏଥର ସମାଜବାଦୀ ପାର୍ଟି ଏବଂ କଂଗ୍ରେସ ଏକାଠି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ। ଅନ୍ୟପକ୍ଷରେ ବିଜେପି ଏନଡିଏରେ ଛୋଟ ଛୋଟ ଦଳକୁ ଅନ୍ତର୍ଭୁକ୍ତ କରିଥିଲା। ଲୋକସଭା ନିର୍ବାଚନ ପୂର୍ବରୁ ଅପନା ଦଳ (ଏସ), ସୁଭାସପା, ନିଶାଦ ପାର୍ଟି ଏବଂ ରାଷ୍ଟ୍ରୀୟ ଲୋକ ଦଳ ଏନଡିଏରେ ସାମିଲ ହୋଇଥିଲେ। ନ୍ୟୁଜ୍ ଏଜେନ୍ସି ଆଇଏନଏସ (IANS) ର ଏକ ରିପୋର୍ଟ ଅନୁଯାୟୀ, କିଶୋରୀ ଲାଲ ଶର୍ମା ଏହି ଅଞ୍ଚଳର ଜାତି ଗତିଶୀଳତା ସହିତ ଭଲ ଭାବରେ ସଜାଗ ରହିଛନ୍ତି। ଆମେଠି ମୁଖ୍ୟତଃ ଦଳିତ (୨୬ ପ୍ରତିଶତ), ମୁସଲମାନ (୨୦ ପ୍ରତିଶତ) ଏବଂ ବ୍ରାହ୍ମଣ (୧୮ ପ୍ରତିଶତ) ଜାତିକୁ ନେଇ ଗଠିତ। କଂଗ୍ରେସ ବିଶ୍ୱାସ କରେ ଯେ କେ.ଏଲ୍ ଶର୍ମା ଏହି ଜାତି ସମୀକରଣକୁ ତାଙ୍କ ସୁବିଧା ପାଇଁ ବ୍ୟବହାର କରିପାରନ୍ତି।