ଭୁବନେଶ୍ୱର: ଶିକ୍ଷା ଓ ଅନୁସନ୍ଧାନ (ସୋଆ) ବିଶ୍ୱବିଦ୍ୟାଳୟର କୁଳାଧିପତି ତଥା କୃଷି ବିଶେଷଜ୍ଞ ପ୍ରଫେସର ଡି.ପି. ରାୟଙ୍କର ଶନିବାର ସକାଳେ ପରଲୋକ ହୋଇଯାଇଛି । କିଛି ଦିନ ହେବ ସେ ଅସୁସ୍ଥ ଥିଲେ । ମୃତ୍ୟୁ ବେଳକୁ ପ୍ରଫେସର ରାୟଙ୍କୁ ୭୩ ବର୍ଷ ବୟସ ହୋଇଥିଲା । କିଛି ଦିନ ହେବ ସେ ଅସୁସ୍ଥ ହୋଇ ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍ ଆଣ୍ଡ ସମ୍ ହସ୍ପିଟାଲ୍ରେ ଚିକିତ୍ସାଧିନ ଥିଲେ ।
ଦୁଇ ଥର ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ (ଓୟୁଏଟି)ର କୁଳପତି ଭାବେ ଦାୟିତ୍ୱ ତୁଲାଇଥିବା ପ୍ରଫେସର ରାୟଙ୍କର ସୋଆ ସହିତ ଦୀର୍ଘ ସମୟର ସମ୍ପର୍କ ଥିଲା । ସେ ସୋଆର ପ୍ରତିଷ୍ଠାତା ସଭାପତି ପ୍ରଫେସର (ଡକ୍ଟର) ମନୋଜରଞ୍ଜନ ନାୟକଙ୍କର ପ୍ରମୁଖ ଉପଦେଷ୍ଟା ଭାବେ ଦାୟିତ୍ୱ ନିର୍ବାହ କରିଥିଲେ । ମାର୍ଚ୍ଚ ୧, ୨୦୨୨ରେ ସେ ବିଶ୍ୱବିଦ୍ୟାଳୟର କୁଳାଧିପତି ଭାବେ ଦାୟିତ୍ୱ ଗ୍ରହଣ କରିଥିଲେ ।
ତାଙ୍କର ମୃତ୍ୟୁ ଖବର ପାଇବା ମାତ୍ରେ ପ୍ରଫେସର ନାୟକ ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍କୁ ଯାଇ ଶେଷ ଦର୍ଶନ କରିଥିଲେ ଏବଂ ତାଙ୍କ ଆତ୍ମାର ସଦ୍ଗତି କାମନା କରିଥିଲେ । ସେ ଏକ ମହାନ୍ ଆତ୍ମା ଥିଲେ ଏବଂ ସୋଆର ଉନ୍ନତି ନିମନ୍ତେ ତାଙ୍କର ଯଥେଷ୍ଟ ଅବଦାନ ରହିଥିଲା ବୋଲି ନିଜ ଶୋକ ବାର୍ତ୍ତାରେ ପ୍ରଫେସର ନାୟକ ପ୍ରକାଶ କରିଛନ୍ତି । ସୋଆର କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ପ୍ରଫେସର ରାୟଙ୍କୁ ପିତୃତୁଲ୍ୟ ଓ ଜଣେ ମାର୍ଗଦର୍ଶକ ବୋଲି ଅଭିହିତ କରିବା ସହ ତାଙ୍କ ମୃତ୍ୟୁ ବିଶ୍ୱବିଦ୍ୟାଳୟ ପାଇଁ ଅପୂରଣୀୟ କ୍ଷତି ବୋଲି କହିଛନ୍ତି ।
ସୋଆର କୃଷି ମହାବିଦ୍ୟାଳୟ (ଇନ୍ଷ୍ଟିଚ୍ୟୁଟ୍ ଅଫ୍ ଏଗ୍ରିକଲ୍ଚରାଲ୍ ସାଇନ୍ସେସ) ପ୍ରତିଷ୍ଠା କରିବାରେ ପ୍ରଫେସର ରାୟ ମୁଖ୍ୟ ପୁରୋଧା ଥିଲେ । ପୂର୍ବ ଏବଂ ଉତର ପୂର୍ବ ଭାରତରେ ପ୍ରଥମ ଥର ଲାଗି ଏଭଳି ଘରୋଇ କୃଷି ମହାବିଦ୍ୟାଳୟ ଆରମ୍ଭ କରିବାରେ ତାଙ୍କର ଯଥେଷ୍ଟ ଅବଦାନ ରହିଥିଲା । ସେହିପରି ସୋଆ ପରିଚାଳିତ ଇନ୍ଷ୍ଟିଚ୍ୟୁଟ୍ ଅଫ୍ ଭେଟେରୀନାରୀ ସାଇନ୍ସେସ୍ ଏବଂ ଆନିମଲ୍ ହଜବାଣ୍ଡ୍ରୀ ଆରମ୍ଭ କରିବାରେ ମଧ୍ୟ ତାଙ୍କର ଅନେକ ସହଯୋଗ ଥିଲା ।
୧୯୪୯ ମସିହା ଅଗଷ୍ଟ ୧୫ ତାରିଖରେ ଜନ୍ମିତ ପ୍ରଫେସର ରାୟ ୧୯୭୧ ମସିହାରେ ଓୟୁଏଟିରୁ ବିଏସ୍ସି (କୃଷି) ଶିକ୍ଷା ଗ୍ରହଣ କରିବା ପରେ କଲିକତା ବିଶ୍ୱବିଦ୍ୟାଳୟରୁ ଏମ୍ଏସ୍ସି (କୃଷି) ଉପାଧି ଗ୍ରହଣ କରିଥିଲେ । ସେହି ବିଶ୍ୱବିଦ୍ୟାଳୟରୁ ୧୯୮୧ ମସିହାରେ ସେ ପିଏଚ୍ଡି ହାସଲ କରିଥିଲେ ।
କଲିକତା ବିଶ୍ୱବିଦ୍ୟଳୟରୁ ଉଦ୍ୟାନ କୃଷି ବିଭାଗର ଆସିଷ୍ଟାଂଟ ପ୍ରଫେସର ଭାବେ କାର୍ଯ୍ୟ କରିବା ପରେ ସେ ଓୟୁଏଟିରେ ଆସୋସିଏଟ୍ ପ୍ରଫେସର ଭାବେ ଯୋଗ ଦେଇଥିଲେ । ଏଠାରେ ସେ ଆସୋସିଏଟ୍ ଡାଇରେକ୍ଟର (ରିସର୍ଚ୍ଚ), ଉଦ୍ୟାନ କୃଷି ବିଭାଗର ପ୍ରଫେସର ଓ ମୁଖ୍ୟ, ଏକ୍ସଟେନ୍ସନ୍ ଏଜୁକେସନ୍ ଡିନ୍ ଏବଂ ରେଜିଷ୍ଟ୍ରାର୍ ଭଳି ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇବା ପରେ ୨୦୦୬ ମସିହାରେ ଓୟୁଏଟିର କୁଳପତି ଭାବେ ଦାୟିତ୍ୱ ଗ୍ରହଣ କରିଥିଲେ । ୨୦୧୨ ପର୍ଯ୍ୟନ୍ତ ସେ ଓୟୁଏଟିର କୁଳପତି ପଦରେ ରହିଥିଲେ ।
ପରିବା ଏବଂ ପ୍ଲାଂଟେସନ୍ ଫସଲ, ଅର୍ଚ୍ଚାଡ୍ ମ୍ୟାନେଜମେଂଟ, ଭେରାଇଟାଲ୍ ଓ ନ୍ୟୁଟ୍ରିସ୍ନାଲ୍ ଇମ୍ପ୍ରୁଭ୍ମେଂଟ, ୱାଟର ମ୍ୟାନେଜମେଂଟ, ପ୍ରୋପାଗେସନ୍ ଟେକ୍ନିକ୍ସ, ପୋଷ୍ଟ ହାର୍ଭେଷ୍ଟ ମ୍ୟାନେଜମେଂଟ ଅଫ୍ ଟ୍ରପିକାଲ ଆଣ୍ଡ ସବ୍- ଟ୍ରପିକାଲ୍ ଫ୍ରୁଟ୍ସ ଓ ପରିବା ଫସଲରେ ଉନ୍ନତି କ୍ଷେତ୍ରରେ ସେ ଅନେକ ଗବେଷଣା କରିଛନ୍ତି । ୫୦ରୁ ଅଧିକ ପୋଷ୍ଟ ଗ୍ରାଜୁଏଟ୍ ଏବଂ ପିଏଚ୍ଡି ଛାତ୍ରଛାତ୍ରୀଙ୍କର ସେ ଗାଇଡ୍ ଥିବା ବେଳେ ଜାତୀୟ ଏବଂ ଆନ୍ତର୍ଜାତୀକ ସ୍ତରର ଜର୍ନାଲ୍ ଗୁଡ଼ିକରେ ତାଙ୍କର ୨୦୦ରୁ ଊର୍ଦ୍ଧ୍ୱ ବୈଜ୍ଞାନିକ ସନ୍ଦର୍ଭ ପ୍ରକାଶିତ ହୋଇଛି ।
ପ୍ରଫେସର ରାୟ ଇଣ୍ଡିଆନ୍ କାଉନ୍ସିଲ୍ ଅଫ୍ ଏଗ୍ରିକଲ୍ଚରାଲ୍ ରିସର୍ଚ୍ଚ (ଆଇସିଏଆର୍), ଡିପାର୍ଟମେଂଟ ଅଫ୍ ବାୟୋଟେକ୍ନୋଲୋଜି(ଡିବିଟି), ଡିପାର୍ଟମେଂଟ ଅଫ୍ ସାଇନ୍ସ ଆଣ୍ଡ ଟେକ୍ନୋଲୋଜି (ଡିଏସଟି) ଏବଂ ଭାରତ ସରକାରଙ୍କ ପ୍ଲାନିଂ କମିଶନ ଅଧିନରେ ଥିବା ବିଭିନ୍ନ୍ କମିଟିର ସେ ସଦସ୍ୟ ଓ ଅଧ୍ୟକ୍ଷ ଭାବେ ଦାୟିତ୍ୱ ତୁଲାଇଛନ୍ତି । ତାଙ୍କ ପ୍ରାର୍ଥିବ ଶରୀରକୁ ସୋଆ ପରିଚାଳିତ ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍, ଇନ୍ଷ୍ଟିଚ୍ୟୁଟ୍ ଅଫ୍ ଏଗ୍ରିକଲ୍ଚରାଲ୍ ସାଇନ୍ସେସ୍ ଓ ସୋଆର ମୁଖ୍ୟ କାର୍ଯ୍ୟାଳୟକୁ ଶେଷ ଦର୍ଶନ ପାଇଁ ଅଣାଯାଇଥିଲା ।
ସୋଆ କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ, ସୋଆ ଉପଦେଷ୍ଟା ମଣ୍ଡଳୀର ଅଧ୍ୟକ୍ଷ ପ୍ରଫେସର ଦାମୋଦର ଆଚାର୍ଯ୍ୟ, ପ୍ରମୁଖ ଉପଦେଷ୍ଟା (ସ୍ୱାସ୍ଥ୍ୟ ବିଜ୍ଞାନ) ପ୍ରଫେସର ଅଶୋକ କୁମାର ମହାପାତ୍ର, ଉପଦେଷ୍ଟା ପ୍ରଫେସର ଆର୍.ପି. ମହାନ୍ତି, ପ୍ରଫେସର ଜୟଦେବ ପତି, ଉପକୁଳପତି ତଥା ରେଜିଷ୍ଟ୍ରାର୍ ପ୍ରଫେସର ବିଭୁତି ଭୂଷଣ ପ୍ରଧାନ, କଂଟ୍ରୋଲର୍ ଅଫ୍ ଏଗ୍ଜାମିନେସନ୍ ପ୍ରଫେସର ମଞ୍ଜୁଳା ଦାସ, ନିର୍ଦ୍ଦେଶକ ପ୍ରଫେସର ମାନସ କୁମାର ମଲ୍ଲିକ, ଆଇଏଏସ୍ ଡିନ୍ ପ୍ରଫେସର ବିଜୟ କୁମାର ସାହୁ, ଜଏଂଟ ରେଜିଷ୍ଟ୍ରାର ଭିଷ୍ମ ଚରଣ ଦାସ, ପ୍ରଫେସର ମଧୁବ୍ରତା ମହାନ୍ତି, ଚିଫ୍ ଆଡମିନିଷ୍ଟ୍ରେଟିଭ୍ ଅଫିସର ପ୍ରମୋଦ କୁମାର ପଣ୍ଡା, ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍ର ମେଡିକାଲ ସୁପରିଟେଣ୍ଡେଂଟ ପ୍ରଫେସର ପୁଷ୍ପରାଜ ସାମନ୍ତସିଂହାର, ଆଡିସ୍ନାଲ୍ ଡିନ୍ (ରିସର୍ଚ୍ଚ) ପ୍ରଫେସର ପ୍ରିୟବ୍ରତ ପଟ୍ଟନାୟକ, ସିଭିଓ ଯୁଗଳ ଦାସ ଓ ମାନବସମ୍ବଳ ଅଧିକାରୀ ସିଦ୍ଧବ୍ରତ ଦାଶ ଓ ୟୁନିଭର୍ସିଟି ଆଉଟରିଚ୍ ପ୍ରୋଗ୍ରାମ୍ ନିର୍ଦ୍ଦେଶକ ପ୍ରଫେସର ନଚିକେତା ଶର୍ମା ପ୍ରମୁଖ ଶେଷ ଦର୍ଶନ କରିଥିଲେ ।
ସମ୍ ହସ୍ପିଟାଲ୍ରେ ମଧ୍ୟ ଡାକ୍ତର ଓ ଅନ୍ୟାନ୍ୟ କର୍ମକର୍ତାମାନେ ତାଙ୍କର ଶେଷ ଦର୍ଶନ କରିଥିଲେ । ସୋଆ ମୁଖ୍ୟ କାର୍ଯ୍ୟାଳୟରେ ଏକ ଶୋକ ସଭା କରାଯିବା ସହ ତାଙ୍କର ଆତ୍ମାର ସଦ୍ଗତି ନିମନ୍ତେ ଦୁଇ ମିନିଟ ନୀରବ ପ୍ରାର୍ଥନା କରାଯାଇଥିଲା । ସୋଆର ପ୍ରତ୍ୟେକ ଅନୁଷ୍ଠାନରେ ଶୋକ ସଭା କରାଯାଇଥିବା ବେଳେ ସମ୍ପୃକ୍ତ ଅନୁଷ୍ଠାନର ଡିନ୍ ଓ କର୍ମକର୍ତାମାନେ ଉପସ୍ଥିତ ଥିଲେ । ପୁରୀରେ ତାଙ୍କର ଶେଷ କୃତ୍ୟ ସମ୍ପନ୍ନ କରାଯାଇଛି ।
Comments are closed.