ୱାଶିଂଟନ୍: ଆମେରିକାର ମେରିଲ୍ୟାଣ୍ଡ ସହରରେ ଭାରତୀୟ ସମ୍ବିଧାନର ଜନକ ଡ. ଭୀମରାଓ ଆମ୍ବେଦକରଙ୍କ ସବୁଠାରୁ ବଡ ପ୍ରତିମୂର୍ତ୍ତି ଆନୁଷ୍ଠାନିକ ଭାବେ ଉନ୍ମୋଚିତ ହୋଇଛି। ଶନିବାର ଏହି ୧୯ ଫୁଟ ଉଚ୍ଚ ପ୍ରତିମୂର୍ତ୍ତି ଉନ୍ମୋଚିତ ହୋଇଛି। ଏହାର ନାମ “ଷ୍ଟାଚ୍ୟୁ ଅଫ୍ ଇକ୍ୱାଲିଟି” ରଖାଯାଇଛି।
ରିପୋର୍ଟ ଅନୁଯାୟୀ,ଉଦ୍ଘାଟନୀ ସମାରୋହରେ ୫୦୦ରୁ ଅଧିକ ଭାରତୀୟ-ଆମେରିକୀୟ, ଭାରତୀୟ ଓ ଅନ୍ୟ ଦେଶର ବହୁ ଲୋକ ଯୋଗ ଦେଇଥିଲେ। ୧୯ଫୁଟ ଉଚ୍ଚ ଷ୍ଟାଚ୍ୟୁ ଅଫ ଇକ୍ୱାଲିଟିର ଉଦ୍ଘାଟନୀରେ ଉପସ୍ଥିତ ସମସ୍ତ ଲୋକ ଜୟ ଭୀମ କହି ସ୍ଲୋଗାନ ଦେଇଥିଲେ।
Unveiling the statue of Dr Ambedkar at Accokeek Maryland USA pic.twitter.com/FWW2bhhlKR
— Ambedkar International Center (AIC) (@ambedkar_center) October 14, 2023
ଦେଶର ବିଭିନ୍ନ ପ୍ରାନ୍ତରୁ ଆସିଥିବା ଭାରତୀୟ-ଆମେରିକୀୟମାନେ ମଧ୍ୟ ସେଠାରେ ବିଭିନ୍ନ ସାଂସ୍କୃତିକ ଉପସ୍ଥାପନା କରିଥିଲେ। ଏଥି ସହିତ ଆମେରିକାରେ ଆମ୍ବେଦକରବାଦୀ ଆନ୍ଦୋଳନର ନେତୃତ୍ୱ ନେଇଥିବା ଦିଲୀପ ମହାସ୍କେ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିବାବେଳେ କହିଛନ୍ତି ଯେ ଷ୍ଟାଚ୍ୟୁ ଅଫ୍ ଇକ୍ୱାଲିଟି ୧.୪ ବିଲିୟନ ଭାରତୀୟ ଏବଂ ୪.୫ ନିୟୁତ ଭାରତୀୟ ଆମେରିକୀୟଙ୍କୁ ପ୍ରତିନିଧିତ୍ୱ କରିବ।
ଗୁଜରାଟରେ ଷ୍ଟାଚ୍ୟୁ ଅଫ୍ ୟୁନିଟି ପ୍ରତିମୂର୍ତ୍ତି ଗଢିଥିବା ପ୍ରସିଦ୍ଧ କଳାକାର ତଥା ଶିଳ୍ପୀ ରାମ ସୂତାରଙ୍କ ଦ୍ୱାରା ସର୍ଦ୍ଦାର ପଟେଲଙ୍କ ଏହି ପ୍ରତିମୂର୍ତ୍ତି ତିଆରି କରାଯାଇଛି। ତେବେ ଆମେରିକାରେ ଅନେକ ଲୋକ ଏହି ଐତିହାସିକ ଘଟଣାର ଅଂଶ ହେବା ପାଇଁ ପ୍ରାୟ ୧୦ ଘଣ୍ଟାର ଦୀର୍ଘ ଯାତ୍ରା କରି ଆସିଥିଲେ।