ବାରାଣାସୀ: ଉତ୍ତରପ୍ରଦେଶର ବାରାଣାସୀରେ ଥିବା ବନାରସ ହିନ୍ଦୁ ବିଶ୍ୱବିଦ୍ୟାଳୟ (ବିଏଚୟୁ)ର ଜଣେ ବିଦେଶୀ ଛାତ୍ରଙ୍କୁ ଗିରଫ କରାଯାଇଛି | ଏହି ବିଦେଶୀ ଛାତ୍ରଜଣକ ମରିସସର ହୋଇଥିବାବେଳେ ଜଣେ ମହିଳା ପ୍ରଫେସରଙ୍କୁ ଅସଦାଚରଣ ଅଭିଯୋଗରେ ଗିରଫ କରାଯାଇ ଜେଲକୁ ପଠାଇ ଦିଆଯାଇଛି। ସୂଚନା ମୁତାବକ ଫେବୃଆରୀ ୨୩ରେ, ବିଏଚୟୁର ଜଣେ ମହିଳା ପ୍ରଫେସର ମରିସସର ଛାତ୍ର ପ୍ରଶାନ୍ତ ଶର୍ମା ଚାଟୁଆଙ୍କ ବିରୋଧରେ ଅଭିଯୋଗ କରିଥିଲେ | ଆଉ ପୋଲିସ ଧାରା ୩୫୪ ଅନୁଯାୟୀ ମାମଲା ରୁଜୁ କରିଥିଲା। ବିଏଚୟୁ କଳା ବିଭାଗର ଜଣେ ମହିଳା ପ୍ରଫେସର ଛାତ୍ର ପ୍ରଶାନ୍ତ ଶର୍ମା ଚାଟୁଆଙ୍କ ନାମରେ ମାନସିକ ନିର୍ଯାତନା ଅଭିଯୋଗ କରିଥିଲେ।
ମହିଳା ପ୍ରଫେସର କହିଛନ୍ତି ଯେ ଅଭିଯୁକ୍ତ ଜଣକ ଏମଏ ପ୍ରଥମ ବର୍ଷର ଛାତ୍ର। ଛାତ୍ର ଜଣକ ମହିଳା ପ୍ରଫେସରଙ୍କୁ ବିଭିନ୍ନ ଉପାୟରେ ଅସଦାଚରଣ କରୁଥିଲେ। କେତେବେଳେ ତାଙ୍କ କ୍ୟାବିନକୁ ଯାଇ ଅଶ୍ଳୀଳ ଇଙ୍ଗିତ କରୁଥିଲେ ପୁଣି ବେଳେବେଳେ ତାଙ୍କୁ ରାସ୍ତାରେ ଅଟକାଇ ଅଶ୍ଳୀଳ କଥାବାର୍ତ୍ତା କରୁଥିଲେ | କେବଳ ଏତିକି ନୁହେଁ, ଏହି ଛାତ୍ରଜଣକ ମହିଳା ପ୍ରଫେସରଙ୍କୁ ହ୍ଵାଟ୍ସଆପରେ ଅଶ୍ଳୀଳ ମେସେଜ ପଠାଉଥିଲେ। ଏଭଳି ନ କରିବାକୁ ଛାତ୍ରଙ୍କୁ ପ୍ରଫେସରଜଣକ ବାରମ୍ବାର ବୁଝାଇଥିଲେ ବି ସେ ମାନିନଥିଲେ | ଏହାପରେ ମହିଳା ପ୍ରଫେସର ବିଏଚୟୁ ପ୍ରୋକ୍ଟୋରିଆଲ ବୋର୍ଡରେ ଏକ ଲିଖିତ ଅଭିଯୋଗ କରିଥିଲେ। ପ୍ରୋକ୍ଟୋରିଆଲ୍ ବୋର୍ଡ ପ୍ରଫେସରଙ୍କ ଅଭିଯୋଗକୁ ପୋଲିସ ଷ୍ଟେସନକୁ ପଠାଇଥିଲା। ଏହା ପରେ ପୋଲିସ ଏନେଇ ଏକ ମାମଲା ରୁଜୁ କରିଥିଲା ଓ ବିଦେଶୀ ଛାତ୍ରଙ୍କୁ ଗିରଫ କରାଯାଇଛି |
