ବ୍ରହ୍ମପୁର:କଲେଜ ପରିଚୟପତ୍ର ଜାଲିଆତି କରିଥିବା ଜଣେ ଛାତ୍ରଙ୍କୁ ତାଗିଦ କରିବାରୁ ଅଧ୍ୟକ୍ଷାଙ୍କ କାରକୁ ପଥର ମାଡ ହୋଇଛି। ବ୍ରହ୍ମପୁର ସ୍ଥିତ ବିନାୟକ ଆଚାର୍ଯ୍ୟ କଲେଜରେ ଏହି ଘଟଣା ଦେଖିବାକୁ ମିଳିଛି। ଘଟଣାକୁ ନେଇ କଲେଜ ଅଧ୍ୟକ୍ଷା ଡ. ପ୍ରମିଳା ଖାଡଙ୍ଗା ବଡ ବଜାର ଥାନାରେ ଏତଲା ଦେଇଛନ୍ତି। ସୂଚନାଯୋଗ୍ୟ ଯେ, ସୋମବାର କଲେଜର ବାଣିଜ୍ୟ ବିଭାଗ ଦ୍ବିତୀୟ ବର୍ଷର ଜଣେ ଛାତ୍ର ନିଜ ପରିଚୟପତ୍ର ଜାଲିଆତି କରିଥିବା ଜଣାପଡ଼ିଥିଲା। ଫଳରେ ଅଧ୍ୟକ୍ଷା ତାଙ୍କୁ ତାଗିଦ୍ କରିବା ସହ ନିଜ ଅଭିଭାବକଙ୍କୁ କଲେଜକୁ ଡ଼ାକିବାକୁ କହିଥିଲେ। ଏହାପରେ ଛାତ୍ର ଜଣଙ୍କ ସେଠାରୁ ଚାଲି ଯାଇଥିଲେ। ହେଲେ ଅପରାହ୍ନରେ ଅଧ୍ୟକ୍ଷା ନିଜ କାରରେ କଲେଜରୁ ବାହାରୁଥିବା ବେଳେ ଛାତ୍ର ଜଣକ ତାଙ୍କ କାରକୁ ଏକ ପଥର ଫିଙ୍ଗିଥିଲେ। ଏଥିରେ କାରର ପଛପଟ କ୍ଷତିଗ୍ରସ୍ତ ହୋଇଥିଲା। ଅଧ୍ୟକ୍ଷାଙ୍କ ଏତଲାକୁ ଭିତ୍ତି କରି ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଜାରି ରଖିଛି।
Comments are closed.