ସିଡନୀ: ଭାରତ ବିପକ୍ଷ ବର୍ଡର-ଗାଭାସ୍କର ଟ୍ରଫିକୁ ଅଷ୍ଟ୍ରେଲିଆ ଜିତି ନେଇଛି । ତେବେ ପୁରସ୍କାର ବିତରଣ ଉତ୍ସବରେ ଆୟୋଜକ ଦେଶଙ୍କ ବ୍ୟବହାର କ୍ରିକେଟପ୍ରେମୀଙ୍କୁ ପସନ୍ଦ ଆସିନି । ଟ୍ରଫି ପ୍ରଦାନ ବେଳେ ଆଲାନ ବର୍ଡରଙ୍କୁ ଏକାକୀ ଡକା ଯାଇଥିଲା । ସେ ନିଜ ଦେଶର ଖେଳାଳିଙ୍କୁ ଟ୍ରଫି ପ୍ରଦାନ କରିଥିଲେ । ଏ ନେଇ କିନ୍ତୁ ଭାରତର ମହାନ ଖେଳାଳି ସୁନୀଲ ଗାଭାସ୍କର ଖୋଲାଖୋଲି ଭାବେ ଅସନ୍ତୋଷ ବ୍ୟକ୍ତ କରିଛନ୍ତି । ମୁଁ ପଡିଆରେ ଉପସ୍ଥିତି ଥିଲି ଅଥଚ ସେମାନେ ମୋତେ ଡାକିଲେ ନାହିଁ । ବନ୍ଧୁ ବର୍ଡରଙ୍କ ସହ ମିଳିତ ଭାବେ ଟ୍ରଫି ଦେଇଥିଲେ ଏହା ନିଶ୍ଚିତ ଭାବେ ମୋତେ ଆନନ୍ଦ ପ୍ରଦାନ କରିଥାନ୍ତା ।
ମୋ ନାମ ମଧ୍ୟ ଏହି ଟ୍ରଫିରେ ଅଛି ବୋଲି ଗାଭାସ୍କର କହିଛନ୍ତି । ଅଷ୍ଟ୍ରେଲିଆ ଭଲ ଖେଳିଲା ଏବଂ ଟ୍ରଫି ଜିତିଲା । ମୁଁ ଜଣେ ଭାରତୀୟ ହୋଇଥିବାରୁ ମୋତେ ଏଥିପାଇଁ ଡକା ଗଲାନି ବୋଲି ସେ ପ୍ରଶ୍ନ କରିଛନ୍ତି । ୧୯୯୬ ପରଠାରୁ ଭାରତ-ଅଷ୍ଟ୍ରେଲିଆ ସିରିଜକୁ ବର୍ଡର-ଗାଭାସ୍କର ଟ୍ରଫି ଭାବେ ବିବେଚନା କରାଯାଉଛି । ପରେ ଅବଶ୍ୟ କ୍ରିକେଟ ଅଷ୍ଟ୍ରେଲିଆ ଏହା ଭୁଲ ଥିଲା ବୋଲି ମାନିଛି ।